Read Хуыцауы Дзырд иронау 3 Паддзахӕдтӕ 17 Bible Online

3 Паддзахӕдтӕ 17 - Хуыцауы Дзырд иронау bible

3 Паддзахӕдтӕ 17

¹Галаадмӕ балидзӕг адӕмӕй иу лӕг, тишбийаг Илийа, Ахавӕн загъта: «Сомы дын кӕнын Дунедарӕгӕй, Израилы Хуыцауӕй, лӕггад Кӕмӕн кӕнын, Уымӕй: къорд азы дӕргъы нӕ уыдзӕни нӕдӕр къӕвда, нӕдӕр ӕртӕх, цалынмӕ ӕз нӕ зӕгъон, уӕдмӕ».

²Дунедарӕг Илийайӕн загъта:

³«Дӕ сӕр бафснай. Ацу скӕсӕнӕрдӕм, Иорданы фалемӕ, ӕмӕ уым къададон Кериты былгӕрон дӕхи бамбӕхс.

⁴Йӕ донӕй йын сӕтдзынӕ дӕ дойны, сынтытӕн та Ӕз бафӕдзӕхстон, ӕмӕ дын хӕринаг хӕсдзысты уырдӕм».

⁵Илийа Дунедарӕгмӕ байхъуыста, Иорданы фаллаг фарсмӕ бахызт ӕмӕ царди Кериты былгӕрон.

⁶Сынтытӕ йын уырдӕм ӕрвылрайсом ӕмӕ ӕрвылизӕр хастой дзул ӕмӕ дзидза. Кериты донӕй та Илийа саста йӕ дойны.

⁷Цасдӕр рӕстӕджы фӕстӕ Кериты къада бахуыскъ, уымӕн ӕмӕ къӕвдатӕ нал уарыд.

⁸Дунедарӕг та Илийайӕн загъта:

⁹«Ацу сидойнаг сахар Сарептӕмӕ ӕмӕ уал уым цӕр. Ӕз уым иу идӕдз усӕн загътон, ӕмӕ дӕ уый хӕрд ӕмӕ нозтӕй цух нӕ уадздзӕн».

¹⁰Ӕмӕ Илийа уырдыгӕй араст ис Сарептӕмӕ. Сахары кулдуармӕ куы бахӕццӕ, уӕд дын кӕсы, ӕмӕ уым иу сылгоймаг артӕн каухалӕнтӕ ӕмбырд кӕны. Фӕдзырдта йӕм ӕмӕ йын загъта: «Истӕм-ма мын дон рахӕсс ӕмӕ бануазон».

¹¹Ус куы фӕцӕйуад, уӕд ма йӕ фӕстӕ адзырдта: «Иу дзулы къӕбӕр дӕр ма мын-иу райс демӕ».

¹²Уый йын загъта: «Сомы кӕнын Дунедарӕгӕй, дӕ Хуыцауӕй, къӕбӕры мур мӕм нӕй. Ӕрмӕстдӕр мӕм дурыны мидӕг ис иу армыдзаг ссад, хъуырауы мидӕг та — иу чысыл сой. Ӕмӕ мӕнӕ суджы дыууӕ лыггаджы ахӕссон, фӕстаг хӕринаг скӕнон мӕхицӕн ӕмӕ мӕ лӕппуйӕн, стӕй амӕлдзыстӕм».

¹³Илийа йын загъта: «Ацу ӕмӕ скӕн, цы загътай, уый. Ӕрмӕст уал фыццаг мӕнӕн иу гыццыл сойыфых акӕн ӕмӕ мын ӕй ардӕм рахӕсс. Дӕхицӕн ӕмӕ дӕ лӕппуйӕн та уый фӕстӕ скӕндзынӕ. Мацӕмӕй тӕрс,

¹⁴уымӕн ӕмӕ Дунедарӕг, Израилы Хуыцау, афтӕ зӕгъы: „Ссады дурын не сафтид уыдзӕни ӕмӕ сой дурыны нӕ фӕкъаддӕр уыдзӕни, цалынмӕ Дунедарӕг зӕхмӕ къӕвда рауадза, уӕдмӕ“».

¹⁵Сылгоймаг ацыд ӕмӕ йын Илийа куыд загъта, афтӕ бакодта. Ӕмӕ афтӕмӕй се ’ртӕ дӕр цасдӕр рӕстӕджы дӕргъы хӕрдхъуаг нӕ уыдысты.

¹⁶Дурыны ссад нӕ куынӕг кодта, хъуырауы дӕр сой нӕ къаддӕр кодта, Дунедарӕг Илийайы уылты куыд загъта, афтӕ.

¹⁷Иуахӕмы идӕдз усӕн, Илийайы фысымӕн, йӕ лӕппу фӕрынчын ис. Низ ыл бынтондӕр стыхджын, ӕмӕ куынӕуал улӕфыд,

¹⁸уӕд сылгоймаг Илийайӕн загъта: «Цы дӕ хъӕуы мӕнӕй, Хуыцауы минӕвар? Мӕ тӕригъӕдтӕ мын мӕ зӕрдыл ӕрӕфтауынмӕ ӕрбацыдтӕ ӕмӕ мӕ лӕппуйы амарынмӕ?»

¹⁹Илийа йын загъта: «Ӕри-ма мӕм дӕ лӕппуйы». Ӕмӕ йын лӕппуйы йӕ хъӕбысӕй райста, пехуымпарӕн уӕлхӕдзары цы хатӕн уыд, уырдӕм ӕй систа, уым ӕй йӕ сынтӕгыл ӕрӕвӕрдта

²⁰ӕмӕ Дунедарӕгмӕ скуывта: «О Дунедарӕг, мӕ Хуыцау! Ау, мӕн чи суазӕг кодта, уыцы идӕдз усы бафхӕрдзынӕ, йӕ лӕппуйы йын амардзынӕ?»

²¹Ӕртӕ хатты дӕлгоммӕ ӕрфӕлдӕхти сабийыл ӕмӕ-иу алы хатт дӕр скуывта: «О Дунедарӕг, мӕ Хуыцау! Ацы сабийӕн йӕ уд фӕстӕмӕ йӕ мидӕг бацӕуӕд!»

²²Дунедарӕг Илийайы куывд фехъуыста, ӕмӕ сабийӕн йӕ уд фӕстӕмӕ йӕ мидӕг бацыд, ӕмӕ райгас.

²³Уӕд ӕй Илийа йӕ хъӕбысмӕ систа, фӕстӕмӕ йӕ хӕдзармӕ ӕриста, йӕ мадмӕ, ӕмӕ загъта: «Ӕрбакӕс-ма, дӕ лӕппу ӕгас у».

²⁴Сылгоймаг ын дзуапп радта: «Ныр ӕй зонын, ды Хуыцауы минӕвар дӕ, ӕмӕ Дунедарӕджы номӕй цы дзурыс, ууыл ӕцӕгӕйдӕр ис ӕууӕндӕн».