Read Хуыцауы Дзырд иронау 4 Паддзахӕдтӕ 10 Bible Online

4 Паддзахӕдтӕ 10 - Хуыцауы Дзырд иронау bible

4 Паддзахӕдтӕ 10

¹Самарийы сахары Ахавы фырттӕ ӕмӕ йӕ фырты фырттӕ нымӕцӕй уыдысты дӕс ӕмӕ ӕртиссӕдз. Йегу арвыста фыстӕджытӕ мӕ, Изреелы хицӕуттӕм — сахары хистӕртӕм ӕмӕ Ахавы цоты хъомылгӕнджытӕм. Фыст дзы уыдис:

²«Уӕ паддзахы цот уӕ разы сты. Ис уӕм хӕстон уӕрдӕттӕ ӕмӕ бӕхтӕ, уӕ сахар фидар ӕмӕ ӕдас у, фаг уӕм ис хӕцӕнгӕрзтӕ дӕр.

³Гъемӕ уӕ паддзахы зӕнӕгӕн сӕ хуыздӕры равзарут ӕмӕ йӕ сбадын кӕнут йӕ фыды паддзахы бадӕны, ӕмӕ уӕ паддзахады сӕраппонд рахӕцут».

⁴Уыдонӕн фыр тӕссӕй сӕ уд ауад Йегуйы ныхӕстӕм ӕмӕ загътой: «Дыууӕ паддзахы бон ын ницы баци, уӕд ын мах бон цы бауыдзӕн?»

⁵Паддзахы галуаны уагдар, сахары хицау, хистӕртӕ ӕмӕ паддзахы цоты хъомылгӕнджытӕ Йегумӕ арвыстой сӕ курдиат: «Мах дӕ цагъартӕ стӕм ӕмӕ нын цы зӕгъай, уый бакӕндзыстӕм. Ам паддзахӕй никӕй ӕвзарӕм, ӕмӕ, дӕхи зӕрдӕ цы зӕгъы, уый кӕн».

⁶Уӕд сӕм Йегу ныффыста дыккаг фыстӕг: «Уӕдӕ кӕд мӕ фарс стут ӕмӕ мӕ коммӕ кӕсут, уӕд мӕм Изреелмӕ райсом уӕ паддзахы фыртты сӕртӕ ӕрбахӕссут». Паддзахӕн уыди дӕс ӕмӕ ӕртиссӕдз фырты. Сахары нымаддӕр лӕгтӕ уыдысты сӕ хъомылгӕнджытӕ.

⁷Адон уыцы фыстӕг куы райстой, уӕд паддзахы байзӕддӕгты амарын кодтой, сӕ сӕртӕ сын чыргъӕдты нывӕрдтой ӕмӕ сӕ Йегумӕ Изреелы сахармӕ арвыстой.

⁸Йегуйӕн уыцы хабар куы фехъусын кодтой, уӕд загъта: «Кулдуары ӕрбацӕуӕны сӕ дыууӕ цӕнды скӕнут ӕмӕ сӕ райсоммӕ афтӕмӕй ныууадзут».

⁹Райсомӕй Йегу адӕмы размӕ рацыд ӕмӕ сын загъта: «Сымах ницы азымджын стут. Ӕз мӕ паддзахы ныхмӕ скодтон сусӕгвӕнд ӕмӕ йӕ амардтон, фӕлӕ адоны та чи амардта?

¹⁰Уӕдӕ зонут, Ахавы хӕдзары тыххӕй Дунедарӕг Йӕ цагъар Илийайӕн цыдӕриддӕр загъта, уыцы ныхӕстӕй иунӕг дӕр ӕнӕ сӕххӕст уӕвгӕ нӕ баззайдзӕн».

¹¹Ӕмӕ Йегу амарын кодта, Ахавы хӕдзарвӕндагӕй ма Изреелы чидӕриддӕр баззад, уыдоны, ноджы ма йын — йӕ барджынты, йӕ зонгӕты ӕмӕ йӕ сауджынты дӕр. Иу дӕр сӕ нал баззад.

