Read Хуыцауы Дзырд иронау Неемиа 13 Bible Online

Неемиа 13 - Хуыцауы Дзырд иронау bible

Неемиа 13

¹Уыцы бон ӕппӕт дзыллӕйы раз хъӕрӕй кастысты Моисейы чиныг. Уым фыст уыди, аммонаг ӕмӕ моавагӕн Хуыцауы адӕмы ӕхсӕнмӕ бацӕуӕн нӕй, зӕгъгӕ,

²уымӕн ӕмӕ уыдон израилӕгтыл дзул ӕмӕ донимӕ нӕ сӕмбӕлдысты, фӕлӕ сын сӕ ныхмӕ баххуырстой Балаамы, цӕмӕй сӕ ралгъита, фӕлӕ уыцы фыдӕлгъыст нӕ Хуыцау раивта арфӕйӕ.

³Ӕгъдауы ныхӕстӕ фехъусгӕйӕ, адӕм ӕцӕгӕлӕтты се ’ппӕты дӕр израилӕгтӕй фӕхицӕн кодтой.

⁴Уымӕй размӕ та, нӕ Хуыцауы хӕдзары уӕттӕм йӕ цӕст чи дардта, уыцы сауджын Елиашив йӕ хӕрз хион Тобиайӕн

⁵рахицӕн кодта стыр уат; уӕды онг дзы ӕфснайдтой хойраджы хуынтӕ, буд ӕмӕ мигӕнӕнтӕ, ноджы ма левиттӕ, зарӕггӕнджытӕ ӕмӕ дуаргӕстӕм ӕгъдаумӕ гӕсгӕ цы хойраг хауди, уый, сӕн ӕмӕ сойы дӕсӕймаг хӕйттӕ, стӕй, сауджынтӕн кӕй хастой, уыцы хуынтӕ.

⁶Уыцы рӕстӕг ӕз Йерусалимы нӕ уыдтӕн: Вавилоны паддзах Артаксерксы паддзахиуӕгыл дыууадӕс ӕмӕ ссӕдз азы куы сӕххӕст ис, уӕд ӕм фӕцыдтӕн. Цалдӕр боны фӕстӕ дзы мӕхи фӕстӕмӕ ракуырдтон.

⁷Йерусалиммӕ куы ӕрбаздӕхтӕн ӕмӕ куы фехъуыстон, Елиашив Тобиайӕн Хуыцауы хӕдзары кӕрты уат радта, уый,

⁸уӕд мӕстӕй рафыхтӕн ӕмӕ Тобиайы хӕдзары дзаума иууылдӕр ӕддӕмӕ раппӕрстон.

⁹Бафӕдзӕхстон, агъуыст сыгъдӕггонд куыд ӕрцӕуа ӕмӕ Хуыцауы галуаны мигӕнӕнтӕ, хойраджы хуынтӕ ӕмӕ буд фӕстӕмӕ уырдӕм хаст куыд ӕрцӕуой, афтӕ.

¹⁰Уымӕй уӕлдай ма базыдтон, левиттыл сӕ хай кӕй нӕ сӕмбӕлы ӕмӕ уымӕ гӕсгӕ левиттӕ ӕмӕ зарӕггӕнджытӕй алчи ам лӕггад кӕныны бӕсты йӕ хуымы куыст бакӕнынмӕ кӕй азгъордта, уый.

¹¹Уый тыххӕй ӕз бауайдзӕф кодтон, хистӕрад кӕй бӕрны уыди, уыдонӕн, ӕдзӕллагӕй цӕмӕн ныууагътам Хуыцауы хӕдзар, зӕгъгӕ. Ӕрӕмбырд кодтон левитты ӕмӕ сӕ алкӕй йӕ бынаты сӕвӕрдтон.

¹²Уыйадыл иудейӕгтӕ иууылдӕр хор, сӕн ӕмӕ сойы дӕсӕймаг хӕйттӕ къӕбицтӕм хӕссын райдыдтой.

¹³Къӕбицгӕстӕй сӕвӕрдтой сауджын Шелеми, динамонӕг Цадок ӕмӕ левит Педаиайы, семӕ ма ӕххуысгӕнӕгӕй — Хананы, Маттаниайы фырт Заккуры фырты, уымӕн ӕмӕ ӕууӕнкджын адӕмыл нымад уыдысты. Бафӕдзӕхстон сын, се ’фсымӕртӕм цы хӕйттӕ хауы, уыдон сын куыд уарой.

¹⁴Ӕппӕт уыдӕттӕ мын бахъуыды кӕн, мӕ Хуыцау, ӕмӕ, мӕ Хуыцауы хӕдзар ӕмӕ уымӕн лӕггад кӕныны тыххӕй цы биноныг хъуыддӕгтӕ сарӕзтон, уыдон мын нымад ӕрцӕуӕнт!

¹⁵Уыцы бонты ӕз федтон: сабаты Иудейы сӕн дыгътой, куыристӕ ластой ӕмӕ хӕрджытыл сӕн, сӕнӕфсир, легъуи ӕмӕ ӕндӕр уӕргътӕ ӕвӕрдтой. Сабаты ӕппӕт уыдӕттӕ Йерусалиммӕ ластой. Тӕккӕ уыцы бон сын ӕз карзӕй загътон, цӕмӕй сабаты мацы уӕй кӕной.

