Read Хуыцауы Дзырд иронау Райдиан 46 Bible Online

Райдиан 46 - Хуыцауы Дзырд иронау bible

Райдиан 46

¹Израил йе ’ппӕт исбонимӕ сыстади Ханааны зӕххӕй. Беер-Шевӕмӕ куы бахӕццӕ ис, уӕд йӕ фыд Исаакы Хуыцауӕн ӕрхаста нывӕндтӕ.

²Ӕхсӕвы йӕм Хуыцау ӕргом рацыди ӕмӕ йӕм фӕсидти: «Йаков! Йаков!» Уый дзуапп радта: «Хъусын дӕм».

³Хуыцау загъта: «Ӕз Хуыцау дӕн, дӕ фыды Хуыцау. Ма тӕрс, цу Мысырмӕ — уым дӕуӕй рантысын кӕндзынӕн разагъды адӕм.

⁴Мысырмӕ дӕр Мӕхӕдӕг ацӕудзынӕн демӕ, фӕстӕмӕ дӕр дӕ Мӕхӕдӕг ракӕндзынӕн уырдыгӕй. Йосеф дын йӕхи къухӕй ӕрӕхгӕндзӕни дӕ цӕстытӕ».

⁵Ӕмӕ Йаков рацыди Беер-Шевӕйӕ. Фараон кӕй сӕрвыста, уыцы уӕрдӕтты Израилы фырттӕ аластой сӕ фыд Йаковы, сӕ сабитӕ ӕмӕ сӕ устыты.

⁶Ханааны сӕм цы фос ӕмӕ цы мулк ӕрӕмбырд, уыимӕ Йаков ӕмӕ йӕ байзӕддаг ӕрцыдысты Мысырмӕ.

⁷Уырдӕм йемӕ ӕркодта йӕ цот ӕмӕ йӕ цоты цоты — йе ’ппӕт байзӕддӕгты.

⁸Мӕнӕ Израилы байзӕддӕгтӕ, Мысырмӕ чи ӕрцыди, уыдон — Йаков ӕмӕ йӕ фырттӕ: Рувим, йӕ зӕнӕджы хистӕр.

⁹Рувимы фырттӕ: Ханох, Паллу, Хецрон, Карми.

¹⁰Симеоны фырттӕ: Йемуел, Йамин, Охад, Йахин, Цохар, Саул — йӕ ханаанаг усы лӕппу.

¹¹Левийы фырттӕ: Гершон, Кехат, Мерари.

¹²Иудӕйы фырттӕ: Ер, Онан, Шела, Парец, Зарах. Ӕцӕг, Ер ӕмӕ Онан амардысты Ханааны зӕххыл. Парецы фырттӕ: Есром ӕмӕ Хамул.

¹³Иссахары фырттӕ: Тола, Пувва, Иов, Шимрон.

¹⁴14-15 Зевулоны фырттӕ: Серед, Елон, Йахлеел. Йаковӕн уыди чызг дӕр — Динӕ. Адон сты Леайы цот, Йаковӕн Паддан-Арамы кӕй ныййардта, уыдон. Лӕппуйӕ, чызгӕй ӕдӕппӕтӕй — ӕртындӕс ӕмӕ ссӕдз.

¹⁶Гады фырттӕ: Цифион, Хагги, Шуни, Ецбон, Ери, Ароди, Арели.

¹⁷Асиры фырттӕ: Имна, Ишва, Ишви, Бриа; сӕ хо — Серах. Бриайы фырттӕ: Хевер ӕмӕ Малкиел.

¹⁸Адон сты, Лаван йӕ чызг Леайӕн кӕй радта, уыцы унӕут Зилпайы цот, уый Йаковӕн кӕй ныййардта, уыдон. Ӕдӕппӕтӕй — ӕхсӕрдӕс.

¹⁹Йаковы ус Рахелы лӕппутӕ: Йосеф ӕмӕ Бениамин.

²⁰Йосефӕн Мысыры зӕххыл райгуырдысты Менассиа ӕмӕ Ефрем, Оны сауджын Поти-Перы чызг Аснат ын кӕй ныййардта, уыдон.

²¹Бениамины фырттӕ: Бела, Бехер, Ашбел, Гера, Нааман, Ехи, Рош, Муппим, Хуппим, Ард.

²²Адон сты Рахел ӕмӕ Йаковы цоты цот. Ӕдӕппӕтӕй — цыппӕрдӕс.

²³Даны фырт Хушим.

²⁴Неффалимы фырттӕ: Йахцеел, Гуни, Йецер, Шиллем.

²⁵Адон сты, Лаван йӕ чызг Рахелӕн кӕй радта, уыцы унӕут Билхайы цот, уый Йаковӕн кӕй ныййардта, уыдон. Ӕдӕппӕтӕй — авд.

²⁶Йаковимӕ Мысырмӕ чи ӕрцыди, йӕ уыцы байзӕддӕгтӕ, йӕ фыртты устыты нӕ нымайгӕйӕ, ӕдӕппӕтӕй уыдысты ӕхсӕз ӕмӕ ӕртиссӕдзы.

²⁷Йосефы фырттӕ та, Мысыры йын чи райгуырди, уыдон, уыдысты дыууӕ. Афтӕмӕй Йаковы мыггаг, Мысырмӕ чи ӕрцыди, уыдон, ӕдӕппӕтӕй уыдысты дӕс ӕмӕ ӕртиссӕдзы.

²⁸Йаков Йосефмӕ арвыста Иудӕйы, цӕмӕй уый йӕ размӕ рацӕуа Гошенмӕ. Ӕмӕ Йаков йӕ хӕдзаронтимӕ Гошены зӕхмӕ куы бахӕццӕ ис,

²⁹уӕд Йосеф дӕр сифтыгъта йӕ уӕрдон ӕмӕ ссыди Гошенмӕ, йӕ фыд Израилмӕ. Йӕ цуры куы балӕууыди, уӕд йе ’фцӕджы ныттыхст ӕмӕ бирӕ фӕкуыдта.

³⁰Израил Йосефӕн загъта: «Сӕрӕгасӕй ма дӕ кӕм федтон, уым ныр разы дӕн амӕлыныл дӕр».

³¹Йосеф йе ’фсымӕртӕн ӕмӕ йӕ фыды иннӕ хӕдзаронтӕн загъта: «Цӕуон фараонмӕ ӕмӕ йын фехъусын кӕнон: „Ханааны зӕххӕй мӕм ӕрцыдысты ме ’фсымӕртӕ ӕмӕ мӕ фыды ӕппӕт хӕдзаронтӕ.

³²Фыййау адӕм сты, фосдарджытӕ. Семӕ ӕртардтой сӕ лыстӕг фос ӕмӕ се стурвос, ӕрхастой се ’ппӕт исбон дӕр“.

³³Фараон уӕм куы фӕдзура ӕмӕ уӕ куы бафӕрса, цы куыстгӕнӕг стут, зӕгъгӕ,

³⁴уӕд-иу ын раттут ахӕм дзуапп: „Мах, дӕ цагъартӕ, нӕ фыдӕлтау не ’взонгӕй нырмӕ фосдарджытӕ стӕм“. Ӕмӕ уӕд Гошены зӕххыл баззайдзыстут, уымӕн ӕмӕ мысырӕгтӕ фыййӕуттыл былысчъил кӕнынц».