Read Хуыцауы Дзырд иронау Езра 8 Bible Online

Езра 8 - Хуыцауы Дзырд иронау bible

Езра 8

¹Ранымайдзынӕн, паддзах Артаксерксы заман мемӕ Вавилонӕй чи рацыди, уыцы мыггӕгты хистӕрты нӕмттӕ, сӕ хӕдзарвӕндӕгтӕ.

²Пинхасы мыггагӕй — Гершон; Итамары мыггагӕй — Даниил; Давиды мыггагӕй — Хаттуш

³(Шеханиайы байзӕддӕгтӕй); Парошы мыггагӕй — Захариа ӕмӕ йемӕ, номхыгъды фыстмӕ гӕсгӕ, сӕдӕ фӕндзай нӕлгоймаджы;

⁴Пахат-Моавы мыггагӕй — Елйехоенай, Зерахийы фырт, ӕмӕ йемӕ дыууӕсӕдӕ нӕлгоймаджы;

⁵Заттуйы мыггагӕй Шеханиа, Йахазиелы фырт, ӕмӕ йемӕ ӕртӕсӕдӕ нӕлгоймаджы;

⁶Адины мыггагӕй — Эвед, Йонатаны фырт, ӕмӕ йемӕ фӕндзай нӕлгоймаджы;

⁷Еламы мыггагӕй — Йесаиа, Аталийы фырт, ӕмӕ йемӕ авдсӕдӕ нӕлгоймаджы;

⁸Шефатийы мыггагӕй — Зевадиа, Михаелы фырт, ӕмӕ йемӕ астсӕдӕ адӕймаджы нӕлгоймӕгтӕ;

⁹Йоавы мыггагӕй — Овадиа, Йехиелы фырт, ӕмӕ йемӕ дыууӕсӕдӕ ӕстдӕс нӕлгоймаджы;

¹⁰Банийы мыггагӕй — Шеломит Йосифеайы фырт, ӕмӕ йемӕ сӕдӕ ӕхсай нӕлгоймаджы;

¹¹Бевайы мыггагӕй — Захариа, Бевайы фырт, ӕмӕ йемӕ дыууын аст нӕлгоймаджы;

¹²Азгады мыггагӕй — Йоханан, Хаккатаны фырт, ӕмӕ йемӕ сӕдӕ дӕс нӕлгоймаджы;

¹³Адоникамы мыггагӕй сӕ кӕстӕртӕ — Елифелет, Йеиел ӕмӕ Шемайа — ӕмӕ семӕ ӕхсай нӕлгоймаджы;

¹⁴Бигвайы мыггагӕй — Утай ӕмӕ Заккур ӕмӕ семӕ ӕвдай нӕлгоймаджы.

¹⁵Ахавайы сахармӕ цы цӕугӕдон кӕлы, уый былгӕрон сӕ ӕрӕмбырд кодтон. Ӕртӕ боны уым фӕлӕууыдыстӕм. Адӕм ӕмӕ сауджынты ’хсӕн Левийы байзӕддӕгтӕй куы никӕй федтон,

¹⁶уӕд хистӕртӕм — Елиезер, Ариел, Шемайа, Елнатан, Йарив, Елнатан, Натан, Захариа ӕмӕ Мешулламмӕ ӕмӕ ахуыргӕндтӕм — Йоарив ӕмӕ Елнатанмӕ, фӕдзурын кодтон.

¹⁷Арвыстон сӕ Иддомӕ, Касифиайы бӕстыхицаумӕ, цӕмӕй йе ’фсымӕртӕн, Кувӕндоны уымы цӕрӕг кусджытӕн, зӕгъа ӕмӕ нын нӕ Хуыцауы хӕдзарӕн лӕггадгӕнджытӕ ӕрбарвитой.

¹⁸Нӕ Хуыцауы хорзӕх нӕ уыди, ӕмӕ нӕм ӕрбакодтой иу ӕмбаргӕ израиладжы — Махлийы байзӕддӕгтӕй, левиттӕй, йӕ ном — Шеревиа, йӕ фырттӕ ӕмӕ ӕфсымӕртимӕ, ӕдӕппӕтӕй ӕстдӕс адӕймаджы;

¹⁹Хашавиайы, стӕй Йесаиайы — Мерарийы байзӕддӕгтӕй, йе ’фсымӕртӕ ӕмӕ уыдоны фырттимӕ, ӕдӕппӕтӕй ссӕдзӕй;

²⁰уыдонимӕ — Давид ӕмӕ йӕ ӕлдӕрттӕ левиттӕн лӕггадгӕнӕгӕй кӕй сӕвӕрдтой, Кувӕндоны уыцы кусджытӕй — дыууӕсӕдӕ дыууын, иууылдӕр фыст ӕрцыдысты номхуындӕй.

²¹Уыйадыл уым, Ахавайы цӕугӕдоны был, ӕз комдарӕн расидтӕн, нӕ Хуыцауӕн коммӕгӕс кӕй стӕм, уый равдисынӕн ӕмӕ Йӕм скуывтон, цӕмӕй нӕ ӕд исбон рӕствӕндаг фӕкӕна нӕ цотимӕ.

