Read Хуыцауы Дзырд иронау Райдиан 49 Bible Online

Райдиан 49 - Хуыцауы Дзырд иронау bible

Райдиан 49

¹Йаков йӕ фырттӕм басидт ӕмӕ сын загъта: «Ӕрбамбырд ут, ӕмӕ уын радзурон, фидӕны уӕм цы кӕсы, уый.

²Ӕртымбыл ут, ӕрбайхъусут, Йаковы фырттӕ, ӕрбайхъусут уӕ фыд Израилмӕ.

³Рувим, ды мӕ хистӕр зӕнӕг, мӕ тых дӕ, мӕ нӕлгоймаджы хъаруйы фыццаг ӕнтыст ды дӕ, дӕ кад, дӕ хъомысӕн ӕмбал нӕй.

⁴Ивылд донау абухыс ды, ӕмӕ нӕ уыдзӕн хистӕры кад дӕу: дӕ фыды уатмӕ ӕнӕфсармӕй схызтӕ, фӕчъизи мын кодтай мӕ хуыссӕн.

⁵Симеон ӕмӕ Левий — ӕфсымӕртӕ: сӕ кӕрдтӕ — тыхмийы хӕцӕнгӕрзтӕ.

⁶Нӕ уыдзынӕн ӕз уыдонимӕ ’мдзӕхдон, се ’мбырдмӕ нӕ бавӕрдзынӕн къах, — куы смӕсты вӕййынц — адӕмы цӕгъдынц, сӕ хъалӕй уыдон галтӕн сӕ счъилы нуӕрттӕ адзӕнгӕл кӕнынц!

⁷Ӕлгъыст фӕуӕд сӕ уыраугӕ маст, ӕлгъыст фӕуӕд сӕ хъӕхъхъаг уаг! Ӕз сӕ Йаковы фыртты ’хсӕн ныххӕлиу кӕндзынӕн, ӕз сӕ Израилы фыртты ’хсӕн байтаудзынӕн!

⁸Ӕфсымӕртӕ дӕ стаудзысты, Иудӕ! Йӕ бӕрзӕйӕ ӕрцахсдзынӕ фыдгулы; ныллӕг дын кувдзысты дӕ фыды фырттӕ.

⁹Иудӕ — домбайы лӕппын; дӕ амӕттагыл уӕлахиз кӕныс, мӕ фырт. Уый йӕхи ӕруадзы домбайау, мадӕл домбайау зӕххыл ӕрхуыссы — чи йӕ бауӕнддзӕн бахъыгдарын?

¹⁰Иудӕ паддзахы лӕдзӕгӕй ӕнӕхай нӕ фӕуыдзӕн, йӕ байзӕддаг паддзахы бадӕнӕй нӕ фӕхаудзӕн, цалынмӕ, паддзахы бартӕ Кӕмӕ сты, Уый не ’рцӕуа, ӕмӕ адӕмтӕ Йӕ дӕлбар не суой, уӕдмӕ.

¹¹Иудӕ йӕ къӕлӕуы сӕнӕфсиры зӕнгыл бӕтдзӕнис, талаты хуыздӕрыл бӕтдзӕни йӕ къӕлӕуы. Ӕнхъӕвздзӕн йӕ пӕлӕз сӕнӕфсиры доны, сӕнӕфсиры туджы ӕнхъӕвздзӕни йӕ дарӕс.

¹²Йӕ цӕстытӕ уымӕн сты сау сӕнӕй саудӕр, йӕ дӕндӕгтӕ уымӕн ӕхсырӕй сты урсдӕр.

¹³Зевулон! Ӕввахс ӕрцӕрдзӕни фурдмӕ, ӕмӕ йӕ бӕстӕ наулӕууӕн суыдзӕн. Йӕ арӕнтӕ ӕххӕсдзысты Сидонмӕ.

¹⁴Иссахар — фидарстӕг хӕрӕг, хуыссы йӕ хордзенты астӕу.

¹⁵Уый федта, йӕ улӕфӕн бынат куыд хорз у, бӕллиццаг кӕй у уыцы зӕхх, ӕмӕ йе уӕхск бадардта уаргъмӕ — цагъары куыстыл сразы ис.

