Read Хуыцауы Дзырд иронау Райдиан 15 Bible Online

Райдиан 15 - Хуыцауы Дзырд иронау bible

Райдиан 15

¹Ацы хабӕрттӕ куы ӕрцыдысты, уый фӕстӕ Дунедарӕг Авраммӕ ӕргом рацыд ӕмӕ йын загъта: «Ма тӕрс, Аврам! Ӕз дӕ хъахъхъӕнын уартау. Стыр уыдзӕни дӕ хӕрзиуӕг».

²Фӕлӕ Аврам загъта: «О Дунедарӕг, мӕ Хуыцау! Цы кӕнын уыцы хӕрзиуӕгӕй, кӕд ӕмӕ ӕнӕзӕнӕгӕй амӕлдзынӕн ӕмӕ мӕ бынтӕ дамаскаг Елиезерӕн баззайдзысты, уӕд?»

³Ноджы ма загъта: «Зӕнӕг мын нӕ радтай, ӕмӕ мӕ бынтӕ мӕ цагъары хай бауыдзысты».

⁴«Дӕ цагъармӕ не ’рхаудзысты дӕ бынтӕ, — загъта йын Дунедарӕг. — Дӕхицӕн уыдзӕни фырт».

⁵Цатырӕй рацӕуын кодта Аврамы ӕмӕ йын загъта: «Скӕс-ма арвмӕ ӕмӕ стъалытӕ банымай. Бантысдзӕни дын сӕ банымайын?» Загъта ма йын: «Гъе уый бӕрц уыдзысты дӕ байзӕддӕгтӕ».

⁶Аврам баууӕндыди Дунедарӕгыл, ӕмӕ йӕ уымӕ гӕсгӕ Уый банымадта рӕстгӕнӕгыл.

⁷Дунедарӕг загъта Аврамӕн: «Ӕз Дунедарӕг дӕн, цӕмӕй дын ацы зӕхх раттон, уый тыххӕй дӕ халдейаг Урӕй Чи ракодта, Уый. Фыдӕй-фыртмӕйы исбонӕн ӕй айс».

⁸Аврам бафарста: «О Дунедарӕг, мӕ Хуыцау, цӕмӕй бӕрӕг у, ацы зӕхх мӕн кӕй уыдзӕни, уый?»

⁹Дунедарӕг ын загъта: «Ӕрбакӕн Мын ӕртӕаздзыд хъуг, ӕртӕаздзыд сӕгъ ӕмӕ ӕртӕаздзыд фыр, стӕй ӕрбахӕсс ӕхсинӕг ӕмӕ бӕдул бӕлон».

¹⁰Аврам сӕ ӕрбакодта, аргӕвста сӕ ӕмӕ сӕ дӕргъмӕ афаста, се ’рдджытӕ сын иу иннӕйы ныхмӕ ӕрӕвӕрдта. Ӕрмӕст мӕргъты нӕ адих кодта.

¹¹Холыхор мӕргътӕ сыл ӕмбырдтӕ кодтой, фӕлӕ-иу сӕ Аврам асырдта.

¹²Хур ӕрныгуылыны афон Аврам тарф фынӕй баци; ӕвирхъау тас йӕ зӕрдӕйы ныххызт, ӕмӕ йыл дуне баталынг ис.

¹³Дунедарӕг Аврамӕн загъта: «Уый зон, ӕмӕ дӕ байзӕддӕгтӕ кӕйдӕр зӕххыл ӕрцӕуӕггагӕй цӕрдзысты, цагъартӕ сӕ скӕндзысты, ӕмӕ сӕ цыппарсӕдӕ азы дӕргъы ссӕнддзысты.

¹⁴Фӕлӕ Ӕз, цагъары ӕфсондз сыл чи сӕвӕра, уыцы адӕмӕн уыдзынӕн тӕрхонгӕнӕг, ӕмӕ дӕ байзӕддӕгтӕ уырдыгӕй рацӕудзысты стыр исбонимӕ.

¹⁵Ды та дӕ фыдӕлтыл фарнимӕ сӕмбӕлдзынӕ, хӕрз зӕрондӕй бацӕудзынӕ ингӕнмӕ.

¹⁶Дӕ байзӕддӕгтӕн ӕрмӕст сӕ цыппӕрӕм фӕлтӕр ӕрбаздӕхдзысты ардӕм, уымӕн ӕмӕ аморӕгты тӕригъӕдтӕ фаг нӕма сбирӕ сты».

¹⁷Хур аныгуылд, ӕмӕ бӕстӕ ныттар ис. Ӕвиппайды сырхзынг пец ӕмӕ пиллонуадзгӕ цырагъ кусарты хӕйттӕн сӕ тӕккӕ астӕуты ацыдысты.

¹⁸Уыцы бон Дунедарӕг Аврамимӕ сарӕзта фидыд. Загъта: «Ӕз ацы зӕхх дӕттын дӕ байзӕддӕгтӕн, Мысыры цӕугӕдонӕй Евфраты стыр доны онг.

¹⁹Ныр дзы цӕрынц кенӕгтӕ, кенизӕгтӕ, кедмонӕгтӕ,

²⁰хеттӕгтӕ, периззӕгтӕ, рефаимтӕ[1],

²¹аморӕгтӕ, ханаанӕгтӕ, гиргашӕгтӕ ӕмӕ йевусӕгтӕ».