Read Хуыцауы Дзырд иронау 2 Паддзахӕдтӕ 13 Bible Online

2 Паддзахӕдтӕ 13 - Хуыцауы Дзырд иронау bible

2 Паддзахӕдтӕ 13

¹Фӕстӕдӕр ӕрцыди ахӕм хабар. Давиды фырт Авессаломӕн уыди хо, тынг рӕсугъд чызг, йӕ ном — Тамар, ӕмӕ йӕ Давиды ӕндӕр фырт, Амнон, бауарзта.

²Цыма рынчын у, афтӕ удхар кодта Амнон йӕ хо Тамары уарзондзинады азарӕй, уымӕн ӕмӕ уый нырма ӕнӕцыд чызг уыди, ӕмӕ йӕм куыдӕй баххӕссыдаид, уымӕн ницы амал ардта.

³Амнонӕн уыд иу хӕлар, йӕ ном — Йехонадав, Давиды ӕфсымӕр Шимайы фырт, тынг хинӕйдзаг ӕмӕ ӕрхъуыдыджын лӕг.

⁴Иу хатт Амнонӕн афтӕ: «Цы кӕныс, паддзахы фырт, бонӕй-бонмӕ куы тайыс? Нӕ мын ӕй схъӕр кӕндзынӕ?» Амнон ын дзуапп радта: «Ме ’фсымӕр Авессаломы хо Тамары бауарзтон».

⁵Йехонадав ын загъта: «Дӕ сынтӕджы ӕрхуысс ӕмӕ рынчынӕфсон скӕн. Дӕ фыд дӕм бӕрӕггӕнӕг куы ӕрбацӕуа, уӕд-иу ын зӕгъ: „Мӕ хо Тамар мӕм ӕрбацӕуӕд ӕмӕ мӕм фӕкӕсӕд — мӕ разы мын хӕринаг скӕнӕд ӕмӕ мын йӕхи къухӕй бахӕрын кӕнӕд“».

⁶Амнон йӕ сынтӕджы ӕрхуыссыди ӕмӕ йӕхи рынчынӕфсон скодта. Паддзах ӕм бӕрӕггӕнӕг куы ӕрбацыд, уӕд ын Амнон загъта: «Ӕрбарвит-ма мӕм мӕ хойы, Тамары, ӕмӕ мын ам мӕ цуры иу дыууӕ лауасийы афыцӕд, ӕмӕ йын йӕхи къухӕй саходон».

⁷Давид Тамармӕ йӕ хӕдзармӕ барвыста, цӕмӕй йын зӕгъой: «Де ’фсымӕр Амнонмӕ бауай ӕмӕ йын хӕринаг скӕн».

⁸Тамар бацыди йе ’фсымӕр Амноны хӕдзармӕ ӕмӕ йӕ сынтӕджы хуысгӕйӕ баййӕфта. Тамар ын йӕ цӕсты раз хыссӕ скодта ӕмӕ йын дзы гуылтӕ афыхта.

⁹Тебӕ райста, фынг ӕрӕвӕрдта, фӕлӕ уый хӕрын нӕ куымдта. Амнон загъта: «Иууылдӕр мӕ цурӕй ацӕуӕнт». Ӕмӕ иууылдӕр ацыдысты йӕ цурӕй.

¹⁰Ӕмӕ уӕд Амнон Тамарӕн загъта: «Мидӕггаг уатмӕ мын бахӕсс хӕринаг, ӕмӕ уым дӕхи къухӕй бахӕрдзынӕн». Тамар йӕ конд гуылтӕ райста ӕмӕ сӕ йе ’фсымӕр Амнонӕн мидӕггаг уатмӕ бахаста.

¹¹Куыддӕр ӕм, бахӕрын ын кӕнон, зӕгъгӕ, хӕстӕг бацыди, афтӕ йӕм Амнон фӕлӕбурдта ӕмӕ загъта: «Рацу-ма, мӕ хо, цӕй, ӕмӕ мемӕ ӕрхуысс».

¹²Фӕлӕ йын уый загъта: «Нӕ, ме ’фсымӕр, ма мӕ фӕхудинаг кӕн, Израилы афтӕ нӕ вӕййы. Уыцы ӕррадзинад ма бакӕн.