¹²Уый фӕстӕ Йегу ӕрбаздӕхти Самаримӕ. Фӕндагыл ма куы уыди, уӕд Бет-Екед-Роимы

¹³амбӕлдис иудейаг паддзах Ахазиайы ’рвадӕлтыл ӕмӕ сӕ бафарста: «Чи стут?» Дзуапп ын радтой: «Ахазиайы ’рвадӕлтӕ. Паддзахӕн йӕ цот ӕмӕ йе ’фсымӕрты бабӕрӕг кӕнынмӕ цӕуӕм, куыд сты, цы сты, уый фенынмӕ».

¹⁴Йегу йӕ фӕсдзӕуинтӕн бардзырд радта: «Ӕрцахсут сӕ!» Ӕмӕ цӕ ӕрцахстой — дыууӕ ӕмӕ дыууиссӕдз лӕджы Бет-Екеды цъайы цур амардтой, иу дӕр сӕ удӕгасӕй нал баззад.

¹⁵Йегу уырдыгӕй дарддӕр Самарийы ’рдӕм куыд фӕцӕйцыд, афтӕ дын мӕнӕ йӕ ныхмӕ ӕрбацӕуы Рехавы фырт Йонадав. Йегу йын салам радта ӕмӕ йӕ бафарста: «Мӕныл дӕ зӕрдӕ куыд дарыс, афтӕ дын дӕхиуыл дӕр зӕрдӕдарӕн ис ӕви нӕ?» Йонадав ын загъта: «О». — «Уӕдӕ дӕ къух ӕри!» Ӕмӕ йӕм Йегу уӕрдонӕй йӕ къух ралӕвӕрдта ӕмӕ йӕ сбадын кодта йӕ фарсмӕ.

¹⁶Загъта йын: «Цом мемӕ ӕмӕ, Дунедарӕгыл куыд ӕнувыд дӕн, уый дӕр фен!» Ӕмӕ Йонадав араст ис йемӕ.

¹⁷Самаримӕ куы бахӕццӕ сты, уӕд Йегу амарын кодта, Ахавӕн ма уым чи баззад, уыдоны дӕр. Афтӕмӕй йын йӕ мыггаг бынтондӕр сыскъуыдта, Дунедарӕг Илийайы уылты куыд загъта, афтӕ.

¹⁸Уый фӕстӕ Йегу Самарийы цӕрджыты се ’ппӕты дӕр ӕрӕмбырд кодта ӕмӕ сын загъта: «Ахав фаг нӕ балӕггад кодта Баалӕн, хъуамӕ йын ӕз фылдӕр балӕггад кӕнон.

¹⁹Фӕсидут мын Баалы пехуымпартӕм, йе ’ппӕт лӕггадгӕнджытӕ ӕмӕ йе ’ппӕт сауджынтӕм, иу дӕр дзы ӕнӕ ’рбацӕугӕ куыннӕ баззайа, афтӕ. Баалӕн стыр нывонд хӕсдзынӕн. Чи не ’рбацӕуа, уыдонӕй иу дӕр ӕгасӕй нӕ баззайдзӕн». Ӕцӕгӕй та Йегумӕ хин фӕнд уыдис, Баалы лӕггадгӕнджыты се ’ппӕты дӕр ныццӕгъдыны фӕнд.

²⁰Бардзырд радта Баалы кадӕн бӕрӕгбон скӕныны тыххӕй.

²¹Йегуйы ӕрвыст лӕгтӕ ӕппӕт Израилы зӕххыл дӕр ӕрзылдысты, ӕмӕ Баалы лӕггадгӕнджыты бӕрӕгбонмӕ ӕрӕмбырд кодтой, иу дӕр дзы ӕнӕ ’рбацӕугӕ нӕ баззад. Афтӕмӕй Баалы кувӕндон байдзаг адӕмӕй, къух бакӕнӕн дӕр дзы нал уыд.

²²Бӕрӕгбоны дарӕстӕ кӕй бӕрны уыдысты, уымӕн Йегу бафӕдзӕхста, цӕмӕй Баалы лӕггадгӕнджытӕн дарӕстӕ рахӕсса. Уый рахаста,

²³ӕмӕ Йегу Рехавы фырт Йонадавимӕ Баалы кувӕндонмӕ бацыд ӕмӕ Баалы лӕггадгӕнджытӕн загъта: «Ӕркӕсут-ма, мыййаг, уе ’хсӕн Дунедарӕджы лӕггадгӕнджытӕй исчи ис? Хъуамӕ ам ӕрмӕст Баалы лӕггадгӕнджытӕ уой!»

