Read Хуыцауы Дзырд иронау Неемиа 11 Bible Online

Неемиа 11 - Хуыцауы Дзырд иронау bible

Неемиа 11

¹Адӕмы хицӕуттӕ ӕрцардысты Йерусалимы, иннӕ адӕм та хӕлттӕ сӕппӕрстой, цӕмӕй дӕс адӕймагӕй иу Йерусалимы уаз сахармӕ цӕрынмӕ ацӕуа, фарастӕй та иннӕ сахарты баззайой.

²Адӕм арфӕ ракодтой, барвӕндӕй Йерусалимы ӕрцӕрыныл чи сразы ис, уыдонӕн се ’ппӕтӕн дӕр.

³Йерусалимы ӕрцардысты бӕстӕйы хицӕуттӕ, Иудейы сахарты та: израилӕгтӕ, сауджынтӕ, левиттӕ, Кувӕндоны кусджытӕ ӕмӕ Соломоны цагъарты байзӕддӕгтӕ, алчи — йӕхи зӕххы хайыл.

⁴Йерусалимы цардысты Иудӕ ӕмӕ Бениамины байзӕддӕгтӕ. Иудӕйы цотӕй: Атаиа, Узийайы фырт, Захариайы фырт, Амариайы фырт, Шефатийы фырт, Махалаелы фырт, Парецы байзӕддӕгтӕй,

⁵ӕмӕ Маасеа, Барухы фырт, Кол-Хозейы фырт, Хазаиайы фырт, Адайайы фырт, Иоаривы фырт, Захариайы фырт, Шелайы фырт.

⁶Парецы байзӕддӕгтӕй Йерусалимы ӕдӕппӕтӕй царди цыппарсӕдӕ ӕхсай аст нымад адӕймаджы.

⁷Бениамины байзӕддӕгтӕ: Саллу, Мешулламы фырт, Иоеды фырт, Педаиайы фырт, Колайы фырт, Маасеайы фырт, Итиелы фырт, Йесаиайы фырт,

⁸Йӕ фӕстӕ та — Габбай ӕмӕ Саллай. Ӕдӕппӕтӕй — фарастсӕдӕ дыууын аст.

⁹Зихрийы фырт Иоел сын уыди хицау, Сенуайы фырт Иудӕ та уыди сахары дыккаг адӕймаг.

¹⁰Сауджынтӕ: Иедайа, Иоаривы фырт, Йахин,

¹¹Серай, Хилкиайы фырт, Мешулламы фырт, Цадокы фырт, Мерайоты фырт, Ахитувы фырт, хицауиуӕг кодта Хуыцауы галуаны,

¹²ӕмӕ се ’фсымӕртӕ, Хуыцауы галуаны кусджытӕ. Ӕдӕппӕтӕй — астсӕдӕ дыууын дыууӕ; Адайа, Йерохамы фырт, Пелалиайы фырт, Амцийы фырт, Захариайы фырт, Пашхуры фырт, Малкиайы фырт

¹³ӕмӕ йе ’фсымӕртӕ, хӕдзарвӕндӕгты хистӕртӕ. Ӕдӕппӕтӕй — дыууӕсӕдӕ цыппор дыууӕ; ӕмӕ Амашсай, Азарелы фырт, Ахзайы фырт, Мешиллемоты фырт, Иммеры фырт,

¹⁴ӕмӕ йе ’фсымӕртӕ. Ӕдӕппӕтӕй — сӕдӕ дыууын аст, ахъаззаджы адӕймӕгтӕ. Хицау сын уыди Хагдолимы фырт Забдиел.

