Read Хуыцауы Дзырд иронау 3 Паддзахӕдтӕ 16 Bible Online

3 Паддзахӕдтӕ 16 - Хуыцауы Дзырд иронау bible

3 Паддзахӕдтӕ 16

¹Иуахӕмы Дунедарӕг Хананийы фырт Йегуйӕн бафӕдзӕхста, цӕмӕй Дунедарӕджы номӕй Баасайӕн зӕгъа:

²«Ницӕйаг уыдтӕ, уӕддӕр дӕ скодтон Мӕ адӕмы, Израилы, фӕтӕг. Фӕлӕ ды бафӕзмыдтай Йоровамы, Мӕ адӕмы Мын тӕригъӕдты бафтыдтай, цӕмӕй Мӕ мӕсты кӕной сӕ тӕригъӕдтӕй.

³Уымӕ гӕсгӕ Ӕз мыггагыскъуыд фӕкӕндзынӕн Баасайы дӕр ӕмӕ йӕ байзӕддӕгты дӕр. Наваты фырт Йоровамы мыггаджы куыд бафхӕрдтон, афтӕ йын йӕ мыггаг дӕр бафхӕрдзынӕн.

⁴Баасайы мыггагӕй сахары мидӕг чи амӕла, уыдон куыйты хӕринаг бауыдзысты, фӕссахар чи амӕла, уыдоны та тугдзых мӕргътӕ бахӕрдзысты».

⁵Баасайы иннӕ хъуыддӕгтӕ, йе ’хсар ӕмӕ йе сгуыхтытӕ фыст ӕрцыдысты Израилы паддзӕхты азфыстыты Чиныджы.

⁶Куы амарди, уӕд ӕй бавӕрдтой йӕ фыдӕлты фарсмӕ, Тирцайы сахары. Йӕ фӕстӕ паддзах сси йӕ фырт Ела.

⁷Ацы рагуац ныхас Дунедарӕджы фӕдзӕхстӕй Хананийы фырт Йегу загъта Бааса ӕмӕ йӕ мыггаджы ныхмӕ, уымӕн ӕмӕ Бааса, Дунедарӕгӕн ӕнӕуынон цы митӕ уыдысты, уыдӕттӕ кодта, Йӕ хъуыддӕгтӕй Йӕ ӕфхӕрдта, Йоровамы тӕригъӕдтӕ кӕй фӕзмыдта, стӕй ма ноджы Йоровамы мыггаг кӕй ныццагъта, уый тыххӕй.

⁸Иудейаг паддзах Асайы паддзахиуӕджы ӕхсӕз ӕмӕ ссӕдзӕм аз Баасайы фырт Ела Тирцайы сахары сси Израилы паддзах. Йӕ паддзахиуӕг ахаста дыууӕ азы.

⁹Йӕ ныхмӕ йын сусӕгвӕнд скодта йе ’фсады хицау Зимри. Уый уыди йӕ тохуӕрдӕтты ӕфсадӕн йе ’мбисы хицау. Паддзах Тирцайы сахары, йе ’ппӕт исбон дӕр кӕй бӕрны уыд, уыцы Арцайы хӕдзары куы фӕрасыг,

¹⁰уӕд ӕм Зимри бацыд ӕмӕ йӕ амардта. Уыцы хъуыддаг ӕрцыд иудейаг паддзах Асайы паддзахиуӕджы авд ӕмӕ ссӕдзӕм аз, ӕмӕ Елайы амӕлӕты фӕстӕ Зимри сси Израилы паддзах.

¹¹11-12 Паддзахы бынат куы бацахста, уӕд ныццагъта Баасайы мыггаг. Иу нӕлгоймаг дӕр дзы удӕгасӕй нал ныууагъта, Дунедарӕг Баасайы тыххӕй пехуымпар Йегуйы уылты куыд загъта, афтӕ. Зимри йын амардта суанг йӕ хионтӕ ӕмӕ йӕ лымӕнты дӕр.

¹³Ахӕм карз ӕфхӕрд сыл ӕрцыдис Бааса ӕмӕ йӕ фырт Елайы тӕригъӕдты аххосӕй, ноджы ма, Израилы адӕмы тӕригъӕдты кӕй бафтыдтой ӕмӕ Дунедарӕджы, Израилы Хуыцауы, сӕ ницӕйаг гуымирытӕй кӕй смӕсты кодтой, уый тыххӕй.

¹⁴Елайы иннӕ хабӕрттӕ иууылдӕр фыст ӕрцыдысты «Израилы паддзӕхты азфыстыты Чиныджы».

¹⁵Иудейаг паддзах Асайы паддзахиуӕджы авд ӕмӕ ссӕдзӕм аз Тирцайы сахары Израилы паддзах сси Зимри. Йӕ паддзахиуӕг ӕдӕппӕтӕй ахаста авд боны. Уыцы заман Израилы ӕфсад лӕууыди филистимаг сахар Гиббетоны ныхмӕ.

¹⁶Ӕмӕ Зимри паддзах Елайы ныхмӕ сусӕгвӕнд скодта ӕмӕ йӕ амардта, уый куы фехъуыстой, уӕд, кӕм ӕй амардта, уыцы ран тӕккӕ уыцы бон Израилы ӕфсад сӕхицӕн паддзахӕй расидтысты сӕ хицау Амрийы.

