Read Хуыцауы Дзырд иронау 2 Азфыстытӕ 30 Bible Online

2 Азфыстытӕ 30 - Хуыцауы Дзырд иронау bible

2 Азфыстытӕ 30

¹Езекиа фӕсидти ӕгас Израил ӕмӕ Иудейы цӕрджытӕм. Ефрем ӕмӕ Менассиайы мыггӕгтӕм дӕр фыстӕджытӕ арвыста, фӕхуыдта сӕ Йерусалиммӕ, Дунедарӕджы Кувӕндонмӕ — Дунедарӕджы, Израилы Хуыцауы, Куадзӕнмӕ.

²Паддзах, йӕ барджынтӕ ӕмӕ Йерусалимы дзыллӕйы ӕппӕт минӕвӕрттӕ бауынаффӕ кодтой Куадзӕны бӕрӕгбон дыккаг мӕйы саразын.

³Йӕ афоныл ын нӕ уыди скӕнӕн, уымӕн ӕмӕ уӕд нырма, цас ӕмбӕлди, уый бӕрц сауджынтӕ нӕма ссыгъдӕг кодтой сӕхи, стӕй адӕм дӕр се ’ппӕт нӕма ӕрӕмбырд сты Йерусалиммӕ.

⁴Афтӕ бакӕнын паддзахмӕ дӕр ӕмӕ ’ппӕт ӕмбырдмӕ дӕр раст фӕкасти.

⁵Ӕмӕ сфӕнд кодтой фехъусын кӕнын ӕгас Израилӕн, Беер-Шевӕйӕ Даны онг, цӕмӕй иууылдӕр ӕрбацӕуой Йерусалиммӕ, Дунедарӕджы, Израилы Хуыцауы, Куадзӕнмӕ. Уымӕн ӕмӕ, Ӕгъдауы чиныджы куыд фыст ис, афтӕ йӕ рагӕй нал сбӕрӕг кодтой.

⁶Паддзах ӕмӕ йӕ барджынты номӕй фидиуджытӕ ӕгас Израил ӕмӕ Иудейыл фыстӕджытимӕ ӕрзылдысты ӕмӕ паддзахы бардзырд хъусын кодтой: «Израилы адӕм! Уе ’ргом раздахут Дунедарӕгмӕ, Авраам, Исаак ӕмӕ Израилы Хуыцаумӕ, ӕмӕ уӕд Уый дӕр Йе ’ргом раздахдзӕни сымахмӕ, Ассирийы паддзӕхтӕй ма уӕ чи аирвӕзти, уыдонмӕ.

⁷Уӕ фыдӕлтӕ ӕмӕ уе ’фсымӕртӕ Дунедарӕгыл, уӕ фыдӕлты Хуыцауыл, иузӕрдион кӕй нал уыдысты, уый тыххӕй сӕ Уый гӕныстонмӕ ӕркодта. Уымӕн уӕхӕдӕг стут ӕвдисӕн.

⁸Ӕмӕ уӕ фыдӕлтау хиваст ма ут, Дунедарӕджы коммӕ кӕсут. Ӕрбацӕут Ын Йӕ Кувӕндонмӕ, мыггагмӕ кӕй ссыгъдӕг кодта, уырдӕм. Лӕггад кӕнут уӕ Дунедарӕг Хуыцауӕн, ӕмӕ уӕ иуварс аздаха Йӕ судзгӕ маст.

⁹Уе ’ргом Дунедарӕгмӕ куы раздахат, уӕд уын уӕ хӕстӕджытӕ ӕмӕ уӕ цоты уацары чи райста, уыдон сӕ нал ӕфхӕрдзысты, ӕмӕ фӕстӕмӕ ацы бӕстӕмӕ ’рбаздӕхдзысты, уымӕн ӕмӕ Дунедарӕг, уӕ Хуыцау, бараг ӕмӕ тӕригъӕдгӕнаг у. Уе ’ргом ӕм куы раздахат, уӕд уыл Уый дӕр Йӕхи нал атигъ кӕндзӕн».

¹⁰Фидиуджытӕ цыдысты иу сахарӕй иннӕмӕ, Ефрем ӕмӕ Менассиайы зӕххытыл ӕрзылдысты, суанг Зевулоны арӕнтӕм дӕр бахӕццӕ сты, фӕлӕ сыл адӕм худӕгӕй сӕхи хастой, хынджылӕг сӕ кодтой.

¹¹Фӕлӕ уӕддӕр Асир, Менассиа ӕмӕ Зевулоны хӕдзарвӕндӕгтӕй чидӕртӕ ӕрныллӕг кодтой сӕхи ӕмӕ ӕрбацыдысты Йерусалиммӕ.

¹²Дунедарӕг Иудейы цӕрджытыл Йӕ арм дардта, иу зондахаст сын радта, ӕмӕ сӕххӕст кодтой, паддзах ӕмӕ сын йӕ барджынтӕ Дунедарӕджы фӕдзӕхстмӕ гӕсгӕ цы бардзырд радтой, уый.

¹³Дыккаг мӕй Йерусалимы Донгонд дзулты бӕрӕгбонмӕ ӕрӕмбырд ис тынг бирӕ адӕм.

