Read Хуыцауы Дзырд иронау 1 Азфыстытӕ 14 Bible Online

1 Азфыстытӕ 14 - Хуыцауы Дзырд иронау bible

1 Азфыстытӕ 14

¹Тиры паддзах Хирам Давидмӕ йӕ минӕвӕртты ӕрбарвыста, семӕ — кедр хъӕдӕрмӕг, ноджы — дурамайджытӕ ӕмӕ хъӕддӕснытӕ, цӕмӕй йын галуан саразой.

²Давид бамбӕрста, Израилӕн ӕй паддзахӕй Дунедарӕг кӕй сӕвӕрдта ӕмӕ йын йӕ паддзахад Израилы, Йӕ адӕмы, сӕраппонд кӕй скадджын кодта.

³Давид ма Йерусалимы дӕр устытӕ скодта, ӕмӕ ма йын уыдонӕй дӕр рацыди фырттӕ ӕмӕ чызджытӕ.

⁴Мӕнӕ, Йерусалимы йын чи райгуырд, уыдоны нӕмттӕ: Шаммуа, Шовав, Натан, Соломон,

⁵Ивхар, Елишуа, Елпелет,

⁶Ногах, Нефег, Йафиа,

⁷Елишама, Беелйада, Елифелет.

⁸Филистимӕгтӕ фехъуыстой, Давиды ӕппӕт Израилӕн паддзахӕй кӕй байсӕрстой, уый ӕмӕ ӕмхуызонӕй йӕ агурӕг фӕраст сты, ӕрцахсӕм ӕй, зӕгъгӕ. Давид уый куы базыдта, уӕд сӕ размӕ рацыд.

⁹Уалынмӕ филистимӕгтӕ ӕрбабырстой Рефаимы дӕлвӕзмӕ.

¹⁰Давид Хуыцауы бафарста: «Филистимӕгты ныхмӕ цӕуон ӕви нӕ? Мӕ къухмӕ сӕ ратдзынӕ?» Дунедарӕг ын загъта: «Цу, ратдзынӕн сӕ дӕ къухмӕ».

¹¹Давид ссыди Баал-Перациммӕ ӕмӕ сӕ уым ныддӕрӕн кодта. Загъта: «Дон йӕ ауӕзт куыд атоны, афтӕ мын мӕ къухӕй ме знӕгты ӕнгом рӕнхъытӕ батыдта Хуыцау». Уымӕ гӕсгӕ ацы бынат схуыдтой Баал-Перацим[1].

¹²Филистимӕгтӕн сӕ хуыцӕуттӕ уым дзӕгъӕлӕй баззадысты, ӕмӕ сӕ Давид арты басудзын кодта.

¹³Филистимӕгтӕ та ногӕй Рефаимы дӕлвӕзмӕ бабырстой.

¹⁴Давид та Хуыцауы бафарста, ӕмӕ йын Уый дзуапп радта: «Сӕ ныхмӕ ма ссу, фӕлӕ сӕ иувӕрсты ӕрзил ӕмӕ тута бӕлӕсты къохы ’рдыгӕй сӕ чъылдыммӕ баздӕх.

¹⁵Ӕмӕ дӕм, цыма, тута бӕлӕсты цъуппытӕй къахуынӕр хъуысы, афтӕ куы фӕкӕса, уӕд-иу райдай хӕцын — уый Хуыцау рацыди дӕ разӕй филистимӕгты ӕфсад цӕгъдынмӕ».

¹⁶Давид сӕххӕст кодта Хуыцауы фӕдзӕхст ӕмӕ филистимӕгты дӕрӕн кодта Гивонӕй суанг Гезеры онг.

¹⁷Ӕмӕ айхъуысти Давиды ном ӕппӕт бӕстӕтыл, Дунедарӕджы фӕндонӕй дзы стъӕлфын байдыдтой ӕппӕт адӕмтӕ иууылдӕр.