¹⁵Левиттӕй: Шемайа, Хашшувы фырт, Азрикамы фырт, Хашавиайы фырт, Буннийы фырт,

¹⁶ӕмӕ Шабтай ӕмӕ Йозавад — Хуыцауы хӕдзары ӕдде цы хъуыддӕгтӕ уыди, уыдон ӕххӕстгӕнӕг левитты хистӕртӕй,

¹⁷ӕмӕ Маттаниа, Михайы фырт, Завдийы фырты фырт, Асафы фыртӕн йӕ фырты фырт, кувыны рӕстӕг сӕйраг куывдамонӕг; йӕ фӕстӕ йе ’фсымӕртӕй дыккаг зарӕггӕнӕг — Бакбукиа, стӕй Авда, Шаммуайы фырт, Галалы фырты фырты, Йедутуны фыртӕн йӕ фырты фырт.

¹⁸Сыгъдӕг сахары левиттӕй ӕдӕппӕт уыди дыууӕсӕдӕ ӕстай цыппар.

¹⁹Дуаргӕстӕ: Аккув, Талмон ӕмӕ се ’фсымӕртӕ, хъахъхъӕдтой кулдуӕрттӕ. Уыдысты сӕдӕ ӕвдай дыууӕ.

²⁰Иннӕ израилӕгтӕ, сауджынтӕ ӕмӕ левиттӕ цардысты Иудейы ӕппӕт сахарты, алчи — йӕхи зӕххы хайыл.

²¹Кувӕндоны кусджытӕ та цардысты Офелы. Сӕ хистӕртӕ уыдысты Циха ӕмӕ Гишпа.

²²Йерусалимы левитты хистӕр уыди Уззи, Банийы фырт, Хашавиайы фырт, Маттаниайы фырт, Михайы фырт. Уый уыдис Асафы байзӕддаг, уазлӕггады рӕстӕг Хуыцауы хӕдзары заргӕ чи кодта, уыдоны мыггагӕй.

²³Уыдонӕн ӕмӕ зарӕггӕнджытӕн, паддзахы сӕрмагонд фӕдзӕхстмӕ гӕсгӕ, алы бон дӕр ӕмбӕлди бӕрӕг хардз.

²⁴Петахиа, Мешезабелы фырт, Иудӕйы фырт Зарахы байзӕддӕгтӕй иу, паддзахы ӕууӕнчы лӕг уыдис ӕмӕ адӕмимӕ баст алы хъуыддӕгтӕ йӕ бӕрны уыдысты.

²⁵Хъӕуты чи царди, сӕ быдырты, уыдонӕй Иудӕйы фырттӕ цардысты Кирйат-Арба ӕмӕ йӕ дӕлбар сахарты, Дивон ӕмӕ йӕ дӕлбар сахарты, Иекавцел ӕмӕ йӕ хъӕуты,

²⁶Иешуайы, Моладайы ӕмӕ Бет-Пелеты,

²⁷Хацар-Шуалы, Беер-Шевӕйы ӕмӕ йӕ алфамбылай хъӕуты,

²⁸Циклагы, Мехонайы ӕмӕ йӕ алфамбылай хъӕуты,

²⁹Ен-Риммоны, Цорайы ӕмӕ Йармуты,

³⁰Заноахы, Адулламы ӕмӕ сӕ алыварс хъӕуты, Лахишы ӕмӕ йӕ алывӕрсты, Азекайы ӕмӕ йӕ алфамбылай хъӕуты ӕрбынат кодтой Беер-Шевӕйӕ Хинномы дӕлвӕзы онг.

³¹Бениамины байзӕддӕгтӕ — Гевӕйӕ райдай ӕмӕ Михмасы, Айайы, Вефилы ӕмӕ йӕ алфамбылай хъӕуты,

³²Анатоты, Новы, Ананиайы,

³³Хацоры, Рамайы, Гитаимы,

³⁴Хадиды, Цевоимы, Неваллаты,

³⁵Лоды, Онойы, Харашимы дӕлвӕзы.

³⁶Иудӕйы зӕххы цӕрӕг левиттӕн сӕ иу хай цӕрынмӕ ӕрвыст ӕрцыдысты Бениамины зӕххытӕм.