Read Хуыцауы Дзырд иронау Езра 4 Bible Online

Езра 4 - Хуыцауы Дзырд иронау bible

Езра 4

¹Иудӕ ӕмӕ Бениамины знӕгтӕн сӕ хъустыл ӕрцыд, уацарӕй чи ӕрбаздӕхти, уыдон Дунедарӕджы, Израилы Хуыцауы хӕдзар аразынц, зӕгъгӕ.

²Зоровавел ӕмӕ мыггӕгты хистӕртӕм ӕрбацыдысты ӕмӕ сын загътой: «Мах дӕр уемӕ Кувӕндон араздзыстӕм, уымӕн ӕмӕ нӕ Ассирийы паддзах Есар-Хаддон ам куы ’рцӕрын кодта, уӕдӕй абонмӕ мах дӕр сымахау нӕхи уӕ Хуыцауыл фӕдзӕхсӕм ӕмӕ Йын нывӕндтӕ хӕссӕм».

³Фӕлӕ сын Зоровавел, Йешуа ӕмӕ Израилы хӕдзарвӕндӕгты иннӕ хистӕртӕ загътой, махӕн, дам, уемӕ аразгӕ нӕу хӕдзар нӕ Хуыцауӕн. Дунедарӕгӕн, Израилы Хуыцауӕн, мах нӕхӕдӕг сараздзыстӕм хӕдзар, Персы паддзах Кир нын куыд бафӕдзӕхста, афтӕ.

⁴Уыйадыл уымы адӕм иудейӕгты размӕ цӕлхдуртӕ ӕвӕрын райдыдтой, тӕрсын сӕ кодтой ӕмӕ сын сӕ арӕзтад къуылымпы кодтой.

⁵Цӕмӕй хъуыддагӕй мацы рауайа, уый тыххӕй уынаффӕгӕнджытӕн гӕртӕмттӕ лӕвӕрдтой. Афтӕ кодтой, Кир Персы паддзах куы уыди, уӕд. Афтӕ кодтой Дарийы паддзахиуӕджы райдайӕны онг.

⁶Ксеркс куы сси паддзах, уӕд та цъыфкалӕнтӕ фӕфыстой Иудейы ӕмӕ Йерусалимы цӕрджытыл.

⁷Артаксерксы заман дӕр Бишлам, Митредат, Тавел ӕмӕ се ’мбӕлттӕ арамейаг дамгъӕтӕй ныффыстой Артаксерксмӕ, Персы паддзахмӕ, арамейаг ӕвзагыл.

⁸Уынаффӕйы лӕг Рехум ӕмӕ нымӕрдар Шимшай Йерусалимы ныхмӕ сӕ иу фыстӕджы афтӕ фыстой Артаксерксмӕ:

⁹«Рехум, уынаффӕйы лӕг, нымӕрдар Шимшай ӕмӕ сӕ иннӕ ӕмкусджытӕ — динайӕгтӕ, афарсатхӕгтӕ, тарплайӕгтӕ[1], афарсатхӕгтӕ, аркевӕгтӕ, вавилойнӕгтӕ, дегайӕгтӕ, еламӕгтӕ Шушанӕй,

¹⁰стӕй хъомысджын ӕмӕ цытджын Ашшурбанипал уацары кӕй райста, Самарийы сахарты ӕмӕ доны фале иннӕ сахарты кӕй ӕрцӕрын кодта, уыцы адӕмтӕ, ӕмӕ афтӕ дарддӕр».

¹¹Сӕ фыстӕджы мӕнӕ куыд загъдӕуыди: «Паддзах Артаксерксмӕ, бирӕ цӕра, — йӕ цагъартӕ, доны фале цӕрджытӕ, ӕмӕ афтӕ дарддӕр.

¹²Паддзах хъуамӕ зона, йӕ разӕй рацӕуӕг иудейӕгтӕ кӕй ӕрбацыдысты махмӕ Йерусалиммӕ ӕмӕ ногӕй аразынц ацы ӕнӕсӕттон ӕмӕ хъӕхъхъаг сахар. Йӕ къултӕ йын амайынц, йӕ бындуртӕ йын фидар кӕнынц.

