Read Хуыцауы Дзырд иронау 1 Азфыстытӕ 13 Bible Online

1 Азфыстытӕ 13 - Хуыцауы Дзырд иронау bible

1 Азфыстытӕ 13

¹Давид уынаффӕ кодта миныхицӕуттимӕ, сӕдӕйыхицӕуттимӕ ӕмӕ ӕппӕт иннӕ раздзӕуджытимӕ.

²Израилы адӕмы ӕмбырдӕн загъта: «Кӕд разы стут ӕмӕ Дунедарӕгӕн, нӕ Хуыцауӕн, фӕндон у, уӕд ардӕм ӕрсидӕм, Израилы алы рӕтты нын чи баззад, уыцы ӕфсымӕртӕм, уыдонимӕ сӕ сахарты ӕмӕ сӕ уӕтӕрты цӕрӕг сауджынтӕ ӕмӕ левиттӕм дӕр,

³ӕмӕ нӕхимӕ рахӕссӕм нӕ Хуыцауы Фидыды Чырын, уымӕн ӕмӕ йыл Саулы заман нӕ сагъӕс кодтам».

⁴Ӕмбырды адӕм сразы сты Давидимӕ, се ’ппӕтмӕ дӕр раст фӕкаст йӕ фӕндон.

⁵Афтӕмӕй, Кирйат-Иаримӕй Хуыцауы Фидыды Чырын ӕрбахӕссыны охыл Давид ӕрӕмбырд кодта ӕппӕт израилӕгты дӕр — Мысыры арӕныл Шихоры цӕугӕдонӕй райдайгӕйӕ Ливаны дӕлвӕзмӕ цӕгатӕрдыгӕй, Хаматы сахарӕй, бахизӕны онг чидӕриддӕр царди, уыдоны.

⁶Давид ӕппӕт израилӕгтимӕ ацыд иудейаг сахар Бааламӕ (ома Кирйат-Иариммӕ), цӕмӕй уырдыгӕй ӕрбахӕссой Хуыцауы Фидыды Чырын, херувимтыл Ӕнцайӕг Дунедарӕджы ном хӕссӕг Чырын.

⁷Хуыцауы Фидыды Чырын ног уӕрдоны раластой Авинадавы хӕдзарӕй. Уӕрдон Узза ӕмӕ Ахйойы бар бакодтой.

⁸Давид ӕмӕ ӕппӕт израилӕгтӕ та Хуыцауы раз фыр цинӕй кафыдысты, зарыдысты ӕмӕ цагътой хъисфӕндыртӕй, дыууадӕстӕнонтӕ, далатӕ, ӕмдзӕгъдгӕнӕнтӕ ӕмӕ хӕтӕлтӕй.

⁹Кидоны мусы цурмӕ куыд бахӕццӕ сты, афтӕ ифтыгъд галтӕ уӕрдон фӕкъул кодтой, ӕмӕ Узза Фидыды Чырынмӕ къухӕй февнӕлдта, ма рахауа, зӕгъгӕ.

¹⁰Фидыды Чырынмӕ къухӕй кӕй февнӕлдта, уый тыххӕй Дунедарӕг смӕсты ис Уззамӕ ӕмӕ йӕ ӕрцавта. Узза уыцы ран, Хуыцауы раз, мардӕй ӕрхауди.

¹¹Давидӕн стыр маст уыди, Дунедарӕг Уззайы кӕй ӕрцавта, уый, ӕмӕ уыцы бынат Перец-Узза рахуыдта. Абон дӕр ӕй афтӕ хонынц.

¹²Уыцы бон Давид тынг фӕтарсти Хуыцауӕй ӕмӕ загъта: «Цы ныфсӕй ма бахӕссон Хуыцауы Фидыды Чырын мӕхимӕ?»

¹³Давид Фидыды Чырын Давиды сахармӕ нал аласта, гатаг Овед-Едомы хӕдзармӕ йӕ арвыста.

¹⁴Хуыцауы Фидыды Чырын Овед-Едомы хӕдзары фӕци ӕртӕ мӕйы, ӕмӕ Дунедарӕгӕй арфӕгонд фесты йӕ хӕдзаронтӕ дӕр ӕмӕ йе ’ппӕт исбон дӕр.