Read Хуыцауы Дзырд иронау 3 Паддзахӕдтӕ 14 Bible Online

3 Паддзахӕдтӕ 14 - Хуыцауы Дзырд иронау bible

3 Паддзахӕдтӕ 14

¹Уыцы заман Йоровамы фырт Авийа фӕрынчын ис.

²Ӕмӕ Йоровам йӕ бинойнагӕн загъта: «Дӕ уӕлӕ ӕндӕр дарӕс скӕн, мӕ ус дӕ, уый куыд ничи базона, афтӕ ӕмӕ фӕцу Силоммӕ. Уым цӕры пехуымпар Ахийа; ацы адӕмӕн паддзах кӕй суыдзынӕн, уый мын рагацау загъта.

³Демӕ йын ахӕсс дӕс дзулы, гуылтӕ ӕмӕ мыды дурын. Уый дын зӕгъдзӕн, нӕ рынчын лӕппу цы бауыдзӕн, уый».

⁴Сылгоймаг бакодта, йӕ мой йын куыддӕриддӕр бафӕдзӕхста, афтӕ. Силоммӕ, Ахийайы хӕдзармӕ, куы бахӕццӕ, уӕд федта, пехуымпар фыр зӕрондӕй куыд бакуырм ис, уый, йӕ цӕстытӕ змӕлгӕ дӕр нал кодтой.

⁵Ныр Дунедарӕг та Ахийайӕн рагацау загъта: «Ныртӕккӕ дӕм ӕрбацӕудзӕн Йоровамы ус ӕмӕ дӕ бафӕрсдзӕн йӕ рынчын лӕппуйы тыххӕй, ӕцӕг йӕхи афтӕ дардзӕн, цыма дын ӕнӕзонгӕ у». Дунедарӕг Ахийайӕн бацамыдта, сылгоймагӕн цы хъуамӕ зӕгъа, уый.

⁶Сылгоймаг къӕсӕрӕй куыддӕр ӕрбацӕйхызт, афтӕ йын Ахийа йӕ къахуынӕр айхъуыста ӕмӕ загъта: «Рахиз мидӕмӕ, Йоровамы ус. Цыма уый ды нӕ дӕ, афтӕ дӕхи цӕмӕн ӕвдисыс? Фыдохы уац мӕм ис дӕуӕн.

⁷Цу ӕмӕ Йоровамӕн фехъусын кӕн: „Афтӕ зӕгъы Дунедарӕг, Израилы Хуыцау: адӕмы ’хсӕнӕй дӕ ракодтон ӕмӕ дӕ скадджын кодтон, Мӕ адӕмӕн, Израилӕн, дӕу скодтон фӕтӕг.

⁸Давиды байзӕддагӕй паддзахад байстон ӕмӕ йӕ дӕ къухы бакодтон. Фӕлӕ дӕумӕ Мӕ лӕггадгӕнӕг Давиды миниуджытӕй ницы разынд. Уый Мын ӕххӕст кодта Мӕ фӕдзӕхстытӕ, Мӕ фӕндон, кодта Мын иузӕрдион лӕггад.

⁹Ды та, дӕ размӕ чи уыд, уыдонӕй се ’ппӕтӕй дӕр разындтӕ ӕвзӕрдӕр. Иуварс Мӕ фехстай дӕ зӕрдӕйӕ, дӕхицӕн скодтай ӕндӕр хуыцӕуттӕ, джиппыуагъд гуымирытӕ ӕмӕ Мӕ смӕсты кодтай.

¹⁰Уымӕ гӕсгӕ дын дӕ хӕдзаронты фыдбылызы амӕттаг бакӕндзынӕн, цагъайраг уа ӕви сӕрибар — Израилы адӕмы ’хсӕн Йоровамы хӕдзарвӕндагӕй иу лӕппу-байзӕддаджы дӕр нал ныууадздзынӕн, фаджыс мӕрзӕгау се ’ппӕты дӕр рамӕрздзынӕн.

¹¹Йоровамы адӕмӕй сахары мидӕг чи амӕла, уыдон куыйты хӕринаг бауыдзысты, фӕссахар чи амӕла, уыдоны та тугдзых мӕргътӕ бахӕрдзысты“. Афтӕ зӕгъы Дунедарӕг.

¹²Ды та дӕ хӕдзармӕ ацу. Ӕцӕг, куыддӕр сахармӕ бацӕуай, афтӕ дӕ саби амӕлдзӕн.

¹³Фӕхъыг ыл кӕндзысты Израилы адӕм ӕмӕ йӕ зӕппадзы бавӕрдзысты. Йоровамы хӕдзаронтӕй иунӕг уый ӕрцӕудзӕни зӕппадзы ӕвӕрд, уымӕн ӕмӕ Дунедарӕг, Израилы Хуыцау, иунӕг уымӕ ссардта хорз миниуджытӕ.