¹³Цы фӕуыдзынӕн мӕ худинагимӕ? Дӕхи дӕр дын фӕндырты фӕцӕгъддзысты Израилы. Уый фӕлтау паддзахимӕ баныхас кӕн, ӕмӕ дын дӕ фӕндоныл сразы уыдзӕн, дӕуӕн мӕ ратдзӕн».

¹⁴Амнон ницӕмӕ ӕрдардта Тамары ныхӕстӕ, тыххӕй йыл ныххӕцыд ӕмӕ йӕ фӕхудинаг кодта.

¹⁵Уый фӕстӕ йын Тамар афтӕ ӕнӕуынон фестади, ӕмӕ йе ’нӕуынондзинад, йӕ уарзт цы уыди, уымӕй фӕтыхджындӕр ис. Загъта йын: «Сыст ӕмӕ ацу ардыгӕй!»

¹⁶Тамар ын дзуапп радта: «Нӕ, ме ’фсымӕр! Мӕн асурын дын, фыццаг цы фыдми бакодтай, уымӕй ноджы ӕвирхъаудӕр у». Фӕлӕ йӕм Амнон нӕ байхъуыста.

¹⁷Йӕ дӕлдӕрмӕ фӕдзырдта ӕмӕ йын загъта: «Федде-ма йӕ кӕн мӕ цурӕй ӕмӕ йын йӕ фӕдыл дуар ахгӕн».

¹⁸Тамары уӕлӕ уыди, паддзахы ӕнӕцыд чызджытӕ-иу кӕй дардтой, ахӕм хуызджын дарӕс. Амноны дӕлдӕр чызджы федде кодта ӕмӕ йын йӕ фӕдыл дуар рахгӕдта.

¹⁹Тамар йӕ сӕрыл фӕнык байзӕрста, йӕ хуызджын дарӕс ӕрыскъуыдтӕ кодта ӕмӕ, йӕ къухтӕй йӕ сӕрыл хӕцгӕ, хъӕрӕй дзынӕзта, афтӕмӕй цыди.

²⁰Йе ’фсымӕр Авессалом загъта: «Де ’фсымӕр Амнон дын бакодта уыцы ми, ӕмӕ фӕлтау дӕ дзыхыл хӕц, мӕ хо. Уый тыххӕй маст ма кӕн». Ӕмӕ Тамар, йӕхи ӕмбӕхсгӕ, царди йе ’фсымӕр Авессаломы хӕдзары.

²¹Хабар фехъусгӕйӕ, паддзах Давид тынг смӕсты ис, фӕлӕ йӕ фырт Амноны зӕрдӕхудты нӕ бацыди, уымӕн ӕмӕ йӕ фыццаг зӕнӕг уыд ӕмӕ йӕ уарзта.

²²Авессалом та Амнонӕн хорзӕй дӕр ӕмӕ ӕвзӕрӕй дӕр ницы загъта, уымӕн ӕмӕ йын ӕнӕуынон сси, йӕ хо Тамары йын кӕй фӕхудинаг кодта, уый тыххӕй.

²³Дыууӕ азы фӕстӕ Ефремы сахармӕ хӕстӕг, Баал-Хацоры, Авессаломы фыстӕ куы ӕлвыдтой, уӕд Авессалом паддзахы фырттӕм се ’ппӕтмӕ дӕр фӕдзырдта.

²⁴Паддзахмӕ дӕр бацыди ӕмӕ йын загъта: «Дӕ цагъары фыстӕ ӕлвынынц, ӕмӕ мӕ паддзахӕй курын, цӕмӕй йӕ дӕлдӕртимӕ саккаг кӕна йӕ цагъары бӕрӕгбонмӕ».

²⁵Паддзах ын дзуапп радта: «Нӕ, мӕ фырт, не ’ппӕтӕн цӕуӕн нӕй, ӕгӕр дӕ батыхсын кӕндзыстӕм». Авессалом ӕм ныххатыди, фӕлӕ уый уӕддӕр не сразы ис, фӕлӕ йын арфӕ ракодта.

²⁶Авессалом ма йын загъта: «Уӕд та ме ’фсымӕр Амнон рацӕуӕд немӕ». Паддзах ӕй фӕрсы: «Цӕй тыххӕй хъуамӕ ацӕуа демӕ?»

²⁷Фӕлӕ йӕм Авессалом ныххатыди, ӕмӕ уӕд паддзах йӕ иннӕ фырттимӕ Амноны дӕр ауагъта.

²⁸Авессалом йӕ дӕлдӕртӕн бафӕдзӕхста: «Уӕ хъус ӕм дарут, ӕмӕ Амнон куыддӕр сӕнӕй бахъӕлдзӕг уа, афтӕ уын зӕгъдзынӕн: „Цӕвут Амноны“, ӕмӕ-иу ӕй амарут. Ма тӕрсут, ӕз уын зӕгъын афтӕ. Уӕхи цӕттӕ дарут ӕмӕ фӕстӕмӕ ма фӕлӕуут».

²⁹Авессаломы дӕлдӕртӕ йын йӕ ныхас куы сӕххӕст кодтой, уӕд паддзахы фырттӕ ӕмхуызонӕй сӕ хӕргӕфсытыл абадтысты ӕмӕ лидзынмӕ фесты.

³⁰Фӕндагыл ма уыдысты, афтӕ Давидмӕ фӕхабар чындӕуыд, Авессалом паддзахы фыртты иууылдӕр амардта, иу дӕр дзы удӕгасӕй нал баззади, зӕгъгӕ.

³¹Паддзах фестади, йӕ дарӕс арӕдывта фӕйнӕрдӕм ӕмӕ ныддӕлгом ис зӕххыл. Йӕ алыварс уыдысты йӕ дӕлдӕртӕ ӕмӕ уыдон дӕр арӕдывтой сӕ дарӕс.

³²Фӕлӕ Давиды ӕфсымӕр Шимайы фырт Йехонадав загъта: «Мӕ паддзах афтӕ ма банхъӕлӕд, ӕмӕ йын йе ’ппӕт фыртты амардӕуыд. Ӕрмӕстдӕр Амнон амард. Авессаломмӕ йӕ амарыны фӕнд, йӕ хо Тамары йын куы фӕхудинаг кодта, уӕд фӕзынди.

³³Уӕдӕ мӕ бардарӕг, мӕ паддзах йӕхи ма хӕрӕд ӕмӕ афтӕ мӕ ӕнхъӕлӕд, цыма йӕ фырттӕ се ’ппӕт дӕр амардысты. Амнон амард ӕрмӕст».

³⁴Авессалом алыгъди. Хъалагъур лӕппу йӕ цӕст дардта ӕмӕ, хохы фахсыл цы фӕндаг уыди, уым дзӕвгар адӕм ӕрбацӕйцӕугӕ федта. Лӕппу паддзахмӕ бацыди ӕмӕ йын ӕй фехъусын кодта.

³⁵Йехонадав паддзахӕн загъта: «Уый паддзахы фырттӕ ӕрбацӕуынц. Дӕ цагъар дын куыд дзырдта, афтӕ у хъуыддаг».

³⁶Уый йӕ ныхас куыд фӕци, афтӕ паддзахы фырттӕ, хъӕлӕсыдзагӕй богъ-богъгӕнгӕ, къӕсӕрыл ӕрбалӕууыдысты. Паддзах йӕхӕдӕг дӕр, стӕй йӕ дӕлдӕртӕ дӕр ныккуыдтой.

³⁷Авессалом та алыгъд ӕмӕ бацыди Аммиуды фырт Талмаймӕ, Гешуры паддзахмӕ. Давид ма бирӕ фӕхъыг кодта йӕ фыртыл.

³⁸Авессалом Гешурмӕ куы алыгъд, уӕдӕй ӕртӕ азы куы рацыд,

³⁹уӕд паддзах Давид нал хъынцъым кодта Амноны мардыл, йӕ маст ӕрсабыр ис ӕмӕ йӕм Авессаломы бафхӕрыны фӕнд нал уыд.