Read Хуыцауы Дзырд иронау 2 Паддзахӕдтӕ 1 Bible Online

2 Паддзахӕдтӕ 1 - Хуыцауы Дзырд иронау bible

2 Паддзахӕдтӕ 1

¹Саул фӕмард ис. Давид амалекӕгты ныддӕрӕн кодта ӕмӕ дыууӕ боны Циклагы баззади.

²Ӕртыккаг бон Саулы рӕсӕнуатӕй уырдӕм иу лӕг ӕрбацыди, йӕ дарӕс пырх, йӕ сӕр та рыгӕй нал зынд, афтӕмӕй. Давидмӕ бацыди ӕмӕ йын ныллӕг акуывта.

³Давид ӕй бафарста: «Кӕцӕй ӕрбацыдтӕ?» Уый йын дзуапп радта: «Израилы рӕсӕнуатӕй ралыгътӕн».

⁴Давид ын загъта: «Цы ’рцыди? Хабар мын бӕлвырд радзур». Ӕмӕ уый радзырдта: «Адӕм лидзӕг фесты тохы быдырӕй, цӕфтӕ ӕмӕ дзы мӕрдтӕ бирӕ уыд; фӕмард сты Саул ӕмӕ йӕ фырт Ионатан дӕр».

⁵Уӕд Давид хабархӕссӕг лӕппуйы бафарста: «Цӕмӕй зоныс ды Саул ӕмӕ йӕ фырт Ионатаны амӕлӕты хабар?»

⁶Лӕппу загъта: «Ӕнӕнхъӕлӕджы бафтыдтӕн Гилбоайы хохмӕ ӕмӕ федтон, Саул йӕ арцыл куыд ӕрӕнцой кодта ӕмӕ йӕм тохуӕрдӕттӕ ӕмӕ бӕхджынтӕ куыд баввахс сты, уый.

⁷Саул фӕстӕмӕ фӕкасти ӕмӕ мӕ куы ауыдта, уӕд мӕм фӕдзырдта. Ӕз ын загътон: „Хъусын дӕм“.

⁸Уый мӕ бафарста: „Чи дӕ?“ Дзуапп ын радтон: „Амалекаг“.

⁹Уӕд мын афтӕ зӕгъы: „Рауай-ма, амар мӕ, науӕд саутухӕны бафтыдтӕн, мӕ уд та ма нырма мӕ мидӕг ис“.

¹⁰Ӕз ӕм бацыдтӕн ӕмӕ йӕ амардтон — уыдтон, нал фервӕздзӕни, уый. Йӕ сӕрӕй йын паддзахы худ систон, йӕ цонгдарӕн ын йӕ цонгӕй рафтыдтон ӕмӕ сӕ мӕнӕ ме ’лдармӕ ӕрбахастон».

¹¹Уӕд Давид йӕ дарӕсмӕ фӕлӕбурдта ӕмӕ фӕйнӕрдӕм арӕдывта; афтӕ бакодтой, йемӕ чи уыди, уыдон дӕр.

¹²Ӕмӕ хъарджытӕ кодтой, дзынӕзтой ӕмӕ ком дардтой изӕрмӕ, карды амӕттаг чи баци, уыдоныл: Саулыл, Саулы фырт Ионатаныл ӕмӕ Дунедарӕджы ӕфсадыл, Израилы адӕмыл.

¹³Давид хабархӕссӕджы бафарста: «Кӕцӕй дӕ?» Лӕппу йын дзуапп радта: «Ӕрцӕуӕггаджы фырт дӕн, амалекаджы».

¹⁴Уӕд ын Давид зӕгъы: «Цы ныфсӕй систай дӕ къух, Дунедарӕг кӕй байсӕрста, уымӕ?»

¹⁵Ӕмӕ йӕ дӕлдӕртӕй иуӕн бардзырд радта: «Рацу, амар ӕй». Ӕмӕ йӕ уый амардта.

¹⁶Давид загъта: «Дӕхи аххосӕй ӕрцыди дӕ мӕлӕт, уымӕн ӕмӕ дӕхӕдӕг загътай, Дунедарӕджы байсӕрсты амардтон, зӕгъгӕ».

¹⁷Давид Саул ӕмӕ йӕ фырт Ионатаныл скодта ацы хъарӕг,

¹⁸ныффӕдзӕхста иудейӕгтӕн, цӕмӕй йӕ сахуыр кӕной. Рӕстӕвзары Чиныджы дӕр фыст ис:

¹⁹«Дӕ фидауц, Израил, дӕ бӕрзӕндтыл байсӕфт. Ӕрхаудысты — оххай! — бӕгъатыртӕ.

²⁰Ма йӕ ской кӕнут Гаты, ма йӕ ахъӕр кӕнут Ашкелоны уынгты, цӕмӕй филистимаг чызджытӕ ма бацин кӕной — ӕнӕсунӕтты чызджытӕ ма ферайой.

²¹О Гилбоайы хӕхтӕ! Ӕртӕх дӕр уыл мауал ӕрбада, къӕвда дӕр уыл мауал ӕрцӕуа, уӕ хуымтӕ тыллӕг мауал феной — уым баззад дзӕгъӕлӕй ӕхсарджынты уарт — Саулы ӕнӕсӕрст уарт уым ис!

²²Ионатаны фат никуы фездӕхти, Саулы кард никуы баззади, знаджы тугӕй нӕ сахуырсгӕйӕ, йӕ фиуӕй йын нӕ ацаходгӕйӕ[1].

²³Уарзон ӕмӕ цытджын Саул! Уарзон ӕмӕ цытджын Ионатан! Сӕ удӕгасӕй дӕр кӕрӕдзийӕ нӕ хицӕн кодтой, ӕмӕ сӕ мӕлӕт дӕр нӕ ахицӕн кодта. Уыдон цӕргӕсӕй цӕрдӕгдӕр уыдысты, уыдон домбайӕ домбайдӕр уыдысты!

²⁴Кӕут Саулыл, Израилы чызджытӕ! — зынаргъ даритӕй уӕ уый фӕлыста, зӕрин фӕлындӕнтӕ уын уый хаста!

²⁵Ӕрхаудысты — оххай! — бӕгъатыртӕ. Фӕмард ис хъӕбатырӕй Ионатан.

²⁶Куыд зын у ӕнӕ дӕу, ме ’фсымӕр Ионатан! Ды мӕ ахсджиаг уыдтӕ мӕнӕн; дӕ уарзт мын сылгоймаджы уарзтӕй зынаргъдӕр уыд.

²⁷Ӕрхаудысты — оххай! — бӕгъатыртӕ, бабын сты хӕстон хотыхтӕ!»