Read Хуыцауы Дзырд иронау 2 Паддзахӕдтӕ 2 Bible Online

2 Паддзахӕдтӕ 2 - Хуыцауы Дзырд иронау bible

2 Паддзахӕдтӕ 2

¹Уый фӕстӕ Давид фарста Дунедарӕджы: «Цы кӕнон? Иудӕйы сахартӕй искӕцымӕ ацӕуон?» Дунедарӕг ын дзуапп радта: «Ацу». Давид бафарста: «Кӕдӕм ацӕуон?» Уый йын загъта: «Хевронмӕ».

²Давид рахӕцыди йӕ дыууӕ усыл — изреелаг Ахиноам ӕмӕ кармелаг Навалы идӕдз Авигеайыл — ӕмӕ араст ис уырдӕм.

³Йемӕ акодта йӕ адӕмы дӕр сӕ бинонтимӕ. Хеврон ӕмӕ йӕ алфамбылай сахарты ӕрцардысты.

⁴Иудейӕгтӕ Хевронмӕ ӕрбацыдысты ӕмӕ Давиды Иудӕйы хӕдзарвӕндагӕн паддзахӕй байсӕрстой. Давидӕн рахабар чындӕуыди, галаадаг Иавешы цӕрджытӕ Саулы мард бавӕрдтой, зӕгъгӕ.

⁵Давид галаадаг Иавешы цӕрджытӕм лӕгтӕ арвыста, цӕмӕй сын зӕгъой: «Дунедарӕг уын арфӕ ракӕнӕд, уӕ паддзах Саулыл афтӕ иузӕрдион кӕй разындыстут ӕмӕ йын йӕ мард кӕй бавӕрдтат, уый тыххӕй.

⁶Ныр уӕ Дунедарӕджы хорзӕх уыдзӕн, ӕмӕ уыл Йӕ зӕрдӕ не сивдзӕн. Ӕз дӕр уын уӕ хорз хорзӕй бафиддзынӕн.

⁷Ныр уӕхиуыл фӕхӕцут ӕмӕ фидар лӕуут, уымӕн ӕмӕ уӕ паддзах Саул фӕмард ис, мӕн та Иудӕйы хӕдзарвӕндаг йӕхицӕн паддзахӕй байсӕрста».

⁸Уӕдмӕ Неры фырт Авнер, Саулы ӕфсады разамонӕг, Саулы фырт Йевосфеты[1] ӕрбакодта Маханаиммӕ

⁹ӕмӕ йӕ паддзахӕй сӕвӕрдта ӕппӕт Израилӕн — Галаад, Ашур, Изреел, Ефрем ӕмӕ Бениаминӕн.

¹⁰Дыууиссӕдз азы цыди Саулы фырт Йевосфетыл, Израилы паддзах куы сси, уӕд ӕмӕ паддзахиуӕг кодта дыууӕ азы. Давиды фарс та ӕрмӕст Иудӕйы хӕдзарвӕндаг уыди.

¹¹Давид Иудӕйы хӕдзарвӕндагӕн Хевроны паддзахиуӕг кодта авд азы ӕмӕ ӕхсӕз мӕйы.

¹²Неры фырт Авнер Саулы фырт Йевосфеты хӕстонтимӕ Маханаимӕй рацыди ӕмӕ Гивонмӕ йӕ ных сарӕзта.

¹³Церуайы фырт Йоав та рацыди Давиды хӕстонтимӕ. Гивоны цады цур фембӕлдысты, ӕмӕ иудейӕгтӕ цадӕн йӕ иу фарс ӕрлӕууыдысты, израилӕгтӕ та — йӕ иннӕ.

¹⁴Уӕд Авнер Йоавмӕ дзуры: «Рахизӕнт-ма фӕсивӕд ӕмӕ сӕ тыхтӕ бавзарӕнт нӕ цуры». Йоав загъта: «Рахизӕнт».

¹⁵Бениамины байзӕддӕгтӕй дӕр, Саулы фырт Йевосфеты ӕфсадӕй, дыууадӕс лӕппуйы рахызти, ӕмӕ Давиды хӕстонтӕй дӕр — дыууадӕс.

¹⁶Кӕрӕдзийы сӕртӕм фӕлӕбурдтой, кӕрӕдзийы фӕрсты сӕ кӕрдтӕ ныссагътой ӕмӕ иумӕ ӕрхаудысты. Уӕдӕй фӕстӕмӕ уыцы бынат хонынц Хелкат-Цурим[2], ис Гивоны цур.

