Read Хуыцауы Дзырд иронау Райдиан 38 Bible Online

Райдиан 38 - Хуыцауы Дзырд иронау bible

Райдиан 38

¹Уыцы рӕстӕг Иудӕ йе ’фсымӕртӕй байуӕрста, ацыд ӕмӕ ӕрцард адулламаг Хирайы цур.

²Уым йӕ зӕрдӕмӕ фӕцыди ханаанаг Шуайы чызг, ӕмӕ йӕ ракуырдта. Йемӕ ӕрӕмуат ис.

³Уый банхъӕлцау ис ӕмӕ лӕппу ныййардта. Иудӕ йыл сӕвӕрдта ном Ер.

⁴Шуайы чызг та ногӕй банхъӕлцау ис, лӕппу ныййардта ӕмӕ йыл сӕвӕрдта ном Онан.

⁵Уый фӕстӕ ма ныййардта иу лӕппу ӕмӕ ууыл та сӕвӕрдта ном Шела. Уыцы рӕстӕг Иудӕ уыди Кезивы.

⁶Иудӕ йӕ хистӕр фырт Ерӕн ӕрхаста ус, йӕ ном — Тамар.

⁷Фӕлӕ Ер, Иудӕйӕн йӕ зӕнӕджы хистӕр, Дунедарӕджы цӕсты фыдлӕг уыд, ӕмӕ йын Дунедарӕг йӕ цард аскъуыдта.

⁸Уӕд Иудӕ Онанӕн загъта: «Баив де ’фсымӕры — йӕ идӕдзимӕ йын бацӕр ӕмӕ цот скӕн де ’фсымӕрӕн».

⁹Онан зыдта, цот йӕхионтыл нымад нӕ уыдзысты, уый ӕмӕ-иу йе ’фсымӕры усимӕ ӕмуат куы ӕрцыди, уӕд-иу йӕ мыг зӕхмӕ ауагъта, цӕмӕй йе ’фсымӕрӕн цот ма скӕна.

¹⁰Онан цы ми кодта, уый Дунедарӕджы цӕсты фыдми уыд, ӕмӕ Дунедарӕг уымӕн дӕр йӕ цард айста.

¹¹Уӕд Иудӕ йӕ чындз Тамарӕн бафӕдзӕхста: «Цалынмӕ мӕ фырт Шела байрӕза, уӕдмӕ уал идӕдзӕй ацӕр дӕ цӕгаты». Йӕхинымӕр та загъта: «Кӕннод мын йе ’фсымӕртау ай дӕр куы амӕла». Уыйадыл Тамар йӕ цӕгатмӕ аздӕхтис.

¹²Уӕдӕй рацыди дзӕвгар рӕстӕг. Амард Иудӕйы ус, Шуайы чызг. Иудӕйӕн йӕ саударӕн бонтӕ куы фесты, уӕд йӕ адулламаг хӕлар Хираимӕ йӕ фысӕлвынджытӕм ссыди Тимнамӕ.

¹³Тамармӕ фӕхабар чындӕуыди, дӕ хицау Тимнамӕ йӕ фос ӕлвынынмӕ ссӕуы, зӕгъгӕ,

¹⁴ӕмӕ сылгоймаг йӕ идӕдзы дарӕс раласта, йӕхиуыл ӕмбӕрзӕн ӕркодта ӕмӕ афтӕмӕй Тимнамӕ фӕндагыл Енаимы кулдуары цур сбадти. Уымӕн ӕмӕ федта: Шела байрӕзти, фӕлӕ йын Тамары нӕ ракуырдтой.

¹⁵Иудӕ йӕ куы федта, уӕд ӕй рог сыл фӕхуыдта, уымӕн ӕмӕ йӕ цӕсгом ӕмбӕрзт уыди.

¹⁶Фӕндаджы былмӕ йӕм баздӕхт ӕмӕ йын загъта: «Цӕй ӕмӕ демӕ ӕмуат ӕрцӕуон». Йӕ чындз у, уый нӕ базыдта. Тамар ӕй бафарста: «Цы мын ратдзынӕ, мемӕ куы ӕрӕмуат уай, уӕд?»