¹⁷17-18 Амри йе ’ппӕт ӕфсадимӕ Гиббетоны цурӕй абырста Тирцайы ’рдӕм. Сахарыл ӕрхъула кодта ӕмӕ йӕ куы бацахста, уӕд Зимри паддзахы галуаны гӕнахмӕ балыгъд, арт бандзӕрста галуаныл ӕмӕ дзы йӕхӕдӕг дӕр басыгъд.

¹⁹Уыцы бӕллӕх ыл ӕрцыд йӕ тӕригъӕдты аххосӕй, Дунедарӕджы раз ӕнӕраст митӕ кӕй кодта, уый тыххӕй. Фӕзмыдта Йоровамы тӕригъӕдджын митӕ, уый Израилы адӕмы цы тӕригъӕдты бафтыдта, уыдон.

²⁰Зимрийы сусӕгвӕнд, стӕй ма ноджыдӕр цы хъуыддӕгтӕ бакодта, уыдон фыст ӕрцыдысты Израилы паддзӕхты азфыстыты Чиныджы.

²¹Израилы адӕм дыууӕ дихы фесты. Сӕ иу ӕмбис паддзахӕй расидинаг уыдысты Гинаты фырт Тивнийы, иннӕ ӕмбис та — Амрийы.

²²Амрийы фарсхӕцджытӕ фӕуӕлахиз сты, Гинаты фырт Тивнийы фарс чи хӕцыди, уыдоныл, ӕмӕ Тимни куы фӕмард ис, уӕд Израилӕн паддзах сси Амри.

²³Амри Израилы паддзах сси Иудейы паддзах Асайы паддзахиуӕджы ӕртын фыццӕгӕм аз. Паддзахиуӕг кодта дыууадӕс азы, уыдонӕй фыццаг ӕхсӕз азы — Тирцайы сахары.

²⁴Амри Семерӕй ӕвзисты дыууӕ талантӕй балхӕдта Самарийы къуылдым, сарӕзта йыл сахар ӕмӕ йӕ схуыдта Самари, йӕ раздӕры хицау Семеры номыл.

²⁵Амри дӕр кодта, Дунедарӕгӕн ӕнӕуынон цы у, уыдӕттӕ. Йӕ размӕ цы паддзӕхтӕ уыд, уыдонӕй ноджы фыддӕр фыдгӕнӕг разынд.

²⁶Алцӕмӕй дӕр фӕзмыдта Наваты фырт Йоровамы тӕригъӕдджын митӕ, уый Израилы адӕмы цыдӕриддӕр тӕригъӕдты бафтыдта, уыдон ӕмӕ Дунедарӕджы, Израилы Хуыцауы, смӕсты кодта йӕ ницӕйаг гуымирытӕй.

²⁷Амрийы иннӕ хъуыддӕгтӕ ӕмӕ йе сгуыхтытӕ фыст ӕрцыдысты «Израилы паддзӕхты азфыстыты чиныджы».

²⁸Куы амарди, уӕд ӕй бавӕрдтой йӕ фыдӕлты фарсмӕ, Самарийы сахары. Йӕ фӕстӕ паддзах сси йӕ фырт Ахав.

²⁹Амрийы фырт Ахав Израилы паддзах сси иудейаг паддзах Асайы паддзахиуӕджы ӕртын ӕстӕм аз. Самарийы сахары Израилӕн паддзахиуӕг фӕкодта дыууӕ ӕмӕ ссӕдз азы.

³⁰Амрийы фырт Ахав дӕр, Дунедарӕгӕн ӕнӕуынон цы у, уыдӕттӕ арӕзта. Йӕ размӕ цы паддзӕхтӕ уыд, уыдонӕй басгуыхти ноджы фыддӕр фыдгӕнӕг.

³¹Наваты фырт Йоровамы тӕригъӕдджын митӕ кӕй фӕзмыдта, уый йын ӕгъгъӕд нӕ уыди, фӕлӕ ма ракуырдта сидойнӕгты паддзах Етбаалы чызг Иезавелы ӕмӕ кувын байдыдта Баалӕн.

³²Уымӕн Самарийы цы кувӕндон сарӕзта, уым ын скодта нывондхӕссӕн дӕр.

³³Ноджы ма скодта Ашерӕйы цӕджындз дӕр. Йӕ размӕ Израилӕн цы паддзӕхтӕ уыд, уыдонӕй ноджы тынгдӕр агайдта Дунедарӕджы, Израилы Хуыцауы, маст.

³⁴Ахавы паддзахиуӕджы заман Вефилы сахайраг Хиел ногӕй рацарӕзта Йерихоны сахар. Сахарӕн йӕ бындур куы ӕрӕвӕрдта, уӕд амарди йӕ фыццаг фырт Авирам, кулдуар ын куы скодта, уӕд та — йӕ кӕстӕр фырт Сегув, кӕддӕр Дунедарӕг Нуны фырт Йешуайы уылты куыд загъта, афтӕ.