¹⁶Иудейы цӕрӕг тирӕгтӕ дӕр ластой кӕсаг ӕмӕ ӕндӕр уӕййӕгтӕ ӕмӕ сӕ сабат бон уӕй кодтой Иудейы ӕмӕ Йерусалимы цӕрджытӕн.

¹⁷Ӕз бауайдзаф кодтон Иудейы уӕздӕттӕн, ахӕм ӕвзӕр митӕ уӕ сӕрмӕ цӕмӕн хӕссут ӕмӕ сабаты бон цӕмӕн чъизи кӕнут, зӕгъгӕ.

¹⁸Уӕ фыдӕлтӕ дӕр, зӕгъын, раст афтӕ кодтой, ӕмӕ Хуыцау уымӕн сӕвӕрдта Йӕ бӕллӕх махыл дӕр ӕмӕ ацы сахарыл дӕр. Ныр сымах та сабат чъизи кӕнут ӕмӕ уымӕй ноджы тынгдӕр Хуыцауы мӕсты кӕнут уӕхимӕ.

¹⁹Уый фӕстӕ, сабаты размӕ, изӕрдалынгты Йерусалимы сахары кулдуар сӕхгӕнын кодтон ӕмӕ загътон, сабат цалынмӕ ахицӕн уа, уӕдмӕ йӕ ӕхгӕдӕй куыд дарой. Мӕ адӕмӕй ма кулдуары раз хъахъхъӕнджытӕ дӕр сӕвӕрдтон, сабатбон мидӕмӕ куыд ницы ӕрбахастӕуа, афтӕ.

²⁰Афтӕмӕй сӕудӕджертӕ ӕмӕ алы базайрӕгты уӕйгӕнджытӕ Йерусалимы сисы ӕдде иу-дыууӕ хатты бахсӕвиуат кодтой.

²¹Ӕз сын рагацау фӕдзӕхстон, дзӕгъӕлы ӕхсӕвиуат кӕнут къулы рӕбын, зӕгъгӕ. Искуы ма афтӕ куы бакӕной, уӕд тӕрхоны раз кӕй ӕрлӕудзысты, уымӕй сын зӕрдӕ бавӕрдтон. Уӕдӕй фӕстӕмӕ сабаты никуыуал ӕрбацыдысты.

²²Левиттӕн загътон, цӕмӕй сӕхи ссыгъдӕг кӕной ӕмӕ кулдуары раз хъалагъур ӕрлӕууой, сабаты бон уаз куыд уа, афтӕ. Уыдӕттӕ дӕр мын ма ферох кӕн, мӕ Хуыцау, ӕмӕ мын ныххатыр кӕн Де стыр хорзӕхы фӕрцы!

²³Уыцы бонты ма ӕз федтон, ашдодаг, аммонаг ӕмӕ моаваг сылгоймӕгтӕ чи ракуырдта, ахӕм иудейӕгты.

²⁴Уыдонӕн сӕ цот аздӕхтысты ашдодаг кӕнӕ ӕндӕр адӕмты хӕццӕ ӕвзагыл дзурынмӕ, иудейагау та нӕ зонынц.

²⁵Уый тыххӕй ӕз семӕ схъаугъа дӕн, ралгъыстон сӕ, кӕйдӕрты дзы нӕмгӕ дӕр ракодтон, сӕ сӕрыхъуынтӕй сӕ фӕралас-балас кодтон ӕмӕ сын загътон, цӕмӕй Хуыцауӕй басомы кӕной, сӕ чызджыты ӕцӕгӕлон адӕмтӕм моймӕ кӕй нал дӕтдзысты, уыдоны чызджыты та сӕхицӕн дӕр ӕмӕ сӕ фырттӕн дӕр кӕй нал курдзысты.

²⁶Уыдӕтты тыххӕй, зӕгъын, нӕ фӕтӕригъӕдджын ис Израилы паддзах Соломон? Ахӕм паддзах иунӕг адӕммӕ дӕр нӕ уыди. Йӕ Хуыцау ӕй уарзта ӕмӕ йӕ ӕппӕт израилӕгтӕн паддзах скодта, фӕлӕ йӕ ӕндӕрбӕстаг сылгоймӕгтӕ фӕтӕригъӕдджын кодтой.

²⁷Ӕмӕ ныр, ахӕм ӕвирхъау фыддзинад кӕй кӕнут, нӕ Хуыцауы раз тӕригъӕды кӕй цӕут ӕмӕ ӕцӕгӕлон сылгоймӕгты кӕй курут, мах хъуамӕ уымӕ хъусӕм!

²⁸Иоадайы байзӕддӕгтӕй дӕр иу, алчер Елиашивы фырт, хоронаг Санбаллаты сиахс уыди, ӕмӕ йӕ уый тыххӕй ӕз мӕ цурӕй фӕтардтон.

²⁹Ма сын ныббар, мӕ Хуыцау, сауджыны ном цӕсты кӕй бафтыдтой ӕмӕ сауджын ӕмӕ левиты ардбахӕрд кӕй фехӕлдтой, уый!

³⁰Афтӕ ссыгъдӕг кодтон сауджынтӕ ӕмӕ левитты ӕппӕт ӕцӕгӕлон чъизитӕй, ӕмӕ сӕ алкӕй дӕр ногӕй бафтыдтон йӕ куыстыл.

³¹Батыхстӕн, цӕмӕй суг дӕр афоныл уа ӕмӕ хоры сӕртӕ дӕр. Ма мӕ рох кӕн, о мӕ Хуыцау, хорз мын ракӕн!