²²Ӕз мӕ сӕрмӕ уый не ’рхастон, ӕмӕ паддзахӕй ракурон, цӕмӕй нын немӕ, фӕндагыл нӕ фыдгултӕй бахизыны тыххӕй, хъахъхъӕнджытӕ рарвита. Уымӕн ӕмӕ, паддзахимӕ куы дзырдтам, уӕд ын нӕ ныхас уыди: нӕ Хуыцауыл йӕхи чи фӕдзӕхсы, уыдоныл Уый Йӕ хӕрзаудӕг арм дары, йӕхи Йыл чи атигъ кӕны, уыдоны та Йӕ азары хай бакӕны.

²³Цыбыр дзырдӕй, мах ком дардтам ӕмӕ нӕ Хуыцаумӕ куывтам, ӕмӕ Йӕм нӕ куывд фехъуысти.

²⁴Сауджынты хистӕртӕй дыууадӕсы равзӕрстон: Шеревиа, Хашавиа ӕмӕ ма уыдонимӕ се ’рвадӕлтӕй ноджы дӕс адӕймаджы.

²⁵Нӕ Хуыцауы хӕдзары номыл нӕм мысайнаджы охыл цыдӕриддӕр ӕрцыдис — ӕвзист, сыгъзӕрин ӕмӕ мигӕнӕнтӕ — уыдон сӕм барст-нымадӕй радтон: паддзахы, йӕ уынаффӕгӕнджытӕ ӕмӕ йе ’лдӕртты, стӕй уымы израилӕгтӕн се ’ппӕты лӕвӕрттӕ.

²⁶Барст-нымадӕй сын сӕ радтон сӕ къухтӕм: ӕвзист — ӕхсӕзсӕдӕ фӕндзай таланты; ӕвзист мигӕнӕнтӕ — сӕдӕ таланты уӕзӕн; сыгъзӕрин — сӕдӕ таланты;

²⁷ссӕдз сызгъзӕрин кӕхцы — мин драхмӕйы аргъ ӕмӕ, сыгъзӕрины аргъ кӕмӕн ис, ахӕм ӕрттиваг ӕрхуыйӕ конд дыууӕ мигӕнӕны.

²⁸Загътон сын: сымах — Дунедарӕджы нывонд, мигӕнӕнтӕ — Йӕ мысайнӕгтӕ; ӕвзист ӕмӕ сыгъзӕрин — бархи лӕвӕрттӕ Дунедарӕгӕн, нӕ фыдӕлты Хуыцауӕн.

²⁹Уӕдӕ сӕ цӕсты гагуыйау хъахъхъӕнут, цалынмӕ сӕ сауджынтӕ ӕмӕ левитты хистӕртӕм ӕмӕ Израилы мыггӕгты хистӕртӕм Йерусалимы, Дунедарӕджы хӕдзары, хӕзнадонмӕ барст-нымадӕй раттат, уӕдмӕ.

³⁰Сауджынтӕ ӕмӕ левиттӕ барст-нымадӕй райстой ӕвзист, сыгъзӕрин ӕмӕ мигӕнӕнтӕ, цӕмӕй сӕ Йерусалиммӕ нӕ Хуыцауы хӕдзармӕ фӕхӕццӕ кӕной.

³¹Уыйадыл Ахавайы цӕугӕдоны былӕй араст стӕм фыццаг мӕйы дыууадӕсӕм бон ӕмӕ нӕ фӕндаг адардтам Йерусалиммӕ. Нӕ Хуыцау ныл Йӕ арм дардта — Уый-иу нӕ фервӕзын кодта знӕгтӕй, стӕй-иу нӕ размӕ чи бабадти, уыдонӕй.

³²Афтӕмӕй ӕрбахӕццӕ стӕм Йерусалиммӕ. Ӕртӕ боны куы рацыдис, уӕд,

³³цыппӕрӕм бон, ӕвзист дӕр, сыгъзӕрин дӕр, мигӕнӕнтӕ дӕр барст-нымадӕй нӕ Хуыцауы хӕдзармӕ фӕхӕццӕ кодтам. Къухӕй-къухмӕ сӕ барст-нымадӕй радтам сауджын Меремотмӕ, Уриайы фыртмӕ, стӕй левиттӕм — Пинхасы фырт Елеазар, Йешуайы фырт Йозавад ӕмӕ Биннуйы фырт Ноадиамӕ.

³⁴Алцыдӕр — барст-нымадӕй. Цыдӕриддӕр сбарстой ӕмӕ банымадтой, уыдонӕн иумӕйагӕй сӕ уӕз уайтӕккӕ ныффыстой.

³⁵Уацарӕй чи ӕрыздӕхт, уыдон ӕппӕт израилӕгты номӕй Израилы Хуыцауӕн иууылсудзинаг нывӕндтӕ ӕрхастой: галтӕ — дыууадӕс, фыстӕ — нӕуӕдз ӕхсӕз, уӕрыччытӕ — авдсӕдӕ авд, тӕригъӕды нывондӕн — дыууадӕс нӕл сӕгъы.

³⁶Паддзахы бардзырд фехъусын кодтой паддзахады барджынтӕн ӕмӕ доны фале цӕрӕг бынӕттон хицӕуттӕн, ӕмӕ уыдон баххуыс кодтой израилӕгтӕн ӕмӕ Хуыцауы хӕдзары ӕнцой лӕууыдысты.