Read Хуыцауы Дзырд иронау 1 Азфыстытӕ 5 Bible Online

1 Азфыстытӕ 5 - Хуыцауы Дзырд иронау bible

1 Азфыстытӕ 5

¹Израилы зӕнӕджы хистӕр Рувим уыди, фӕлӕ йӕ фыды хуыссӕн куы фӕчъизи кодта, уӕд йӕ хистӕры кад лӕвӕрд ӕрцыд Израилы фырт Йосефы фырттӕн; ӕцӕг, хӕдзарвӕндӕгты номхыгъды Йосеф хистӕрыл нымад нӕу.

²Иудӕ йе ’фсымӕртӕй тыхджындӕр уыд, ӕмӕ фӕтӕг уымӕй равзӕрди, кӕд хистӕры кад Йосефӕн лӕвӕрд уыд, уӕддӕр.

³Израилы зӕнӕджы хистӕр Рувимы фырттӕ: Ханох, Паллу, Хецрон, Карми.

⁴Иоелы байзӕддӕгтӕ: йӕ фырт Шемайа, уый фырт Гог, уый фырт Шими,

⁵уый фырт Миха, уый фырт Реайа, уый фырт Баал,

⁶уый фырт Беера, Ассирийы паддзах Тиглат-Пилесер уацары кӕй атардта, уый. Уыди Рувимы байзӕддӕгты фӕтӕг.

⁷Йе ӕрвадӕлтӕ, мыггаггай, сӕ хӕдзарвӕндаджы номхыгъды куыд фыст сты, афтӕ: хистӕр — Йеиел, уый дӕле — Захариа

⁸ӕмӕ Бела. Белайы фыдӕлтӕ — кӕстӕрӕй хистӕрмӕ — Азаз, Шема ӕмӕ Иоел. Рувимы байзӕддӕгтӕ цардысты Ароеры сахары ӕмӕ уымӕй цӕгатӕрдӕм дӕр, суанг Нево ӕмӕ Баал-Меоны онг;

⁹скӕсӕнӕрдыгӕй та — Евфраты доны ацы фарс ӕдзӕрӕг быдыры онг, уымӕн ӕмӕ Галаады зӕххыл сбирӕ сты сӕ фосы дзугтӕ.

¹⁰Саулы заман Рувимы фӕдонтӕ хӕцыдысты агарӕгтимӕ. Ныццагътой сӕ ӕмӕ сын сӕ цатырты ӕрцардысты Галаады ӕппӕт скӕсӕнварс.

¹¹Гады байзӕддӕгтӕ цардысты Башаны зӕххыл, суанг Салхайы онг. Рувимы хӕдзарвӕндагимӕ уыдысты ӕмарӕн.

¹²Башаны цӕрджытӕн бӕстыхицау уыд Иоел, дыккаг лӕг — Шафам, дарддӕр — Йанай ӕмӕ Шафат.

¹³Се ӕрвадӕлтӕ мыггаггай: Михаел, Мешуллам, Шева, Йорай, Йакан, Зиа, Евер — авд.

¹⁴Уыдон Авихаилы фырттӕ сты; йӕ фыдӕлтӕ кӕстӕрӕй хистӕрмӕ: Хури, Йароах, Гилад, Михаел, Йешишай, Йахдо, Буз.

¹⁵Гунийы байзӕддаг Авдиелы фырт Ахи уыди сӕ мыггаджы хистӕр.

¹⁶Цардысты Галаады зӕххыл, Башаны хъӕуты, стӕй Шароны ӕппӕт уӕтӕрты, суанг сӕ арӕнты онг.

¹⁷Адон сӕ фыдӕй-фыртмӕйы номхыгъды фыст ӕрцыдысты иудейаг паддзах Йотам ӕмӕ израилаг паддзах Йоровамы заманы.

¹⁸Рувим ӕмӕ Гады байзӕддӕгтӕм, стӕй Менассиайы хӕдзарвӕндаджы ӕмбисмӕ уыди цыппор цыппар мин авдсӕдӕ хӕстифтонг хъӕбатыры; зыдтой кард ӕмӕ уартимӕ хӕцын, стӕй фатӕй ӕхсын.

¹⁹Уыдон хӕцыдысты агараг мыггӕгтӕ Йетур, Нафиш ӕмӕ Нодавимӕ.

²⁰Тӕккӕ тохы сахат Хуыцаумӕ кӕй скуывтой, сӕ зӕрдӕ Йыл кӕй дардтой, уымӕ гӕсгӕ сын Уый сӕ куывд фехъуыста ӕмӕ сын баххуыс кодта, ӕмӕ агарӕгтӕ, семӕ чидӕриддӕр уыд, уыдонимӕ сӕ амӕттаг баисты.

²¹Ратардтой сын сӕ фос: дӕс ӕмӕ дыууиссӕдз мины теуатӕ, дыууӕсӕдӕ фӕндзай мины лыстӕг фос, дыууӕ мины та хӕрджытӕ. Сӕ адӕмӕй сын сӕдӕ мины райстой уацары.

²²Цагъды дӕр сӕ бирӕ фӕци, уымӕн ӕмӕ Хуыцауы фӕндон уыд ацы хӕст. Адон та сын сӕ цӕрӕнты фӕцардысты, цалынмӕ сын сӕхи дӕр уацары нӕ атардтой, уӕдмӕ.

²³Менассиайы хӕдзарвӕндаджы иу ӕмбис цардысты Башанӕй Баал-Хермоны онг, стӕй Сенир ӕмӕ Ермоны хӕхты онг зӕххыты. Дзӕвгар уыди сӕ нымӕц.

²⁴Мӕнӕ сӕ мыггӕгты хистӕртӕ: Ефер, Иши, Елиел, Азриел, Йеремиа, Ходави ӕмӕ Йахдиел, уыдысты ӕхсарджын хӕстонтӕ, номдзыд лӕгтӕ.

²⁵Фӕлӕ Рувимы, Гады ӕмӕ Менассиайы байзӕддӕгтӕ сӕ фыдӕлты Хуыцауыл сӕ зӕрдӕ куы сивтой ӕмӕ, Хуыцау сын сӕ цуры цы бӕстӕйы адӕмты ныццагъта, уыдоны хуыцӕуттӕм кувын куы байдыдтой,

²⁶уӕд сын Израилы Хуыцау сӕ ныхмӕ самидин кодта Ассирийы паддзах Пулы — йӕ иннӕ ном Тиглат-Пилесер, — ӕмӕ уый Рувимы, Гады ӕмӕ Менассиайы хӕдзарвӕндагӕн йе ’мбис уацары райста, акодта сӕ Халахмӕ, Хавормӕ, Харамӕ ӕмӕ Гозаны донмӕ, ӕмӕ ма абоны онг дӕр цӕрынц уым.