¹³Паддзахӕн хъуамӕ зындгонд уа: ацы сахар арӕзт куы ’рцӕуа ӕмӕ йын йӕ къултӕ амад куы фӕуой, уӕд уыдон налдӕр хъалон, налдӕр фиддон, налдӕр илци фиддзысты, ӕмӕ уый паддзахы къазнайӕн ӕнӕмӕнг зиан уыдзӕни.

¹⁴Мах паддзахы раз хӕсджын кӕй стӕм[2], уымӕ гӕсгӕ, исчи паддзахӕн зиан ӕрхӕсса, уымӕ кӕсын нӕ бон нӕу, ӕмӕ йын, хабар куыд у, уый хъусын кӕнӕм.

¹⁵Рафӕлдахын кӕн дӕ фыдӕлты зӕрдылдарӕн хабӕртты чиныг ӕмӕ дзы бакӕсдзынӕ, Йерусалим, змӕнтгӕ чи кӕны, паддзӕхтӕн дӕр ӕмӕ бӕстӕйы алы кӕрӕттӕн дӕр зиан чи хӕссы, ахӕм сахар кӕй у, уый. Рагӕй-ӕрӕгмӕ дӕр уисӕн нӕ кӕны ӕмӕ дӕрӕнгонд дӕр уый аххосӕй ӕрцыдис.

¹⁶Уымӕ гӕсгӕ мах паддзахӕн хъусын кӕнӕм: ацы сахар фӕстӕмӕ куы рацаразой ӕмӕ йӕ къултӕ куы срӕвдз уой, уӕд-иу, доны фале дын цы исбон ис, ууыл дӕ къух ауигъ».

¹⁷Паддзах дзуапп арвыста уынаффӕгӕнӕг Рехуммӕ ӕмӕ нымӕрдар Шимшаймӕ, стӕй Самарийы ӕмӕ доны фале иннӕ сахарты цӕрӕг сӕ иннӕ ӕмбӕлттӕм: «Дунейы фарн уын ӕххуысгӕнӕг уӕд!

¹⁸Уӕ фыстӕг мын лӕмбынӕг бакастысты.

¹⁹Мӕ фӕндонмӕ гӕсгӕ сбӕлвырд кодтой, уыцы сахар рагӕй-ӕрӕгмӕ дӕр паддзӕхты ныхмӕ растынмӕ цӕттӕ кӕй уыд ӕмӕ-иу дзы уымӕ гӕсгӕ змӕстытӕ ӕмӕ хъӕлӕбатӕ кӕй рауадис, уый.

²⁰Йерусалимы уыдис, доны фале ӕгасӕй дӕр кӕй къухы уыди, хъалонтӕ, фиддонтӕ ӕмӕ илци фыст кӕмӕн цыдис, ахӕм домбай паддзӕхтӕ.

²¹Уӕдӕ афтӕ: бардзырд раттут, цӕмӕй уыцы адӕм сӕ куыст ныууромой ӕмӕ, цалынмӕ мӕнӕй бар лӕвӕрд нӕ уа, уӕдмӕ уыцы сахар аразынмӕ мачиуал бавнала.

²²Лӕмбынӕг кӕсут, ӕнӕрхъуыдыйӕ уӕ мацы аирвӕзӕд. Паддзӕхтӕн зиан цы хӕссы, уый куынӕг кӕнын хъӕуы».

²³Паддзах Артаксерксы фыстӕг Рехум ӕмӕ Шимшайыл се ’мбӕлттимӕ куыддӕр сӕмбӕлди, афтӕ уыдон иудейӕгтӕм гӕрзифтонгӕй атындзыдтой Йерусалиммӕ ӕмӕ сын сӕ куыст баурӕдтой.

²⁴Афтӕ Йерусалимы Хуыцауы хӕдзар аразыны куыст ӕрлӕууыд ӕмӕ Персы паддзах Дарийы паддзахиуӕджы дыккӕгӕм азмӕ размӕ нал ацыди.