Read Хуыцауы Дзырд иронау Райдиан 25 Bible Online

Райдиан 25 - Хуыцауы Дзырд иронау bible

Райдиан 25

¹Авраамӕн ма уыди дыккаг ус дӕр, йӕ ном — Кетура.

²Уый Авраамӕн ныййардта Зимраны, Йокшаны, Меданы, Мидианы, Ишбакы ӕмӕ Шуахы.

³Йокшанӕн райгуырдысты Сава ӕмӕ Дедан. Деданы байзӕддӕгтӕ: ассириӕгтӕ, летушӕгтӕ ӕмӕ леумӕгтӕ.

⁴Мидианы фырттӕ: Ефа, Ефер, Ханох, Авида, Елдага. Се ’ппӕт дӕр Авраам ӕмӕ Кетурайӕ рацыдысты.

⁵Авраам йе ’ппӕт исбон дӕр радта Исаакӕн,

⁶йӕ иннӕ устыты лӕппутӕн та ракодта лӕвӕрттӕ ӕмӕ сӕ йӕ фырт Исаакы цурӕй арвыста скӕсӕйнаг бӕстӕм.

⁷Авраам фӕцарди сӕдӕ ӕвдай фондз азы.

⁸Йӕ цардӕй ахицӕн ис хӕрз зӕрондӕй, цардӕй бафсӕст, афтӕмӕй. Амард ӕмӕ йӕ фыдӕлты размӕ бацыди.

⁹9-10 Йӕ фырттӕ Исаак ӕмӕ Измаел ӕй бавӕрдтой Мамрейы ныхмӕ быдыры, Махпелайы лӕгӕты. Уыцы быдыр Авраам балхӕдта хеттӕгтӕй — Цохары фырт Ефронӕй. Уым ӕвӕрд сты Авраам ӕмӕ йӕ ус Саррӕ.

¹¹Авраамы мӕлӕты фӕстӕ йын Хуыцау арфӕ ракодта йӕ фырт Исаакӕн. Исаак царди Беер-Лахай-Роийы цъаймӕ хӕстӕг.

¹²Мӕнӕ, Саррӕйы мысыраг унӕут Агар Авраамӕн кӕй ныййардта, уыцы Измаелы байзӕддӕгтӕ.

¹³Измаелы фырттӕ — хистӕрӕй кӕстӕрмӕ: Невайот, йӕ зӕнӕджы хистӕр, уый дӕле — Кедар, Адбеел, Мивсам,

¹⁴Мишма, Дума, Масса,

¹⁵Хадад, Тема, Йетур, Нафиш, Кедма.

¹⁶Адон сты Измаелы фыртты — дыууадӕс фӕтӕджы — нӕмттӕ. Афтӕ хуындысты, цы знӕмтӕ сӕ рацыди, уыдон дӕр. Алкӕмӕн дӕр сӕ уыди йӕхи хъӕутӕ, йӕхи цӕрӕнуӕттӕ.

¹⁷Измаел фӕцарди сӕдӕ ӕртын авд азы, стӕй йӕ цардӕй ахицӕн ис. Амард ӕмӕ йӕ фыдӕлты размӕ бацыдис.

¹⁸Йӕ байзӕддӕгтӕ цардысты, Мысыры ӕмарӕн Ассиримӕ фӕндагыл цы ӕдзӕрӕг быдыр ис, Шур, зӕгъгӕ, уый ӕмӕ Хавилайы ’хсӕн. Се ’рвадӕлтӕй никӕимӕ фидыдтой.

¹⁹Мӕнӕ Авраамы фырт Исаакы ӕмӕ йӕ байзӕддаджы царды хабӕрттӕ. Авраамӕн райгуырд Исаак.

²⁰Исаакыл цыди дыууиссӕдз азы, Паддан-Арамӕй йын арамейаг Бетуелы чызг Ревеккӕйы, Лаваны хойы, куы ӕрхастой, уӕд.

²¹Ревеккӕйӕн зӕнӕг нӕ цыд, ӕмӕ Исаак Дунедарӕгӕн лӕгъстӕ кодта. Дунедарӕг ын йӕ куывд фехъуыста, ӕмӕ Ревеккӕ банхъӕлцау ис.

²²Фӕлӕ фырттӕ йӕ гуыбыны кӕрӕдзийы схойын райдыдтой, ӕмӕ загъта: «Сомбон дӕр кӕрӕдзийы ныхмӕ куы фӕуой, уӕд мӕ цард цы у?» Ӕмӕ Дунедарӕджы бафӕрсынмӕ ацыди.

²³Дунедарӕг ын дзуапп радта: «Дыууӕ адӕмы рантысдзӕн дӕ гуыбынӕй, дыууӕ адӕмыхатты ис дӕ мидӕг — сӕ фӕндӕгтӕ фӕхицӕн уыдзысты. Сӕ иу суыдзӕн иннӕмӕй тыхджындӕр, хистӕр лӕггад кӕндзӕни кӕстӕрӕн».

²⁴Ревеккӕйӕн ӕрцыд йӕ арыны афон, ӕмӕ ныййардта дыууӕ фаззоны.

²⁵Фыццаг чи райгуырд, уый уыди сырхбуар, къахӕй сӕрмӕ — сырды цармау хъуынджын. Ном ыл сӕвӕрдтой Исав.

²⁶Уый хӕдуӕлвӕд райгуырд йе ’фсымӕр: мады гуыбынӕй рацыдис, йӕ къухӕй Исавы зӕвӕтыл хӕцгӕйӕ, ӕмӕ ууыл та сӕвӕрдтой ном Йаков[1]. Куы райгуырдысты, уӕд Исаакыл цыдис ӕртиссӕдз азы.

²⁷Лӕппутӕ байрӕзтысты. Исав сси дӕсны цуанон, хӕтӕнты хӕтӕг. Йаков та уыд ӕвӕлмас лӕг, баззад-иу цатырты цур.

²⁸Исаакы зӕрдӕ агуырдта сырды фыд, ӕмӕ уымӕ гӕсгӕ уарзта Исавы. Ревеккӕ та уарзта Йаковы.

²⁹Иу хатт Йаков хъӕрмхуыпп куыд фыхта, афтӕ Исав та фӕлладӕй ӕрбацыди быдырӕй

³⁰ӕмӕ Йаковмӕ бахатыди: «Уыцы сырхӕй-ма мын авӕр ӕмӕ бахӕрон, кӕннод сыдӕй фӕмӕлын». Исавы фӕстӕдӕр схуындӕуыди «Сырх», дзуттагау «Едом».

³¹Фӕлӕ йын Йаков дзуапп радта: «Раздӕр уал мын дӕ хистӕрад рауӕй кӕн».

³²Исав ын афтӕ: «Мӕнӕ мӕлгӕ куы кӕнын, уӕд мӕ цӕмӕн хъӕуы уыцы хистӕрад?»

³³Йаков ын загъта: «Ард мын бахӕр ныртӕккӕ». Уый йын ард бахордта ӕмӕ Йаковӕн ауӕй кодта йӕ хистӕрад.

³⁴Йаков радта Исавӕн дзул ӕмӕ тъӕпӕн хъӕдуры хъӕрмхуыпп. Исав бахордта ӕмӕ бануӕзта, стӕй сыстад ӕмӕ рацыди — йӕ хистӕрад ницӕмӕ ’рдардта.