¹⁶Дан, тӕрхоны лӕг дӕ адӕмӕн уыдзынӕ — Израилы хӕдзарвӕндӕгтӕй иуӕн.

¹⁷Хилӕгау уыдзӕни Дан фӕндагыл, калмау уыдзӕни уый развӕдыл: бӕхы счъилыл куы фӕхӕцы, уӕд барӕг асхъиуы фӕстӕрдӕм.

¹⁸Дунедарӕг, фервӕзын кӕн, дарын Дыл мӕ зӕрдӕ!

¹⁹Гадмӕ абырджыты бардз лӕбурдзӕни, фӕлӕ сӕ уый зӕйау йӕ разӕй ахӕсдзӕн.

²⁰Асиры бӕркадӕн ныккӕнӕн нӕ уыдзӕни, аккаг хӕлц паддзахӕн хӕсдзӕни.

²¹Неффалим — сӕрибар хъуаз, рӕсугъд сты йӕ лӕппынтӕ.

²²Йосеф — зад сӕнӕфсиры тала, зад сӕнӕфсиры тала суадоны сӕрмӕ. Йӕ къабузтӕ сисыл хилынц.

²³Маст ын кодтой ӕмӕ йӕ фатӕй ӕхстой, тох амадтой йемӕ ӕрдынджынтӕ.

²⁴Фӕлӕ йӕ фат ӕмӕ йе ’рдын ӕндӕрхуызон дӕр нӕ фесты, йӕ цонджы хъаруйыл ын бафтыдта Йаковы Хъомысджын Хуыцау. Уый фӕрцы сдӕ Израилӕн йӕ фыййау, йӕ ныфсы мӕсыг ды.

²⁵Дӕ фыды Хуыцау аудӕд дӕуыл, Ӕппӕтхъомысы арфӕ дыл ӕмбӕлӕд: уӕларвы ’ртах ӕмӕ, зӕххы бын цы дон ис, уымӕй, дӕ хуымтӕ донӕфсӕст цы ’ййафой, дӕ байзӕддаг бирӕ-бирӕ цы бауа.

²⁶Дӕ фыды арфӕтӕ рагон хӕхтӕй — бӕрзонддӕр, ӕнусон къуылдымтӕй — уӕлдӕр! Ӕппӕтӕй дӕр схайджын уӕд Йосеф, — ӕфсымӕрты ’хсӕн уый куы у ӕвзӕрст.

²⁷Бениамин — тугдзых бирӕгъ, уый райсомӕй йӕ тӕлӕттаг хӕры, изӕры та йӕ амӕттаджы скъуыны».

²⁸Гъе уыдон сты Израилы дыууадӕс хӕдзарвӕндаджы. Гъе ахӕм арфӕтӕ сын ракодта сӕ фыд, алкӕмӕн дӕр — сӕрмагондӕй.

²⁹Йаков йӕ фырттӕн бафӕдзӕхста: «Ныр ӕз мӕрдтӕм, мӕ фыдӕлты размӕ, цӕуинаг дӕн, ӕмӕ-иу мӕ бавӕрут, хеттаг Ефроны быдыры цы лӕгӕт ис, уым.

³⁰Лӕгӕт ис Ханааны зӕххыл, Мамрейы цур, кӕддӕр Авраам зиан ӕвӕрынӕн хеттаг Ефронӕй кӕй балхӕдта, уыцы Махпелайы быдыры.

³¹Уым бавӕрдтой Авраам ӕмӕ йӕ ус Саррӕйы, уым бавӕрдтой Исаак ӕмӕ йӕ ус Ревеккӕйы дӕр, ӕз та дзы бавӕрдтон Леайы.

³²Уыцы быдыр ӕд лӕгӕт хеттӕгтӕй ӕлхӕд у».

³³Йаков Йӕ фырттӕн уыцы фӕдзӕхстытӕ куы загъта, уӕд йӕ хуыссӕнуаты йӕхи ауагъта ӕмӕ уыйадыл йӕ уд систа, йӕ фыдӕлтӕм ацыд.