Read Хуыцауы Дзырд иронау 2 Паддзахӕдтӕ 6 Bible Online

2 Паддзахӕдтӕ 6 - Хуыцауы Дзырд иронау bible

2 Паддзахӕдтӕ 6

¹Давид та ногӕй ӕрӕмбырд кодта Израилы ӕвзаргӕ лӕгты, дӕс ӕмӕ ссӕдз мины бӕрц,

²ӕмӕ семӕ ацыд иудейаг сахар Бааламӕ, цӕмӕй уырдыгӕй ӕрбахӕссой Хуыцауы Фидыды Чырын, херувимтыл Ӕнцайӕджы, Уӕларвӕфсады Бардарӕджы ном чи хаста, уый.

³3-4 Хуыцауы Фидыды Чырын сӕвӕрдтой ног уӕрдоныл ӕмӕ йӕ раластой Авинадавы хӕдзарӕй, уӕлкъуыбырӕй. Уӕрдон бакодтой Авинадавы фырттӕ Узза ӕмӕ Ахйойы бар. Фидыды Чырынӕн йӕ разӕй цыди Ахйо.

⁵Давид ӕмӕ ӕппӕт израилӕгтӕ та Дунедарӕджы раз фыр цинӕй кафыдысты ӕмӕ зарыдысты, хъисфӕндыртӕй, дыууадӕстӕнонтӕй, далатӕй, къӕрцгӕнӕнтӕй ӕмӕ ӕмдзӕгъдгӕнӕнтӕй цагътой.

⁶Нахоны мусы цурмӕ куыд бахӕццӕ сты, афтӕ ифтыгъд галтӕ уӕрдон фӕкъул кодтой, ӕмӕ Узза Фидыды Чырынмӕ къухӕй февнӕлдта, ма рахауа, зӕгъгӕ.

⁷Дунедарӕг смӕсты ис Уззамӕ ӕмӕ йӕ тӕккӕ уыцы ран ӕрцавта; Узза мардӕй ӕрхауди Хуыцауы Фидыды Чырыны раз.

⁸Давид тынг фӕмаст кодта, Дунедарӕг Уззайы кӕй ӕрцавта, ууыл, ӕмӕ уыцы бынат схуыдта Перец-Узза[1]. Абон дӕр афтӕ хуыйны.

⁹Уыцы бон Давид тынг фӕтарсти Дунедарӕгӕй ӕмӕ загъта: «Цы ныфсӕй ма бахӕссон Хуыцауы Фидыды Чырын мӕхимӕ?»

¹⁰Давиды нӕ бафӕндыди Дунедарӕджы Фидыды Чырын Давиды сахармӕ аласын ӕмӕ йӕ гатаг Овед-Едомы хӕдзармӕ арвыста.

¹¹Дунедарӕджы Фидыды Чырын гатаг Овед-Едомы хӕдзары фӕци ӕртӕ мӕйы, ӕмӕ йын Дунедарӕг арфӕ ракодта йӕхицӕн дӕр ӕмӕ йӕ хӕдзаронтӕн дӕр.

¹²Паддзах Давидмӕ фӕхабар чындӕуыд, Хуыцауы Фидыды Чырыны фӕрцы Овед-Едом ӕмӕ йӕ хӕдзар Дунедарӕгӕй арфӕгонд фесты, зӕгъгӕ. Давид ацыд ӕмӕ Хуыцауы Фидыды Чырын Овед-Едомы хӕдзарӕй Давиды сахармӕ цингӕнгӕ ӕрбахаста.

¹³Дунедарӕджы Фидыды Чырын чи хаста, уыдон-иу размӕ ӕхсӕз санчъехы куы акодтой, уӕд та-иу Давид нывондӕн ӕрхаста гал ӕмӕ хӕрзхаст род.

¹⁴Давид, йӕ уӕлӕ сауджыны кӕттаг ефод, афтӕмӕй Дунедарӕджы раз йӕ кафынӕй нал ӕнцад.

¹⁵Хъӕртӕ ӕмӕ сыкъауадындзы зӕлтимӕ Давид ӕмӕ ӕгас Израил ӕрбахастой Дунедарӕджы Фидыды Чырын.

¹⁶Давиды сахармӕ Дунедарӕджы Фидыды Чырын куы бацӕйластой, уӕд Саулы чызг Мелхолӕ рудзынгӕй ракаст, паддзах Давиды Дунедарӕджы раз фыр цинӕй гӕппытӕгӕнгӕ ӕмӕ кафгӕ федта ӕмӕ йыл йӕ мидзӕрдӕйы бабылысчъил.

¹⁷Дунедарӕджы Фидыды Чырын бахастой ӕмӕ йӕ, Давид ын цы цатыр сарӕзта, уым нысангонд бынаты сӕвӕрдтой. Давид Дунедарӕгӕн иууылсудзинаг нывӕндтӕ ӕмӕ фидыды нывӕндтӕ ӕрхаста.

¹⁸Иууылсудзинаг нывӕндтӕ куы ӕрхаста, уӕд Уӕларвӕфсады Бардарӕджы номӕй адӕмӕн арфӕ ракодта

¹⁹ӕмӕ стӕй ӕппӕт адӕмӕн, чи ӕрбамбырд ис, уыцы израилӕгтӕн, нӕлгоймагӕй, сылгоймагӕй, фӕйнӕ дзулы, финикты ӕмӕ чисмисты фӕйнӕ гуылы байуӕрста. Уый фӕстӕ адӕмӕй алчи йӕ хӕдзармӕ ацыд.

²⁰Давид сӕхимӕ куы ӕрбаздӕхт, уӕд ӕй фӕндыди йӕхи хӕдзарӕн дӕр арфӕ ракӕнын. Саулы чызг Мелхолӕ йӕ размӕ рауад ӕмӕ загъта: «Куыд фесгуыхти абон Израилы паддзах! Ӕдылыйау йӕ цагъарты унӕутты раз йӕхи куыд сбӕгънӕг кодта!»

²¹Давид ын дзуапп радта: «Уыдоны раз нӕ, фӕлӕ мӕ дӕ фыд ӕмӕ йӕ хӕдзарвӕндаджы бӕсты Израилӕн, Дунедарӕджы адӕмӕн, фӕтӕгӕй Чи равзӕрста, Уый раз! Дунедарӕджы раз кафынмӕ ӕз цӕттӕ дӕн!

²²Уадз ӕмӕ ноджы ницӕйагдӕр фестон, ноджы тынгдӕр ӕрныллӕг уон Йӕ разы, фӕлӕ, кӕмӕй загътай, уыцы унӕутты цӕсты та ӕз уыдзынӕн кадджын».

²³Саулы чызг Мелхолӕйӕн йӕ амӕлӕты бонмӕ цот нӕ рацыд.