Read Хуыцауы Дзырд иронау Райдиан 34 Bible Online

Райдиан 34 - Хуыцауы Дзырд иронау bible

Райдиан 34

¹Йаков ӕмӕ Леайы чызг Динӕ иуахӕмы ацыди уырдыгон чызджыты абӕрӕг кӕнынмӕ.

²Бӕстӕйы хицау хивваг Хаморы фырт Шехем ӕй куы федта, уӕд ӕй аскъӕфта ӕмӕ йын батых кодта.

³Йаковы чызг Динӕ йӕ зӕрдӕмӕ фӕцыди, бауарзта йӕ ӕмӕ йыл рӕвдауӕн ныхӕстӕй узӕлыди.

⁴Шехем бахатыд йӕ фыд Хамормӕ: «Ацы чызджы мын ракур».

⁵Йаков фехъуыста, йӕ чызг Динӕ кӕй фегад ис, уый, фӕлӕ уыцы рӕстӕг йӕ фырттӕ быдыры фос хызтой, ӕмӕ се ’рбацыдмӕ иу дзырд дӕр не схауди йӕ дзыхӕй.

⁶Йаковимӕ баныхас кӕнынмӕ ’рбацыди Шехемы фыд Хамор.

⁷Уалынмӕ быдырӕй ӕрбаздӕхтысты Йаковы фырттӕ дӕр ӕмӕ, хабар куы базыдтой, уӕд зӕрдӕдзӕф фесты. Сӕ маст фыхти, уымӕн ӕмӕ Шехем бакодта ӕнаккаг ми — Йаковы чызгыл тыхӕй кӕй ныххӕцыди, уымӕй фегад кодта Израилы хӕдзар. Нӕ йын ӕмбӕлд ахӕм ӕнӕуаг ми бакӕнын.

⁸Хамор сӕм бахатыди: «Мӕ фырт Шехемы зӕрдӕмӕ тынг фӕцыди уӕ чызг, ӕмӕ йын ӕй, уӕ хорзӕхӕй, раттут.

⁹Стӕй амӕй фӕстӕмӕ дӕр хӕстӕгдзинад кӕнут немӕ: чызг дӕр нын дӕттут ӕмӕ нӕ чызг дӕр курут.

¹⁰Цӕрут не ’хсӕн. Бӕстӕ мӕнӕ уӕ разы, — ӕрцӕрут дзы, сӕрибарӕй йын йӕ зӕххыл цӕут ӕмӕ уын дзы хай уӕд».

¹¹11-12 Шехем йӕхӕдӕг та чызджы фыд ӕмӕ ӕфсымӕртӕн загъта: «Кӕд мыл баввӕрсат, уӕд уын бафиддзынӕн, цыдӕриддӕр зӕгъат, уый. Ӕрцагурут тӕккӕ стырдӕр ирӕд ӕмӕ лӕвӕрттӕ, ӕрмӕст мӕ ӕнӕ дзуаппӕй ма арвитут».

¹³Йаковы фырттӕ Шехем ӕмӕ йӕ фыд Хаморӕн радтой хин дзуапп, уымӕн ӕмӕ сын Шехем фегад кодта сӕ хо Динӕйы.

¹⁴Загътой сын: «Нӕ бон уый бакӕнын нӕу. Худинаг у махӕн нӕ хойы ӕнӕсунӕт лӕджы фыццаг скӕнын.

¹⁵Уемӕ ӕрмӕст уӕд сразы уыдзыстӕм, мах хуызӕн куы суат — уӕ нӕлгоймӕгтӕ ӕмхуызонӕй куы ӕрцӕуой сунӕтгонд.

¹⁶Гъеуӕд уын чызг дӕр дӕтдзыстӕм ӕмӕ уӕ чызг дӕр курдзыстӕм, ӕмӕ цӕрдзыстӕм уе ’хсӕн, уемӕ суыдзыстӕм иу адӕм.

¹⁷Нӕ коммӕ куынӕ бакӕсат ӕмӕ сунӕт куынӕ скӕнат, уӕд та нӕ чызджы фӕстӕмӕ байсдзыстӕм».