²⁴Ӕмӕ райдыдтой кусӕрттӕгтӕ кӕнын, иууылсудзинӕгтӕ хӕссын. Ныр Йегу та кувӕндоны ӕдде ӕрӕвӕрдта цыппарыссӕдз лӕджы ӕмӕ сын бафӕдзӕхста: «Баалы адӕмӕй уӕ иунӕджы дӕр удӕгасӕй чи ауадза, уый йӕ бӕсты амӕлдзӕн!»

²⁵Иууылсудзинӕгтӕ хаст куы фесты, уӕд Йегу йӕ хъахъхъӕнджытӕ ӕмӕ ӕфсады хицӕуттӕн загъта: «Цӕугӕут мидӕмӕ ӕмӕ сӕ ныццӕгъдут, иу дӕр сӕ куыннӕуал баззайа, афтӕ!» Уыдон се ’ппӕты дӕр ныццагътой ӕмӕ сын сӕ мӕрдтӕ уынгмӕ раппӕрстой, уый фӕстӕ Баалы кувӕндонмӕ бацыдысты.

²⁶Баалы кувӕндонӕй ӕддӕмӕ рахастой гуымирыты ӕмӕ сӕ басыгътой.

²⁷Баалы гуымиры ныппырх кодтой, йӕ кувӕндон ын фехӕлдтой ӕмӕ дзы уазӕгдон сарӕзтой. Ныронг дӕр афтӕмӕй баззади.

²⁸Афтӕ Йегу Израилы зӕххыл кӕрон скодта Баалӕн.

²⁹Ӕцӕг, дарддӕр фӕзмыдта, Наваты фырт Йоровам Израилы цы тӕригъӕдтыл бафтыдта, уыдон, Вефил ӕмӕ Даны сыгъзӕрин уӕнгуытӕн табу кодта.

³⁰Дунедарӕг Йегуйӕн загъта: «Мӕ рӕстаг фӕндон Мын кӕй сӕххӕст кодтай ӕмӕ Ахавы хӕдзарӕн, Мӕн куыд фӕндыд, афтӕ кӕй бакодтай, уый тыххӕй дӕ байзӕддӕгтӕ цыппӕрӕм фӕлтӕры онг Израилы паддзахы бадӕны баддзысты».

³¹Фӕлӕ Йегу йӕ уды ӕппӕт хъарутӕ нӕ лӕвӕрдта Дунедарӕджы, Израилы Хуыцауы, ӕгъдӕуттӕ ӕххӕст кӕнынӕн. Фӕзмыдта Наваты фырт Йоровамы тӕригъӕдджын митӕ, уыйау Израилы адӕмы кодта тӕригъӕдты амӕттаг.

³²32-33 Паддзах Йегуйы заман Дунедарӕг райдыдта Израилы зӕхх дихтӕ кӕнын. Сирийы паддзах Хазаел бацахста бӕстӕйы стыр хай Иорданӕй скӕсӕнӕрдӕм, Арноны былгӕрон Ароеры сахарӕй райдай ӕмӕ суанг Галаады хӕхбӕстӕ ӕмӕ Башаны къуылдымты онг. Уыдон сты Гады, Рувимы ӕмӕ Менассиайы хӕдзарвӕндӕгты зӕххытӕ.

³⁴Йегуйы иннӕ хъуыддӕгтӕ ӕмӕ йе сгуыхтытӕ иууылдӕр фыст ӕрцыдысты «Израилаг паддзӕхты азфыстыты чиныджы».

³⁵Куы амарди, уӕд ӕй бавӕрдтой йӕ фыдӕлты зӕппадзы, Самарийы. Йӕ фӕстӕ паддзах сси йӕ фырт Йоахаз.

³⁶Йегу Самарийы сахары Израилӕн паддзахиуӕг фӕкодта аст ӕмӕ ссӕдз азы.