Read Хуыцауы Дзырд иронау 2 Азфыстытӕ 4 Bible Online

2 Азфыстытӕ 4 - Хуыцауы Дзырд иронау bible

2 Азфыстытӕ 4

¹Соломон сарӕзта ӕрхуы нывондхӕссӕн: йӕ дӕргъ уыди ссӕдз ӕлмӕрины, йӕ уӕрх дӕр — ссӕдз ӕлмӕрины, йӕ бӕрзӕнд та — дӕс ӕлмӕрины.

²Джиппы рауагъта тымбыл ӕрхуы денджыз, йӕ фӕтӕн — дӕс ӕлмӕрины, йӕ бӕрзӕнд — фондз ӕлмӕрины, йӕ зиллакк та — дӕс ӕмӕ ссӕдз ӕлмӕрины.

³Йӕ зиллаккыл бынӕй уыди галты нывтӕ, дыууӕ рӕнхъӕй ӕртыхстысты денджызыл. Сӕ уӕрх уыди дӕс ӕлмӕрины, денджызимӕ уыдысты иу джиппы уагъд.

⁴Денджыз лӕууыди дыууадӕс галыл: ӕртӕ дзы касти цӕгатӕрдӕм, ӕртӕ — ныгуылӕнӕрдӕм, ӕртӕ — хуссарӕрдӕм, ӕртӕ та — скӕсӕнӕрдӕм. Сӕ чъылдымтӕ уыдысты мидӕджырдӕм, денджызы бынмӕ, здӕхт.

⁵Денджызӕн йӕ бӕзн уыди армытъӕпӕны йас, йӕ был та уыди нуазӕны былты хуызӕн, раст, хъоппӕг дидинӕг куы райхӕлы, уый ӕнгӕс. Дон дзы цыди ӕртӕ мин баты бӕрц.

⁶Ноджы ма Соломон скодта дӕс ӕрхуы тъӕпӕнӕджы ӕмӕ дзы фондз ӕрӕвӕрдта Кувӕндонӕн йӕ рахизфарс, фондз та — йӕ галиуфарс. Уыдоны мидӕг хъуамӕ ӕхсадтаиккой иууылсудзинӕгты уӕнгтӕ. Ӕрхуы денджыз та сауджынтӕн конд уыд, сӕхи ӕхсынӕн.

⁷Ноджы ма скодта дӕс цырагъдарӕны, фӕткмӕ гӕсгӕ, ӕмӕ сӕ Кувӕндоны агъуысты ӕрӕвӕрдта, фондз — рахизӕрдыгӕй, фондз та — галиуӕрдыгӕй.

⁸Ноджы ма сарӕзта дӕс фынджы ӕмӕ сӕ Кувӕндоны агъуысты сӕвӕрдта, фондз — рахизӕрдыгӕй, фондз та — галиуӕрдыгӕй. Сарӕзта сӕдӕ сыгъзӕрин кӕхцы, туг пырх кӕнынӕн.

⁹Ноджы ма скодта сауджынты кӕрт, стӕй стыр кӕрт ӕмӕ кулдуӕрттӕ кӕртмӕ цӕуынӕн. Кулдуӕртты цӕджындзтӕ састӕрдта ӕрхуыйӕ.

¹⁰Соломон ӕрхуы денджыз сӕвӕрдта рахизӕрдыгӕй, Кувӕндонӕн йӕ хуссар-скӕсӕйнаг фисыны цур.

¹¹Ноджы ма Хурам скодта къӕртатӕ, фыййӕгтӕ, тугпырхгӕнӕн кӕхцытӕ. Ӕмӕ уыйадыл Хурам фӕци, Соломонӕн Хуыцауы Кувӕндоны цы куыстытӕ кодта, уыдон. Уый сарӕзта:

¹²дыууӕ цӕджындзы; дыууӕ кӕхцӕнгӕс ӕфтуаны цӕджындзты цъуппытӕн; дыууӕ рӕхысы кӕхцӕнгӕс ӕфтуантӕн;

¹³цыппарсӕдӕ гранат фӕткъуыйы згъӕрнывтӕ кӕхцӕнгӕс ӕфтуанты рӕхыстыл, алы ӕфтуаныл дӕр — дыргъты дыууӕ рӕнхъы;

¹⁴дӕс суанцъыйы быцӕутыл; суанцъытыл ӕвӕрд дӕс аджы;

¹⁵иу ӕрхуы денджыз, йӕ быны — дыууадӕс галы;

¹⁶къӕртатӕ, фыййӕгтӕ, фыдистӕ. Хурам-Авиа паддзах Соломонӕн Дунедарӕджы Кувӕндоны тыххӕй цыдӕриддӕр скодта, уыдон иууылдӕр уыдысты лӕгъзгонд ӕмӕ ӕрттиваг ӕрхуыйӕ конд.

¹⁷Паддзах сӕ джиппы рауадзын кодта Иорданы дӕлвӕзы, Суккот ӕмӕ Цередайы ’хсӕн, ӕлыгбын мӕры.

¹⁸Соломон ӕрхуыйӕ цы дзауматӕ скӕнын бафӕдзӕхста, уыдон уый бӕрц уыдысты, ӕмӕ сыл ӕрхуы цас ацыди, уымӕн банымайӕн дӕр нӕ уыди.

¹⁹19-22 Ноджы ма Соломон саразын кодта Дунедарӕджы Кувӕндоны иннӕ дзауматӕ дӕр: сыгъзӕрин нывондхӕссӕн; кувӕггаг дзулты фынг; цырагъдарӕнтӕ — сыгъдӕг сыгъзӕринӕй конд, сӕ цырӕгътимӕ, Рухсмонуатмӕ бацӕуӕны раз судзынӕн; дидинсыф фӕлындӕнтӕ, цырӕгътӕ, ӕртыскӕнтӕ, иууылдӕр — сыгъдӕг сыгъзӕринӕй конд; хӕсгӕрдтӕ, кӕхцытӕ, цолпытӕ, будсудзӕнтӕ, иууылдӕр — сыгъдӕг сыгъзӕринӕй конд; Кувӕндоны дуӕрттӕ: Рухсмонуаты дуар ӕмӕ Кувӕндоны сӕйраг агъуысты дуар, уыдон дӕр уыдысты сыгъзӕринӕй конд.