Read Хуыцауы Дзырд иронау 2 Паддзахӕдтӕ 11 Bible Online

2 Паддзахӕдтӕ 11 - Хуыцауы Дзырд иронау bible

2 Паддзахӕдтӕ 11

¹Иннӕ уалдзӕг, паддзӕхты хӕстон балцыты афон, Давид йӕ дӕлдӕртӕ ӕмӕ ӕппӕт израилӕгтимӕ Йоавы арвыста аммонӕгты сӕйраг сахар Раввамӕ, цӕмӕй йыл ӕртыхсой ӕмӕ аммонӕгты ныддӕрӕн кӕной. Ныр Давид йӕхӕдӕг та Йерусалимы баззад.

²Иуахӕмы изӕрӕрдӕм Давид, ӕрулӕфыны фӕстӕ йӕ уатӕй куы растади, уӕд тезгъо кодта йӕ галуаны уӕлхӕдзар ӕмӕ уырдыгӕй иу сылгоймаджы йӕхи найгӕ федта. Сылгоймаг тынг рӕсугъд уыди,

³ӕмӕ Давид арвыста, чи у, уый сбӕрӕг кӕнынмӕ. Загътой йын: «Уый Вирсави у, Елиамы чызг, хеттаг Уриайы бинойнаг».

⁴Давид арвыста йӕ дӕлдӕрты, ӕрбакӕнут ӕй, зӕгъгӕ. Уый ӕрбацыди, ӕмӕ Давид йемӕ ӕрӕмуат ис (сылгоймаг йӕ чъизийӕ уый хӕдразмӕ ссыгъдӕг ис), ӕмӕ уый фӕстӕ Вирсави йӕ хӕдзармӕ аздӕхт.

⁵Сылгоймаг басывӕрджын ис ӕмӕ Давидмӕ фӕхабар кодта, сывӕрджын дӕн, зӕгъгӕ.

⁶Давид арвыста Йоавмӕ: «Рарвит мӕм хеттаг Уриайы». Йоав ӕм ӕй рарвыста.

⁷Уриа куы ӕрбахӕццӕ, уӕд ӕй Давид бафарста Йоавы ӕмӕ ӕфсады тыххӕй, стӕй хӕсты хабӕрттӕй.

⁸Уый фӕстӕ йын загъта: «Дӕ хӕдзармӕ ныццу ӕмӕ дӕ фӕллад суадз». Уриа паддзахы къӕсӕрӕй рахызти, ӕмӕ йын йӕ фӕдыл паддзахы номӕй хуын рахастой.

⁹Фӕлӕ Уриа йӕ хӕдзармӕ нӕ ацыд. Бахсӕвиуат кодта паддзахы галуаны къӕсӕрмӕ, йӕ паддзахы дӕлдӕртимӕ.

¹⁰Давидӕн фехъусын кодтой: «Йӕ хӕдзармӕ нӕ ацыд Уриа». Давид ын загъта: «Фӕндагыл куы уыдтӕ, уӕд дӕ хӕдзармӕ цӕуылнӕ ныццӕуыс?»

¹¹Уриа йын дзуапп радта: «Фидыды Чырын, стӕй Израил ӕмӕ Иудӕйы ӕфсад цатырты куы сты, мӕ хицау Йоав ӕмӕ мӕ паддзахы хӕстонтӕ тыгъд быдыры рӕсӕнуаты куы бадынц, уӕд ӕз мӕ хӕдзармӕ куыд бацӕуон, куыд хӕрон ӕмӕ куыд нуазон ӕмӕ мӕ усы фарсмӕ куыд хуыссон? Сомы кӕнын Хуыцауӕй ӕмӕ дӕуӕй, ӕз уый нӕ бакӕндзынӕн».

¹²Давид ын загъта: «Уӕдӕ ам баззай абон, райсом дӕ арвитдзынӕн». Ӕмӕ Уриа уыцы бон Йерусалимы баззад. Иннӕ бон ӕй

¹³Давид йӕ фынгмӕ фӕхуыдта, ӕмӕ Уриа бахордта ӕмӕ бануӕзта йемӕ. Давид ӕй фӕрасыг ӕй кодта, фӕлӕ та изӕрӕй Уриа рацыди ӕмӕ йӕ паддзахы дӕлдӕртимӕ бахсӕвиуат кодта, йӕ хӕдзармӕ нӕ ацыд.