¹⁸Уыцы ныхӕстӕ фӕцыдысты Хамор ӕмӕ йӕ фырт Шехемы зӕрдӕмӕ.

¹⁹Лӕппу нӕ фӕзивӕг кодта сунӕт скӕнынмӕ, уымӕн ӕмӕ уарзта Йаковы чызджы. Йӕ фыды мыггаджы ’хсӕн та Шехем тӕккӕ кадджындӕр адӕймагыл нымад уыди.

²⁰Хамор ӕмӕ Шехем ӕрлӕууыдысты сӕ сахары кулдуары раз ӕмӕ сахары цӕрджытӕн загътой:

²¹«Уыцы адӕм нӕм кӕсынц хӕлар цӕстӕй. Уадз ӕмӕ ӕрцӕрой нӕ зӕххыл, сӕрибарӕй йыл цӕуой — парахат куы у фӕйнӕрдӕм сӕ разы. Мах та уыдонӕй чызг дӕр курдзыстӕм ӕмӕ сын нӕ чызджытӕй дӕр моймӕ дӕтдзыстӕм.

²²Фӕлӕ уыцы адӕм не ’хсӕн ӕрцӕрыныл ӕмӕ, немӕ иу адӕм суой, ууыл разы сты ӕрмӕст ахӕм дзырдӕй: уыдонау махмӕ дӕр хъуамӕ сунӕтгонд ӕрцӕуа алы нӕлгоймаг дӕр.

²³Ууыл куы сразы уӕм, уӕд цӕрдзысты не ’хсӕн, ӕмӕ мах бауыдзысты се ’ппӕт фос ӕмӕ сӕ исбон».

²⁴Сахары цӕрджытӕ байхъуыстой Хамор ӕмӕ йӕ фырт Шехеммӕ, ӕмӕ ӕппӕт нӕлгоймӕгтӕ дӕр ӕрцыдысты сунӕтгонд.

²⁵Ӕртыккаг бон, сунӕтгӕндтӕн сӕ хъӕдгӕмттӕ нӕма байгас сты, афтӕ Йаковы дыууӕ фырты Симеон ӕмӕ Левий, Динӕйы ӕфсымӕртӕ, райстой фӕйнӕ карды, ӕнӕкъуылымпыйӕ бацыдысты сахармӕ ӕмӕ ныццагътой нӕлгоймӕгты иууылдӕр.

²⁶Кардӕй амардтой Хаморӕн йӕхи дӕр ӕмӕ йӕ фырт Шехемы дӕр, стӕй Шехемы хӕдзарӕй Динӕйы ракодтой ӕмӕ рацыдысты.

²⁷Уый фӕстӕ Йаковы иннӕ фырттӕ ӕрбацыдысты ӕмӕ фӕкъахтой, сӕ хойы сын кӕм фегад кодтой, уыцы сахар.

²⁸Ратӕлӕт сын кодтой сӕ лыстӕг фос, се стурвос ӕмӕ сӕ хӕрджытӕ, ахастой, сахары ӕмӕ быдыры цыдӕриддӕр фӕллой уыди, уый.

²⁹Афтӕмӕй сын байстой се ’ппӕт исбон. Сӕ сабитӕ ӕмӕ сын сӕ устыты акодтой уацары, сӕ хӕдзӕртты ма цы баззади, уыдон дӕр сын рассывтой.

³⁰Йаков Симеон ӕмӕ Левийӕн загъта: «Фыдбылызы мӕ баппӕрстат! Сӕнӕуынон мӕ кодтат ацы бӕстӕйы цӕрджытӕн — ханаанӕгтӕ ӕмӕ периззӕгтӕн! Мӕ адӕм цъус сты, ӕмӕ адон ӕмхуызонӕй мӕ ныхмӕ куы рацӕуой, уӕд мын мӕхи дӕр ӕмӕ мӕ бинонты дӕр бабын кӕндзысты!»

³¹Симеон ӕмӕ йын Левий дзуапп радтой: «Ау, уӕдӕ нын хӕтаг сылы бынаты хъуамӕ сӕвӕрдтаиккой нӕ хойы?»