Read Хуыцауы Дзырд иронау Райдиан 44 Bible Online

Райдиан 44 - Хуыцауы Дзырд иронау bible

Райдиан 44

¹Йосеф йӕ хӕдзары уынаффӕгӕнӕгӕн бафӕдзӕхста: «Ацы адӕмӕн сӕ голджыты ныккӕн, цас афӕразой, уыйас хор ӕмӕ сӕ алкӕмӕн дӕр йе ’взист йӕ голладжы нывӕр.

²Кӕстӕрӕн та-иу йӕ голладжы нывӕр, йӕ хоры аргъ ӕвзисты уӕлӕмхасӕн, ме ’взист синон дӕр». Уый сӕххӕст кодта Йосефы фӕдзӕхст.

³Куыддӕр ӕрбабон ис, афтӕ ӕфсымӕрты ауагътой ӕд хӕрджытӕ.

⁴Сахарӕй нӕма адард сты, афтӕ Йосеф бафӕдзӕхста йӕ хӕдзары уынаффӕгӕнӕгӕн: «Рӕвдз атындз уыцы лӕгты фӕдыл ӕмӕ сӕ куы баййафай, уӕд-иу сын афтӕ зӕгъ: „Хорздзинад хӕрамӕй цӕмӕн фидут? Ӕвзист нуазӕн цӕмӕн радавтат?

⁵Уый ме ’лдары синон куы у! Ме ’лдар дӕсны дӕр уымӕй фӕфӕрсы! Ӕнахъинон ми бакодтат“».

⁶Уый сӕ баййӕфта ӕмӕ сын Йосефы ныхӕстӕ рафӕзмыдта.

⁷Уыдон ын загътой: «Цӕмӕн афтӕ зӕгъы не ’лдар? Дӕ цагъартӕ ахӕм ми бакӕной, уымӕн уӕвӕн нӕй.

⁸Нӕ голджыты комы цы ссардтам, суанг дӕм уый дӕр Ханааны зӕххӕй фӕстӕмӕ куы ’рбахастам, уӕд не ’лдары хӕдзарӕй куыд хъуамӕ радавӕм ӕвзист кӕнӕ сыгъзӕрин?

⁹Уыцы синон дӕ цагъартӕй кӕмӕ разына, уый-иу амарут, иннӕтӕ та йӕ цагъартӕ суӕнт не ’лдарӕн».

¹⁰Уый загъта: «Фӕуӕд афтӕ, синон кӕмӕ разына, ӕрмӕст мӕм уый баззайдзӕни цагъарӕй, иннӕтӕ ӕназым уыдзысты».

¹¹Алчидӕр сӕ уайтагъд йӕ голлаг зӕхмӕ ӕриста ӕмӕ йын йӕ ком райхӕлдта.

¹²Йосефы хӕдзары уынаффӕгӕнӕг сын куыд хистӕрӕй басгӕрста сӕ голджытӕ, ӕмӕ синон Бениамины голладжы разынди.

¹³Уӕд ӕфсымӕртӕ фӕйнӕрдӕм арӕдывтой сӕ дарӕстӕ ӕмӕ дзы алчи йӕ уаргъ фӕстӕмӕ йӕ хӕрӕгыл сӕвӕрдта, афтӕмӕй ӕрбаздӕхтысты сахармӕ.

¹⁴Йосеф ма хӕдзары уыд, Иудӕ йӕм йе ’фсымӕртимӕ куы бацыди, уӕд. Йӕ разы ныддӕлгом сты зӕххыл.

¹⁵Йосеф сӕ бафарста: «Уый цы бакуыстат? Ӕви, мӕ хуызӕн адӕймагӕй бамбӕхсӕн ницы ис, уый нӕ зыдтат?»

¹⁶Иудӕ афтӕ: «Цы у нӕ бон зӕгъын ме ’лдарӕн? Цы сдзурӕм йӕ ныхмӕ? Цӕмӕй сраст кӕнӕм нӕхи? Хуыцау нын раргом кодта нӕ азым, ӕмӕ дын нырӕй фӕстӕмӕ, ме ’лдар, уыдзыстӕм цагъартӕ — мах дӕр ӕмӕ, синон кӕмӕ разынди, уый дӕр».

¹⁷Фӕлӕ Йосеф загъта: «Нӕ, ӕз афтӕ бакӕнон, уымӕн уӕвӕн нӕй. Синон кӕмӕ разынди, уый уыдзӕни мӕ цагъар, сымах та фарнимӕ аздӕхут уӕ фыдмӕ».