¹⁴Райсомӕй Давид Йоавмӕ фыстӕг ныффыста ӕмӕ йӕм ӕй Уриайӕн арвыста.

¹⁵Фыстӕджы фӕдзӕхста: «Тох карздӕр кӕм уа, уыцы ран сӕвӕрут Уриайы, ӕмӕ дзы уӕхӕдӕг уӕхи дарддӕр айсут, цӕмӕй фӕмард уа».

¹⁶Йоав зыдта, фыдгулы ӕхсарджындӕр хӕстонтӕ кӕм сты, уый ӕмӕ, сахарыл куы ӕрхъула кодта, уӕд Уриайы тӕккӕ уыцы ран слӕууын кодта.

¹⁷Сахары адӕм Йоавы ныхмӕ хӕцынмӕ куы ралӕууыдысты, уӕд Давиды хӕстонтӕй бирӕ фӕмард, фӕмард ис хеттаг Уриа дӕр.

¹⁸Йоав хабаргӕнӕджы арвыста Давидмӕ, цӕмӕй йын хӕсты ӕппӕт цауты тыххӕй фехъусын кӕна.

¹⁹Бафӕдзӕхста йын: «Паддзахӕн-иу хӕсты хабӕрттӕ иууылдӕр радзур.

²⁰Чи зоны ӕмӕ паддзах рамӕсты уа ӕмӕ дын зӕгъа: „Сахармӕ бырсын цӕмӕн райдыдтат? Нӕ йӕ зыдтат, сисы сӕрӕй уӕ цӕвдзысты, уый?

²¹Иеруббаалы фырт Авимелех дӕр Тевецы афтӕмӕй нӕ фӕмард? Цыдӕр сылгоймаг ыл сисы сӕрӕй куыройы фыды къӕртт ӕрӕппӕрста ӕмӕ йӕ амардта! Сисмӕ хӕстӕг цӕмӕн бацыдыстут?“ Ды-иу ын дзуапп ратт: „Дӕ цагъар хеттаг Уриа дӕр фӕмард“».

²²Ӕрвыст лӕг ацыди Давидмӕ, ӕмӕ йын Йоав цыдӕриддӕр бафӕдзӕхста, уыдон ын радзырдта.

²³Загъта паддзах Давидӕн: «Уыцы адӕм ныл тых кӕнын райдыдтой, ӕмӕ мах дӕр дӕлвӕзы ’рдӕм фӕфӕстӕмӕ кодтам, фӕлӕ сӕ стӕй суанг сахары кулдуары онг батардтам.

²⁴Уӕд нӕ ӕрдынджынтӕ сисы сӕрӕй фатӕй ӕхсын райдыдтой, ӕмӕ паддзахы цагъартӕй бирӕ фӕмард ис. Нал ис дӕ цагъар хеттаг Уриа дӕр».

²⁵Давид ӕрвыст лӕгӕн загъта: «Уӕдӕ зӕгъ Йоавӕн: „Цы ’рцыди, уый тыххӕй дӕхимӕ ма ныхъхъус. Цирхъ, кӕй йӕ фӕнды, уый бабын кӕны. Фӕкарздӕр кӕн дӕ тох ӕмӕ уыцы сахар ныффалгӕрон кӕн“. Афтӕ йын фӕфидар кӕн йӕ зӕрдӕ».

²⁶Уриайы ус фехъуыста, йӕ мой кӕй фӕмард, уый ӕмӕ йыл фӕкуыдта.

²⁷Йӕ саударӕн бонтӕ куы фесты, уӕд ӕм Давид арвыста ӕмӕ йӕ ӕрбакодта йӕ хӕдзармӕ. Сылгоймаг сси йӕ бинойнаг ӕмӕ йын ныййардта фырт. Фӕлӕ Давиды ми Дунедарӕджы цӕсты фыдракӕнд уыди.