¹⁴Дунедарӕг Израилы сӕргъы сӕвӕрдзӕн ӕндӕр паддзах, ӕмӕ уый мыггагыскъуыд фӕкӕндзӕн Йоровамы хӕдзарвӕндаг. Гъе афтӕ, уӕдӕ куыд? Гъеныр ӕрцыди йе сӕфт!

¹⁵Дунедарӕг Израилы ӕрцӕвдзӕн, ӕмӕ уый доны хъеллаугӕнӕг хъӕзы хуызӕн суыдзӕн. Израилы адӕмы сӕ бындзарӕй срӕдувдзӕн ацы сойджын зӕххӕй, кӕддӕр сын сӕ фыдӕлтӕн кӕй радта, уымӕй. Евфраты доны фале сӕ ныххӕлиу кӕндзӕн, сӕхицӕн хъӕдӕй ус-хуыцау Ашерӕйы цӕджындзтӕ кӕй скодтой ӕмӕ уымӕй Дунедарӕджы кӕй смӕсты кодтой, уый тыххӕй.

¹⁶Израилы адӕмы ныууадздзӕн Йоровамы тӕригъӕдты тыххӕй, стӕй, Йоровам йӕ адӕмы тӕригъӕды азымы кӕй баппӕрста, уый тыххӕй».

¹⁷Йоровамы ус куыддӕр Тирцамӕ бахӕццӕ ӕмӕ сӕ хӕдзары къӕсӕрӕй мидӕмӕ бахызт, афтӕ йӕ саби амарди.

¹⁸Бавӕрдтой йӕ ӕмӕ йыл фӕхъыг кодтой Израилы адӕм, Дунедарӕг пехуымпар Ахийайы уылты куыд загъта, афтӕ.

¹⁹Йоровамы иннӕ хъуыддӕгтӕ, йӕ хӕстон хабӕрттӕ ӕмӕ, паддзахиуӕг куыд кодта, уыдӕттӕ, фыст ӕрцыдысты «Израилы паддзӕхты азфыстыты чиныджы».

²⁰Йоровам Израилӕн паддзахиуӕг фӕкодта дыууӕ ӕмӕ ссӕдз азы. Куы амарди, уӕд йӕ бӕсты паддзах сси йӕ фырт Надав.

²¹Соломоны фырт Роховам Иудейы паддзах куы сси, уӕд ыл цыди иу ӕмӕ дыууиссӕдз азы. Дунедарӕг Израилы хӕдзарвӕндӕгты ӕппӕт зӕххытӕй цы сахар равзӕрста, Йӕ ном дзы цӕра, уый охыл, уыцы Йерусалимы Роховам паддзахиуӕг фӕкодта ӕвддӕс азы. Йӕ мад Наама уыди аммонаг чызг.

²²Иудейӕгтӕ, Дунедарӕгӕн ӕнӕуынон цы у, уыдӕттӕ кодтой, ӕмӕ Йӕ сӕ тӕригъӕдтӕй сӕ фыдӕлтӕй тынгдӕр мӕсты кодтой.

²³Алы бӕрзонд хохыл ӕмӕ алы къабузджын бӕласы бын арӕзтой кувӕн къуыбыртӕ, табуйаг дуртӕ ӕмӕ Ашерӕйы цӕджындзтӕ.

²⁴Фӕзындис сӕм дины хъахбай лӕгтӕ дӕр ӕмӕ, Дунедарӕг кӕддӕр Израилы адӕмы цурӕй кӕй фӕсырдта, уыцы адӕмты ӕппӕт ӕлгъаг митӕ фӕзмын байдыдтой.

²⁵Роховамы паддзахиуӕджы фӕндзӕм аз Мысыры паддзах Шишак бабырста Йерусалиммӕ

²⁶ӕмӕ дзы рахаста Дунедарӕджы Кувӕндоны ӕмӕ паддзахы галуаны хӕзнатӕ иууылдӕр. Рахаста Соломоны конд сыгъзӕрин уартытӕ дӕр.

²⁷Роховам уыдоны бӕсты скӕнын кодта ӕрхуы уартытӕ ӕмӕ сӕ паддзахы галуаны дуар хъахъхъӕнджыты хицӕутты бӕрны бакодта.

²⁸Ӕмӕ-иу паддзах Дунедарӕджы Кувӕндонмӕ куы цыди, уӕд-иу уыцы уартытӕ хастой йемӕ цӕуӕг хъахъхъӕнджытӕ, стӕй-иу сӕ фӕстӕмӕ хъахъхъӕнджыты агъуыстмӕ бахастой.

²⁹Роховамы иннӕ хъуыддӕгтӕ иууылдӕр фыст ӕрцыдысты «Иудейаг паддзӕхты азфыстыты чиныджы».

³⁰Цӕрӕнбонты Роховам хӕцыди Йоровамимӕ.

³¹Куы амарди, уӕд ӕй бавӕрдтой йӕ фыдӕлты фарсмӕ, Давиды сахары. Йӕ мад уыди аммонаг чызг, Наама — йӕ ном. Роховамы фӕстӕ паддзах сси йӕ фырт Авиам.