Read Хуыцауы Дзырд иронау Райдиан 16 Bible Online

Райдиан 16 - Хуыцауы Дзырд иронау bible

Райдиан 16

¹Аврамы ус Сарӕйӕн зӕнӕг нӕ цыди. Уыди йын унӕут, мысыраг, йӕ ном — Агар.

²Сарӕ загъта Аврамӕн: «Дунедарӕг мын зӕнӕг нӕ дӕтты, ӕмӕ уӕд та мӕ унӕутмӕ бацу, кӕд уый фӕрцы уӕддӕр схӕдзар уаин». Аврам сразы ис Сарӕимӕ.

³Сарӕ ӕрбакодта йӕ унӕуты, мысыраг Агары, ӕмӕ йӕ радта усӕн йӕ мой Аврамӕн. Хъуыддаг ӕрцыд, Аврам Ханааны зӕххыл куы ӕрцарди, уымӕй дӕс азы фӕстӕдӕр.

⁴Аврам ӕрӕмуат ис Агаримӕ. Уый банхъӕлцау ис ӕмӕ, йӕ уавӕр куы федта, уӕд йе ’хсины ницӕмӕуал дардта.

⁵Сарӕ Аврамӕн загъта: «Ды дӕ аххосджын ме ’фхӕрды. Дӕ хъӕбысы дын ӕй бакодтон, ӕмӕ, куы банхъӕлцау ис, уӕдӕй фӕстӕмӕ мӕн ницӕмӕуал дары. Гъемӕ дын Дунедарӕг тӕрхонгӕнӕг уӕд!»

⁶Аврам Сарӕйӕн загъта: «Дӕ унӕутыл дӕ бар цӕуы, ӕмӕ дӕ цыдӕриддӕр фӕнды, уый йын кӕн». Сарӕ райдыдта ӕфхӕрын Агары, ӕмӕ уый алыгъди.

⁷Агармӕ ӕдзӕрӕг быдыры, Шурмӕ фӕндагыл суадоны цурмӕ фӕзынди Дунедарӕджы зӕд

⁸ӕмӕ йӕ фӕрсы: «Агар, Сарӕйы унӕут, кӕцӕй рацыдтӕ ӕмӕ кӕдӕм цӕуыс?» Уый дзуапп радта: «Ме ’хсин Сарӕйӕ лидзын».

⁹Дунедарӕджы зӕд ын загъта: «Аздӕх де ’хсинмӕ ӕмӕ йын быхс».

¹⁰Ноджы ма йын Дунедарӕджы зӕд загъта: «Афтӕ дын сбирӕ кӕндзынӕн дӕ байзӕддӕгты, ӕмӕ сын банымайӕн дӕр нӕ уыдзӕни».

¹¹Ноджыдӕр ма йын Дунедарӕджы зӕд загъта: «Гъеныр ды ӕнхъӕлцау дӕ, гъеныр лӕппу ныййардзынӕ. Сӕвӕр-иу ыл Измаел — Дунедарӕг фехъуыста, фехъуыста дӕ дзыназын[1].

¹²Дӕ лӕппу, хъӕддаг хӕрӕгау, алкӕмӕ лӕбурдзӕни, йе ’мтуг адӕмтимӕ нӕ фидаудзӕн».

¹³Агар йемӕ дзурӕг Дунедарӕджы рахуыдта ахӕм номӕй: «Ды дӕ, мӕн Чи уыны, уыцы Хуыцау». Загъта: «Ӕз ам ӕцӕгдӕр федтон, мӕныл Чи ауды, уыцы Хуыцауы».

¹⁴Уымӕ гӕсгӕ ацы цъай хонынц «Кӕй хорзӕх мӕ ис, уыцы Цардӕгасы цъай». Ныронг дӕр лӕууы Кадеш ӕмӕ Береды ’хсӕн.

¹⁵15-16 Агар Аврамӕн ныййардта фырт, ӕмӕ йыл Аврам сӕвӕрдта ном Измаел. Уӕд Аврамыл цыдис ӕхсӕз ӕмӕ цыппарыссӕдз азы.