¹⁷Иудӕ йын дзуапп радта: «Мӕ дзугӕй дын иу сӕныкк ӕрбарвитдзынӕн». Тамар ын афтӕ: «Цъынды мын исты ныууадз, цалынмӕ йӕ ӕрбарвитай, уӕдмӕ».

¹⁸Иудӕ йӕ бафарста: «Цы дын ныууадзон?» Загъта йын: «Дӕ мыхуырӕвӕрӕн ӕд бос ӕмӕ дӕ къухы уыцы лӕдзӕг». Радта йын сӕ ӕмӕ йемӕ ӕмуат ӕрцыд. Тамар банхъӕлцау ис.

¹⁹Иудӕйӕ куы фӕхицӕн ис, уӕд йе ’мбӕрзӕн систа ӕмӕ та скодта йӕ идӕдзы дарӕс.

²⁰Уыцы сылгоймагӕй цъынды фӕстӕмӕ райсыны тыххӕй йын Иудӕ йӕ адулламаг хӕларимӕ арвыста сӕныкк, фӕлӕ йӕ уый не ссардта.

²¹Уырдыгон адӕмы дӕр бафарста, ам, фӕндаггӕрон, цы хӕтаг сылгоймаг бадти, уый цы фӕци, зӕгъгӕ, ӕмӕ йын енаимӕгтӕ дзуапп радтой, ам, дам, хӕтаг сылгоймаг нӕ уыди.

²²Уӕд Иудӕмӕ ӕрбаздӕхт ӕмӕ йын загъта: «Нӕ йӕ ссардтон. Уырдыгон адӕм дӕр мын загътой, уыцы ран, дам, хӕтаг сылгоймаг нӕ уыд».

²³Иудӕ загъта: «Йӕхицӕн уадзӕд уӕдӕ уыцы дзауматӕ, кӕннод фӕхудинаг уыдзыстӕм. Ӕз ын сӕныкк арвыстон, фӕлӕ йӕ ды не ссардтай. Гъемӕ фӕуӕд афтӕ!»

²⁴Уымӕй иу-ӕртӕ мӕйы фӕстӕдӕр Иудӕмӕ чидӕр фӕхабар кодта: «Дӕ чындз Тамар хъахбай сыл разынди, суанг ма сывӕрджын дӕр баци». Иудӕ бафӕдзӕхста: «Ракӕнут ӕй ӕмӕ йӕ арты басудзут».

²⁵Фӕлӕ Тамары куы ракодтой, уӕд йӕ хицаумӕ барвыста: «Зӕгъут ын, ацы дзауматӕ кӕй сты, уымӕй дӕн ӕнхъӕлцау». Бафӕрсын ӕй кодта: «Ӕркӕс-ма, ацы мыхуырӕвӕрӕн ӕд бос ӕмӕ ацы лӕдзӕг кӕй сты?»

²⁶Иудӕ сӕ базыдта ӕмӕ загъта: «Тамар раст у. Рӕдигӕ чи фӕкодта, уый — мӕхӕдӕг, уымӕн ӕмӕ йӕ мӕ фырт Шелайӕн нӕ радтон». Ӕмӕ йемӕ ӕмуат никуыуал ӕрцыди.

²⁷Тамар ӕвгъӕды куы уыди, уӕд рабӕрӕг ис, фаззӕттӕ йӕм кӕй ис, уый.

²⁸Ӕмӕ арыныл куы ныллӕууыди, уӕд сӕ иуӕн йӕ къух разынд. Ӕвгъӕдгӕс сылгоймаг ӕм февнӕлдта, сырх-сырхид ӕндах ыл абаста ӕмӕ загъта: «Ай фыццаг рацыди».

²⁹Фӕлӕ уый йӕ къух фӕстӕмӕ баласта, ӕмӕ фыццаг рацыдис йе ’фсымӕр. Ӕвгъӕдгӕс загъта: «Уӕдӕ афтӕ гӕрдыс фӕндаг дӕхицӕн?» Ӕмӕ йӕ схуыдтой Парец.

³⁰Йӕ фӕдыл рацыдис йе ’фсымӕр, йӕ къухыл сырх-сырхид ӕндах, афтӕмӕй. Ном ын радтой Зарах.