¹⁷Ӕвирхъау уыди уыцы боны тох, ӕмӕ Авнер ӕмӕ израилӕгтыл Давиды хӕстонтӕ фӕуӕлахиз сты.

¹⁸Хӕцӕны уыдысты Церуайы ӕртӕ фырты дӕр: Йоав, Авишай ӕмӕ Асаел. Сычъийау рӕувад уыди Асаел.

¹⁹Йӕ разӕй айста Авнеры ӕмӕ йӕ фӕсте сурын райдыдта, йӕ фӕндагӕй нӕдӕр галиуӕрдӕм здӕхт, нӕдӕр рахизӕрдӕм.

²⁰Авнер фӕстӕмӕ фӕкасти ӕмӕ дзуры: «Уый ды дӕ, Асаел?» — «Ӕз дӕн», — дзуапп радта уый.

²¹«Исчердӕм фӕзил, — загъта йын Авнер, — лӕппутӕй искӕй ӕрцахс ӕмӕ йын йӕ хотыхтӕ дӕхицӕн байс». Фӕлӕ Асаелы нӕ бафӕндыд Авнеры ауадзын.

²²Уӕд та йӕм Авнер ногӕй радзырдта: «Иуварс дӕхи айс, науӕд дӕ зӕххыл цӕвын, ӕмӕ ма дын уӕд де ’фсымӕр Йоавмӕ цы цӕсгом равдисдзынӕн?»

²³Фӕлӕ уый нӕ састи. Уӕд Авнер йӕ арц фӕстӕрдӕм фӕзылдта ӕмӕ йын дзы йӕ гуыбын барӕхуыста. Арц иннӕрдӕм ахызт, Асаел уыцы ран ахауди ӕмӕ йӕ уд систа. Асаел кӕм фӕмард, уырдӕм-иу чи бахӕццӕ, уыдон-иу дзыхълӕуд фӕкодтой.

²⁴Йоав ӕмӕ Авишай фӕсте асырдтой Авнеры ӕмӕ хурныгуылдмӕ схӕццӕ сты, Гивоны ӕдзӕрӕг быдырмӕ фӕндагыл Гиахы акомкоммӕ цы къуылдым ис, Амма, зӕгъгӕ, уырдӕм.

²⁵Бениамины байзӕддӕгтӕ та Авнеры алыварс цӕлхӕмбырдӕй ӕрлӕууыдысты иннӕ къуылдымыл.

²⁶Авнер ныхъхъӕр кодта Йоавмӕ: «Нӕ кӕрдтӕ туджы кӕдмӕ ӕвдулдзыстӕм? Хорз ӕй куы зоныс, хъуыддаг цӕмӕ цӕуы, уый? Кӕд ӕрдомдзынӕ дӕ адӕмӕй, цӕмӕй се ’фсымӕрты фӕдыл мауал зилой?»

²⁷Йоав ын дзуапп радта: «Хуыцауӕй ард хӕрын, уыцы ныхӕстӕ раздӕр куы загътаис, уӕд мӕ адӕм абон сӕумӕйӕ ныууагътаиккой се ’фсымӕрты цӕгъдын».

²⁸Йоав сыкъауадындзӕй ныууасын кодта, ӕмӕ йӕ адӕм ӕрлӕууыдысты, сӕ хӕцын ныууагътой, израилӕгты фӕсте нал сырдтой.

²⁹Авнер ӕмӕ йӕ адӕм ӕхсӕв-бонмӕ фӕцыдысты Иорданы дӕлвӕзы, ахызтысты Иорданыл, ӕгас Битроныл сӕ фӕндаг акодтой ӕмӕ бахӕццӕ сты Маханаиммӕ.

³⁰Йоав Авнеры сурын куы ныууагъта, уӕд ӕрбамбырд кодта йӕ адӕмы. Давиды хӕстонтӕй, Асаелы нӕ нымайгӕйӕ, фӕхъуыди нудӕс лӕджы,

³¹Бениамины байзӕддӕгтӕй та, Авнеры адӕмӕй, Давиды хӕстонтӕ ныццагътой ӕртӕсӕдӕ ӕртиссӕдз лӕджы.

³²Асаелы мард систой ӕмӕ йӕ Вифлеемы йӕ фыды зӕппадзы бавӕрдтой. Йоав йӕ адӕмимӕ ӕхсӕв-бонмӕ фӕцыди, ӕмӕ сыл Хевроны ӕрбабон ис.