¹⁴Йерусалимы ӕцӕгӕлон хуыцӕуттӕн цы нывондхӕссӕнтӕ уыди, уыдон иууылдӕр, стӕй будсудзӕн нывондхӕссӕнтӕ ныппырх кодтой ӕмӕ сӕ Кедроны тӕрфмӕ ныппӕрстой.

¹⁵Уый фӕстӕ, дыккаг мӕйы цыппӕрдӕсӕм бон, аргӕвстой Куадзӕны уӕрыччы. Сауджынтӕ ӕмӕ левиттӕ сӕхиуыл ӕрхудтысты, ссыгъдӕг кодтой сӕхи ӕмӕ Дунедарӕджы Кувӕндонмӕ иууылсудзинаг нывӕндтӕ ’рбахастой.

¹⁶Алчидӕр дзы йӕ бынаты ӕрлӕууыди, Хуыцауы ӕвзӕрст лӕг Моисейӕ сын цы Ӕгъдау баззад, уымӕ гӕсгӕ. Сауджынтӕ левитты къухӕй истой нывондӕгты туг ӕмӕ йӕ пырх кодтой нывондхӕссӕныл.

¹⁷Бӕрӕгбонмӕ ’рцӕуӕг адӕмӕй сыгъдӕггонд чи нӕма уыд, уыдон тынг бирӕ уыдысты, ӕмӕ левиттӕн бабар кодтой, ӕнӕсыгъдӕг чи уыд ӕмӕ уымӕ гӕсгӕ йӕ бон Дунедарӕгӕн уӕрыкк снывонд кӕнын кӕмӕн нӕ уыди, уыдонӕй алкӕй тыххӕй дӕр аргӕвдын Куадзӕны уӕрыччытӕ.

¹⁸Адӕмӕй бирӕтӕ, фылдӕр та Ефрем, Менассиа, Иссахар ӕмӕ Зевулоны хӕдзарвӕндӕгтӕй, сӕхи не ссыгъдӕг кодтой, фӕлӕ уӕддӕр хордтой Куадзӕны фынгӕй, кӕд Ӕгъдаумӕ гӕсгӕ афтӕ не ’мбӕлдис, уӕддӕр.

¹⁹Езекиа уыдоны тыххӕй скуывта: «Хӕрзаудӕнгӕнаг Дунедарӕг ныххатыр кӕнӕд, Дунедарӕгмӕ, йӕ фыдӕлты Хуыцаумӕ, ӕппӕт зӕрдӕйӕ чи тырны, фӕлӕ Кувӕндоны ӕгъдаумӕ гӕсгӕ йӕхи ссыгъдӕг кӕнын кӕмӕн нӕ бантысти, уыдонӕн!»

²⁰Дунедарӕг фехъуыста Езекиайы куывд ӕмӕ ныббарста адӕмӕн.

²¹Къуырийы дӕргъы Израилы адӕм, Йерусалимы чи ӕрӕмбырд ис, уыдон, тынг хъӕлдзӕгӕй ӕрвыстой Донгонд дзулты бӕрӕгбон. Левиттӕ ӕмӕ сауджынтӕ Дунедарӕгӕн алы бон дӕр кады зарджытӕ кодтой, Дунедарӕджы стауынӕн цы зӕлуадзӕнтӕ сарӕзтӕуыд, уыдонӕй цӕгъдгӕйӕ.

²²Езекиа левиттӕн се ’ппӕтӕн дӕр арфӕтӕ ракодта, Дунедарӕгӕн, куыд ӕмбӕлы, афтӕ кӕй лӕггад кодтой, уый тыххӕй. Уыдон къуырийы дӕргъы кусӕртты дзидзайӕ хордтой, фидыды нывӕндтӕ хастой ӕмӕ кад кодтой Дунедарӕгӕн, сӕ фыдӕлты Хуыцауӕн.

²³Адӕмы ма бафӕндыди бӕрӕгбоныл иу къуыри бафтауын, ӕмӕ та уыцы къуыри дӕр хъӕлдзӕгӕй арвыстой.

²⁴Уымӕн ӕмӕ ма сын Иудейы паддзах Езекиа мин галы раттын кодта, авд мины та — лыстӕг фос. Барджынтӕ дӕр сын мин галы рахицӕн кодтой, дӕс мины та — лыстӕг фос. Сауджынтӕй дӕр ма бирӕтӕ сӕхи ссыгъдӕг кодтой.

²⁵Чи ӕрӕмбырд ис, уыцы адӕм иууылдӕр цин кодтой: иудейӕгтӕ, сауджынтӕ, левиттӕ ӕмӕ израилӕгтӕ, стӕй Израил ӕмӕ Иудейы ӕрцӕуӕггагӕй чи царди, уыдон.

²⁶Израилы паддзах Давиды фырты, Соломоны, заманӕй Йерусалимы ахӕм хъӕлдзӕг бӕрӕгбон никуыуал уыди.

²⁷Сауджынтӕ ӕмӕ левиттӕ адӕмӕн арфӕтӕ кодтой, ӕмӕ сын Хуыцау сӕ куывд айста, уымӕн ӕмӕ сӕ куывд ссыди уӕларвмӕ, Йӕ уаз цӕрӕнмӕ.