Read Хуыцауы Дзырд иронау Райдиан 23 Bible Online

Райдиан 23 - Хуыцауы Дзырд иронау bible

Райдиан 23

¹Саррӕ фӕцардис сӕдӕ дыууын авд азы.

²Амарди Кирйат-Арбайы (ома Хевроны), Ханааны зӕххыл. Авраам фӕкуыдта, фӕхъарджытӕ кодта Саррӕйыл.

³Стӕй Авраам сыстади марды цурӕй ӕмӕ хеттӕгтӕн загъта:

⁴«Ӕз ӕрцӕуӕггаг дӕн, фӕлӕ уе ’хсӕн рагӕй цӕрын. Уӕ зӕххӕй мын иу гӕппӕл схай кӕнут, цӕмӕй дзы мӕ усы мард баныгӕнон».

⁵Хеттӕгтӕ йын загътой:

⁶«Дӕ хорзӕхӕй, ӕрбайхъус нӕм, нӕ хицау! Мах дӕ нымайӕм Хуыцауы барджын лӕгыл, ӕмӕ нӕ зӕппӕдзты хуыздӕры бавӕр дӕ усы. Уый тыххӕй дын махӕй ничи бавгъау кӕндзӕни йӕ мыггаджы зӕппадз».

⁷Авраам сыстади, сӕрӕй ныллӕг акуывта уыцы зӕххы адӕмӕн, хеттӕгтӕн,

⁸ӕмӕ сын загъта: «Кӕд мын мӕ усы мард бавӕрыны бар дӕттут, уӕд уӕ курын, ӕмӕ Цохары фырт Ефронмӕ бахатут,

⁹цӕмӕй мын ратта, йӕ быдыры кӕрон цы лӕгӕт ис, Махпела, зӕгъгӕ, уый. Уӕ разы мын ӕй йе ’ххӕст аргъыл раттӕд зиан бавӕрыны тыххӕй».

¹⁰Хеттаг Ефрон бадти йе ’мбӕстӕгты ’хсӕн ӕмӕ, сахары кулдуармӕ цы хеттӕгтӕ ӕрӕмбырд ис, уыдон ӕй иууылдӕр куыд хъусой, афтӕ Авраамӕн загъта:

¹¹«Дӕ хорзӕхӕй, ме ’лдар, байхъус мӕм! Ӕз дын дӕттын уыцы зӕххы гӕппӕл дӕр ӕмӕ лӕгӕт дӕр. Дӕттын дын сӕ мӕ адӕмы раз, ӕмӕ дӕ зиан бавӕр».

¹²Авраам та йӕ сӕрӕй ныллӕг акуывта уыцы зӕххы адӕмӕн

¹³ӕмӕ йӕ се ’ппӕт дӕр куыд хъусой, афтӕ баздӕхти Ефронмӕ: «Мемӕ куы сразы уаис, уӕд дын быдыры аргъ раттин. Айс ӕй, ӕмӕ мӕ зиан уым бавӕрон».

¹⁴Ефрон загъта Авраамӕн:

¹⁵«Дӕ хорзӕхӕй, ме ’лдар, ӕрбайхъус мӕм! Зӕххӕн йӕ аргъ у цыппарсӕдӕ ӕвзист шекелы — уый ӕз ӕмӕ дӕуӕн йӕ койы аккаг дӕр нӕу. Бавӕр дӕ зиан».

¹⁶Авраам сразы ис Ефронимӕ. Хеттӕгты раз цас загъта, уый бӕрц ын сбарста ӕвзист — цыппарсӕдӕ шекелы, сӕудӕджертӕ куыд фӕбарынц, афтӕ.

¹⁷17-18 Афтӕмӕй, Ефронӕн Мамрейы ныхмӕ Махпелайы цы быдыр уыди, уый бацис Авраамы ӕд лӕгӕт, ӕд бӕлӕстӕ. Уымӕн ӕвдисӕн уыдысты, сахары кулдуармӕ чи ӕрӕмбырд ис, уыцы хеттӕгтӕ иууылдӕр.

¹⁹Ӕмӕ Авраам йӕ ус Саррӕйы бавӕрдта, Махпелайы быдыры, Мамрейы ныхмӕ (ныр Хеврон чи хуыйны, уый), цы лӕгӕт ис, уым, Ханааны зӕххыл.

²⁰Хеттӕгтӕй Аврааммӕ ӕрбахаудис зӕххы хай дӕр, цы лӕгӕт дзы уыди, уый дӕр, ӕмӕ йӕ зиан уыцы ран бафснайдта.