Read Хуыцауы Дзырд иронау 2 Азфыстытӕ 17 Bible Online

2 Азфыстытӕ 17 - Хуыцауы Дзырд иронау bible

2 Азфыстытӕ 17

¹Асайы амӕлӕты фӕстӕ паддзах сси йӕ фырт Иосафат ӕмӕ Израилы ныхмӕ йӕ тыхтӕ ӕрӕмбырд кодта.

²Иудейы фидаргонд сахартӕм йе ’фсӕдтӕ барвыста, стӕй ӕгас Иудейы зӕххыл ӕмӕ, йӕ фыд Аса Ефремы зӕххыл цы сахартӕ бацахста, уыдоны дӕр йе ’фсӕдтон къордтӕ равӕрдта.

³Дунедарӕг аудыдта Иосафатыл, уымӕн ӕмӕ уый алцӕмӕй дӕр фӕзмыдта, йӕ фыдӕл Давид йӕ паддзахиуӕджы райдиан цы хъуыддӕгтӕ кодта, уыдон: Баалтӕн нӕ куывта,

⁴фӕлӕ ӕрцагуырдта йӕ фыдӕлты Хуыцауы ӕмӕ Йын ӕххӕст кодта Йӕ фӕдзӕхстытӕ. Израилӕгты хъуыддӕгтӕ нӕ фӕзмыдта.

⁵Ӕмӕ йын Дунедарӕг йӕ паддзахдзинад ӕрфидар кодта. Иудейӕгтӕ йын иууылдӕр хастой лӕвӕрттӕ, ӕмӕ Иосафат сси тынг хъӕздыг ӕмӕ номдзыд паддзах.

⁶Ӕппӕт зӕрдӕйӕ архайдта Дунедарӕджы фӕндон ӕххӕст кӕныныл. Иудейы зӕххыл мӕнгхуыцӕуттӕн арӕзт кувӕн къуыбыртӕ фехӕлдта ӕмӕ акалдта Ашерӕйы цӕджындзтӕ.

⁷Йӕ паддзахиуӕджы ӕртыккӕгӕм аз Иосафат йӕ барджынтӕ Бен-Хаил, Овади, Захариа, Нетанел ӕмӕ Михайы арвыста Иудейы алы сахартӕм, адӕмы ахуыр кӕнынмӕ.

⁸Семӕ сын левиттӕй арвыста Шемайа, Нетаниа, Зевадиа, Асаел, Шемирамот, Йонатан, Адониа, Товийа ӕмӕ Тов-Адониайы, ноджы ма сауджынты, Елишама ӕмӕ Йорамы.

⁹Уыдон семӕ ахастой Дунедарӕджы Ӕгъдауы чиныг, ӕппӕт иудейаг сахартыл ӕрзылдысты ӕмӕ адӕмы ахуыр кодтой.

¹⁰Иудейы алыварс цы паддзахӕдтӕ уыди, уыдоныл Дунедарӕджы раз тас бахӕцыд, ӕмӕ сӕ ныфс нӕ хастой Иосафаты ныхмӕ схӕцынмӕ.

¹¹Филистимӕгтӕй чидӕртӕ Иосафатӕн хастой лӕвӕрттӕ, хъалоны охыл — ӕвзист. Араббӕгтӕ йын ӕрбатардтой лыстӕг фосы дзугтӕ: авд мин ӕмӕ авдсӕдӕ фыры, стӕй авд мин ӕмӕ авдсӕдӕ цӕуы.

¹²Иосафатӕн йӕ хъомыс фылдӕрӕй-фылдӕр кодта. Иудейы зӕххыл сарӕзта фидӕрттӕ, стӕй сахартӕ ӕфтауцуатӕн.

¹³Иудейы сахарты йын бирӕ мулк уыди, Йерусалимы та ӕрбынат кодтой йӕ хуыздӕр хӕстонтӕ.

¹⁴Мӕнӕ сӕ номхыгъд сӕ мыггӕгтӕм гӕсгӕ. Иудӕйы хӕдзарвӕндагӕй — миныхицӕуттӕ: ӕфсады хицау Адна ӕмӕ йемӕ ӕртӕсӕдӕ мин ӕхсарджын хӕстоны;

¹⁵уый дӕлбар — ӕфсады хицау Йоханан ӕмӕ йемӕ дыууӕсӕдӕ ӕстай мин лӕджы;

¹⁶уый дӕлбар — ӕфсады хицау Амасиа, Зихрийы фырт, Дунедарӕгӕн бархийӕ лӕггадгӕнӕг, йемӕ — дыууӕсӕдӕ мин ӕхсарджын хӕстоны.

¹⁷Миныхицӕуттӕ Бениамины хӕдзарвӕндагӕй: ӕхсарджын хӕстон Елйада ӕмӕ йемӕ дыууӕсӕдӕ мин лӕджы — ӕрдынтӕ ӕмӕ уартытӕй ифтонг;

¹⁸уый дӕлбар — ӕфсады хицау Йозавад ӕмӕ йемӕ сӕдӕ ӕстай мин гӕрзифтонг хӕстоны.

¹⁹Адон иууылдӕр лӕггад кодтой паддзахӕн, ӕгас Иудейы фидаргонд сахарты цы ’фсӕдтӕ ӕрӕвӕрдта, уыдонӕй уӕлдай.