Read Хуыцауы Дзырд иронау Неемиа 2 Bible Online

Неемиа 2 - Хуыцауы Дзырд иронау bible

Неемиа 2

¹1-2 Уый уыд Артаксерксы паддзахиуӕгады ссӕдзӕм азы, нисаны мӕйы. Паддзахы раз сӕн уыди. Ӕз дзы кӕхцы ӕркодтон ӕмӕ йӕм ӕй балӕвӕрдтон. Паддзах мӕ уымӕй размӕ ӕнкъардӕй никуы федта, ӕмӕ мын загъта: «Цӕуыл ӕнкъард дӕ? Рынчын нӕ дӕ, уый бӕрӕг у, фӕлӕ, бӕлвырд, дӕ зӕрдӕйы цыдӕр хъыг ис». Мӕнӕн мӕ уд фӕтахти.

³Загътон паддзахӕн: «Ӕнустӕм нын цӕра паддзах, куыннӕ уон ӕнкъард, кӕд ӕмӕ, мӕ фыдӕлты ингӕнтӕ кӕм сты, уыцы сахар гӕныстонӕй лӕууы, йӕ кулдуӕрттӕ та арты хай баисты!»

⁴4-5 Паддзах мӕ бафарста: «Ӕмӕ дӕ куыд фӕнды?» Ӕз мӕхинымӕр уӕларвон Хуыцаумӕ скуывтон ӕмӕ загътон паддзахӕн: «Паддзах цӕра, кӕд ын фӕндон у ӕмӕ мӕ йӕ хорзӕх ис, уӕд мӕ арвитӕд Иудеймӕ, мӕ фыдӕлты ингӕнтӕ кӕм сты, уыцы сахармӕ, ӕмӕ йӕ ногӕй саразон».

⁶Уӕд та мӕ паддзах ӕмӕ йӕ ус-паддзах — уый дӕр йӕ фарсмӕ бадти — бафарстой: «Цас рӕстӕг бафӕстиат уыдзынӕ фӕндагыл ӕмӕ фӕстӕмӕ кӕд ӕрбаздӕхдзынӕ?» Ӕз ӕмгъуыд куы загътон, уӕд паддзах сразы ис.

⁷Ӕз ын загътон: «Иугӕр мӕ ацыд паддзахӕн фӕндон у, уӕд мын ӕххӕст Цӕугӕдоны фаллаг фарсы бынӕттон хицӕуттӕм ныффыссӕд, цӕмӕй мӕ Иудеймӕ фӕндагыл мачи бакъуылымпы кӕна.

⁸Стӕй мын ныффыссӕд паддзахы хъӕдгӕс Асафмӕ, цӕмӕй мын хъӕдӕрмӕг радта Хуыцауы хӕдзары гӕнах, сахары къултӕ ӕмӕ, кӕм цӕрдзынӕн, уыцы хӕдзары кулдуӕртты фаг». Ныффыста мын паддзах гӕххӕтт, уымӕн ӕмӕ мыл Хуыцау йӕ хӕрзаудӕг арм дардта.

⁹Ӕз, Евфраты фале цы фӕрсбӕстӕ ис, уымӕн йӕ хицӕуттыл паддзахы фыстӕджытӕ сӕмбӕлын кодтон. Паддзах мын мемӕ ӕфсӕддон хицӕуттӕ дӕр рарвыста ӕд барджытӕ.

¹⁰Ацы хабӕрттӕ хоронаг Санбаллат, Самарийы бӕстыхицау, ӕмӕ Тобиа, аммонаг бӕрнон, куы фехъуыстой, уӕд сын тынг фӕхъыг, израилӕгтӕн, чи сыл ауда, ахӕм чидӕр кӕй фӕзынди, уый.

¹¹Йерусалиммӕ ӕрбацыдтӕн ӕмӕ дзы ӕртӕ боны фӕдӕн.

¹²Сыстадтӕн ӕхсӕвыгон, мемӕ чи уыди, уыцы цалдӕр адӕймаджы дӕр рабадын кодтон. Хуыцауы фӕндӕй мӕ зӕрды Йерусалимӕн цы саразын уыди, уый зӕгъгӕ дӕр никӕмӕн кодтон. Цы хайуаныл ӕрбацыдтӕн, уымӕй уӕлдай мемӕ фосӕй ницы уыди.

¹³Ӕхсӕвы цӕстӕй Дӕлвӕзы кулдуарыл рацыдтӕн сахарӕй, Залиаг калмы суадоны цурты хуссарӕрдӕм атындзыдтон ӕмӕ дарддӕр мӕ ных Фаджыскалӕн кулдуармӕ сарӕзтон. Йерусалимы пырх къултӕ ӕмӕ сыгъд кулдуӕрттӕ фӕрауын-бауын кодтон.

¹⁴Сахары хуссаргӕрӕтты цӕгатӕрдӕм адардтон Суадоны кулдуар ӕмӕ Паддзахы донмарӕнмӕ, фӕлӕ сисы кӕлдтытыл мӕ хайуанӕн уым фаллаг фарсмӕ ахизӕн нӕ уыд.

¹⁵Раздӕхтӕн Кедроны дӕлвӕзыл талынджы, сисмӕ фӕкӕстытӕ кодтон ӕмӕ Дӕлвӕзы кулдуарыл фӕстӕмӕ ӕрбацыдтӕн.

¹⁶Иу хицау дӕр нӕ зыдта, кӕм уыдтӕн ӕмӕ цы гӕнӕг дӕн, уый: нӕдӕр иудейӕгтӕн, нӕдӕр сауджынтӕн, нӕдӕр уӕздӕттӕн, нӕдӕр хицӕуттӕн, нӕдӕр иннӕ кусджытӕн уӕды онг исты ской кодтон.

¹⁷Загътон сын, цы бӕллӕхы бахаудтам, уый уӕхӕдӕг уынут, зӕгъгӕ: Йерусалим гӕныстон фӕци, йӕ кулдуӕрттӕ арты хай баисты. Уӕдӕ бавдӕлӕм, ӕмӕ йын йӕ къул самайӕм, цӕмӕй нырау ӕгад мауал уӕм фидӕны.

¹⁸Радзырдтон сын, мӕ Хуыцау мыл Йӕ рӕстаудӕг арм кӕй дары, уый тыххӕй, стӕй сын паддзахы ныхӕстӕ дӕр рафӕзмыдтон. Уыдон загътой: «Аразынмӕ бавналӕм», ