Read Хуыцауы Дзырд иронау 2 Паддзахӕдтӕ 17 Bible Online

2 Паддзахӕдтӕ 17 - Хуыцауы Дзырд иронау bible

2 Паддзахӕдтӕ 17

¹Ахитофел загъта Авессаломӕн: «Цӕй ӕмӕ дыууадӕс мин лӕджы равзарон ӕмӕ ахсӕв Давиды фӕдыл афӕдис кӕнон.

²Ныр фӕллад, зӕрдӕсаст уыдзӕн, ӕмӕ йыл ӕз мӕхи ныццӕвдзынӕн. Фӕтӕрсын ӕй кӕндзынӕн, йӕ адӕм лидзӕг фӕуыдзысты, паддзах иунӕгӕй аззайдзӕн ӕмӕ йӕ амардзынӕн.

³Ӕппӕт адӕм та раздӕхдзысты дӕумӕ, ӕрыгон чындз йӕ моймӕ куыд ӕрбаздӕхы, уыйау. Дӕу ӕрмӕстдӕр, кӕй фӕдыл зилыс, уыцы иунӕг лӕджы амарын хъӕуы, ӕппӕт адӕм та сӕрӕгасӕй баззайдзысты».

⁴Уыцы ныхас сӕ зӕрдӕмӕ фӕцыд Авессаломӕн ӕмӕ Израилы хистӕртӕн.

⁵Фӕлӕ Авессалом загъта: «Фӕдзурут-ма аркаг Хушаймӕ дӕр. Байхъусӕм, кӕддӕра уый та цы зӕгъдзӕн».

⁶Хушай ӕрбацыд Авессаломмӕ, ӕмӕ йӕ Авессалом бафарста: «Афтӕ ӕмӕ афтӕ загъта Ахитофел. Йӕ уынаффӕмӕ йын байхъусӕм? Ды та цы зӕгъдзынӕ?»

⁷Хушай йын дзуапп радта: «Ацы хатт хорз нӕу Ахитофелы уынаффӕ».

⁸Загъта ма: «Ды зоныс дӕ фыд ӕмӕ йӕ адӕмӕн се ’хсар, зоныс, йӕ лӕппынтӕ кӕмӕн байстой, уыцы мадӕл арсау ныр агъуыд кӕй уыдзысты, уый дӕр. Уыимӕ дӕ фыд, фӕлтӕрдджын хӕстон, дзыллӕимӕ иу ран нӕ бахсӕвиуат кӕндзӕн.

⁹Ныридӕгӕн дӕр йӕхи ӕмбӕхсдзӕн исты цъассы кӕнӕ та ӕндӕр ран. Ӕмӕ тӕккӕ райдианы иу къорд лӕджы фӕмард ис, зӕгъгӕ, уый чи фехъуса, уыдон дзурдзысты: „Авессаломы фӕдыл цы адӕм рацыд, уыдон фӕцагъды сты“.

¹⁰Уӕд суанг фидарзӕрдӕ хъӕбатыртӕ дӕр фӕудаист уыдзысты, уымӕн ӕмӕ ӕппӕт Израилӕн дӕр зындгонд сты дӕ фыды ӕхсар ӕмӕ йӕ адӕмы хъӕбатырдзинад.

¹¹Гъемӕ дын мӕнӕ мӕ уынаффӕ: ӕрбамбырд дӕм уӕнт ӕппӕт Израил, Данӕй Беер-Шевӕйы онг чидӕриддӕр ис, уыдон, денджызы былгӕрон змисау ӕнӕнымӕц куыд уой, афтӕ, ӕмӕ-иу дӕхӕдӕг дӕр семӕ рацу.

¹²Уӕд баййафдзыстӕм Давиды, кӕмфӕнды куы уа, уӕд дӕр, зӕххыл ӕртӕх ӕрхауӕгау ыл ныххуырсдзыстӕм нӕхи, ӕмӕ нын йӕхӕдӕг дӕр, йӕ адӕм дӕр нал аирвӕздзысты.

¹³Исты сахармӕ куы баздӕха Давид, уӕд та ӕппӕт Израил бӕндӕнтимӕ бацӕудзысты, ӕмӕ уыцы сахар дӕлвӕзмӕ хӕр-хӕрӕй ӕрласдзыстӕм, уирагдур дӕр дзы куыннӕуал баззайа, афтӕ».

¹⁴Уӕд Авессалом ӕмӕ израилӕгтӕ ӕмхуызонӕй загътой: «Аркаг Хушайы уынаффӕ Ахитофелы уынаффӕйӕ хуыздӕр у». Дунедарӕг афтӕ бакодта, цӕмӕй Ахитофелы хорз уынаффӕйы фӕдыл ма ацӕуой, ӕмӕ Авессалом бӕллӕхы бахауа.

¹⁵Хушай загъта сауджынтӕ Цадок ӕмӕ Авиафарӕн: «Ахитофел афтӕ ӕмӕ афтӕ уынаффӕ кодта Авессаломӕн ӕмӕ Израилы хистӕртӕн, ӕз та сын афтӕ ӕмӕ афтӕ бауынаффӕ кодтон.

¹⁶Ныр ӕвӕстиатӕй Давидӕн фехъусын кӕнут: „Ахсӕв ӕдзӕрӕг быдыры, Иорданы тӕрфы, ма баззай, фӕлӕ ӕнӕмӕнг доны фаллаг фарсмӕ ахиз, науӕд паддзах ӕмӕ йӕ адӕм бабын уыдзысты“».

¹⁷Йонатан ӕмӕ Ахимаац лӕууыдысты Ен-Рогелы доны цур. (Сахары сын сӕхи равдисӕн нӕ уыд.) Ӕнхъӕлмӕ кастысты сӕ хабархӕссӕг унӕутмӕ, цӕмӕй йын йӕ ныхӕстӕ Давидыл сӕмбӕлын кӕной.

¹⁸Ныр сӕ иу лӕппу бафиппайдта ӕмӕ хабар Авессаломӕн радзырдта. Уӕдмӕ уыдон уырдыгӕй атындзыдтой ӕмӕ Бахуримы сахары иу лӕджы хӕдзармӕ бахӕццӕ сты. Кӕрты уыди цъай, ӕмӕ уым бамбӕхстысты.

¹⁹Фысымты ус цъайы сӕрыл ӕмбӕрзӕн айтыгъта ӕмӕ йыл хуртуан ныккодта, цӕмӕй мацы фӕбӕрӕг уыдаид.

²⁰Авессаломы дӕлдӕртӕ сылгоймагмӕ бацыдысты ӕмӕ йӕ фарстой: «Кӕм сты Ахимаац ӕмӕ Йонатан?» Уый сын загъта: «Доны сӕрты ахызтысты». Авессаломы дӕлдӕртӕ рацагур-бацагур фӕкодтой, фӕлӕ ницы ссардтой ӕмӕ фӕстӕмӕ аздӕхтысты Йерусалиммӕ.

²¹Авессаломы дӕлдӕртӕ куыддӕр ацыдысты, афтӕ Йонатан ӕмӕ Ахимаац цъайӕ схызтысты ӕмӕ паддзах Давидмӕ фӕхабар кодтой: «Ӕвӕстиатӕй бахизут доны фаллаг фарсмӕ, уымӕн ӕмӕ сымах тыххӕй афтӕ ӕмӕ афтӕ уынаффӕ кодта Ахитофел».

²²Давид йӕ адӕмимӕ Иорданы фаллаг фарсмӕ бахызти. Боныцъӕхтӕм сӕ иу дӕр ацырдыгӕй нал аззад.

²³Ахитофел куы федта, йӕ уынаффӕйыл ын нӕ баввӕрсыдысты, уый, уӕд хӕрӕгыл саргъ сӕвӕрдта ӕмӕ сӕхимӕ, йӕ райгуырӕн сахармӕ, фӕраст ис. Йӕ хӕдзаронтӕн ныстуан ныууагъта ӕмӕ йӕхи ӕрцауыгъта. Йӕ мард ын йӕ фыдӕлты зӕппадзы бавӕрдтой.

²⁴Давид бахӕццӕ ис Маханаиммӕ. Авессалом дӕр, израилӕгтӕй йемӕ чи уыд, уыдонимӕ бахызт Иорданы фаллаг фарсмӕ.

²⁵Ӕфсады сӕргъы Авессалом Йоавы бӕсты Амасайы сӕвӕрдта. Амаса уыдис Измаелы байзӕддаг Итрайы фырт, йӕ мад — Нахашы чызг Авигеа, Йоавы мад Церуайы хо.

²⁶Авессалом ӕмӕ израилӕгтӕ асадӕны ӕрлӕууыдысты Галаады зӕххыл.

²⁷Давид Маханаиммӕ куы бацыд, уӕд Нахашы фырт Шови, аммонаг Раввайы сахайраг, Аммиелы фырт Махир, Ло-Девары сахайраг, ӕмӕ галаадаг Барзиллай, Рогелимы сахайраг,

²⁸Давид ӕмӕ йӕ адӕмӕн ӕрбаластой хуыссӕнгӕрзтӕ, къустӕ, дурын мигӕнӕнтӕ, стӕй мӕнӕу, хъӕбӕрхор, ссад, цӕкуытӕ, хъӕдур, тъӕпӕн хъӕдур,

²⁹мыд, нӕлхӕ, цыхт. Афтӕ дзырдтой: «Адӕм ӕдзӕрӕг быдыры стонг, дойны ӕмӕ фӕллад уыдзысты».