¹⁸Уӕд Иудӕ Йосефмӕ ӕввахс бацыд ӕмӕ йӕм бахатыди: «Дӕ хорзӕхӕй, ме ’лдар, дӕ цагъарӕн ныхасы бар ратт. Фараоны ӕмсӕр дӕ ӕмӕ ма смӕсты у дӕ цагъармӕ.

¹⁹Айразмӕ ме ’лдар йӕ цагъарты фарста, фыд, ӕфсымӕр ма нын ис ӕви нӕ, уымӕй.

²⁰Мах не ’лдарӕн дзуапп радтам, зӕгъгӕ, ис нын зӕронд фыд, уымӕн та ма — кӕстӕр фырт, йӕ зӕры бонты йын райгуырди. Лӕппуйӕн йе ’фсымӕр мард у, ӕмӕ ма мады зӕнӕгӕй иунӕг уый баззади. Нӕ фыд ыл ӕнувыд у.

²¹Ды дӕ цагъартӕн бафӕдзӕхстай, ӕркӕнут мӕм ӕй ӕмӕ йӕ фенон, зӕгъгӕ,

²²ӕмӕ мах не ’лдарӕн загътам, зӕгъгӕ, лӕппуйӕн йӕ фыды ныууадзын йӕ бон нӕу, уымӕн ӕмӕ йӕ куы ныууадза, уӕд йӕ фыд амӕлдзӕни.

²³Фӕлӕ ды дӕ цагъартӕн загътай: уӕ кӕстӕр ӕфсымӕр уемӕ куынӕ ’рцӕуа, уӕд мӕм уӕхи ма равдисут.

²⁴Мах ссыдыстӕм дӕ цагъармӕ, нӕ фыдмӕ, ӕмӕ йын, ме ’лдар, дӕ ныхӕстӕ рафӕзмыдтам.

²⁵Ӕмӕ та нын фӕстӕдӕр нӕ фыд куы загъта, ацӕут ӕмӕ ма иу чысыл балхӕнут хойраг, зӕгъгӕ,

²⁶уӕд ын дзуапп радтам: „Нӕй нын ацӕуӕн. Ацӕудзыстӕм ӕрмӕстдӕр уӕд, нӕ кӕстӕр ӕфсымӕр немӕ куы уа, — ӕнӕ уымӕй нӕ бон нӕу уыцы лӕгмӕ нӕхи равдисын“.

²⁷Уӕд нын дӕ цагъар, нӕ фыд, загъта: „Сымах зонут, мӕ ус мын дыууӕ фырты ныййардта, уый.

²⁸Сӕ иу мӕ куы ныууагъта, уӕд загътон, сырд ӕй аргӕвста, бӕлвырд. Ӕмӕ йӕ уӕдӕй фӕстӕмӕ нал федтон.

²⁹Ӕмӕ ныр ай дӕр мӕ цурӕй куы акӕнат ӕмӕ йыл исты куы ’рцӕуа, уӕд мӕ зӕрдӕ аскъуыйдзӕн ӕмӕ мын мӕ зӕронд къуыдыр мӕрдтӕм барвитдзыстут“.

³⁰Гъемӕ ныр дӕ цагъармӕ, нӕ фыдмӕ, куы бацӕуон, ӕмӕ, афтӕ ӕнувыд кӕуыл у, йӕ уыцы хъӕбул немӕ куынӕ разына,

³¹уӕд нӕ фыд амӕлдзӕн. Йӕ зӕрдӕ аскъуыйдзӕн, ӕмӕ афтӕмӕй дӕ цагъартӕ сӕ зӕронд фыды, дӕ цагъары, мӕрдтӕм барвитдзысты.

³²Ныр ацы лӕппуйы тыххӕй та нӕ фыдӕн дзуапдӕттӕг ӕз дӕн, дӕ цагъар. Афтӕ йын загътон: „Фӕстӕмӕ дӕм ӕй куынӕ ’рбакӕнон, уӕд цӕрӕнбонты азымджын уыдзынӕн дӕ разы“.

³³Гъемӕ, дӕ хорзӕхӕй, бар ратт, ӕмӕ ӕз, дӕ цагъар, ацы лӕппуйы бӕсты ме ’лдармӕ баззайон, уый та йе ’фсымӕртимӕ ацӕуӕд.

³⁴Уымӕн ӕмӕ лӕппу мемӕ куынӕ уа, уӕд куыд ӕрлӕудзынӕн нӕ фыды раз? Уый удхармӕ кӕсын нӕ бауыдзӕни мӕ бон».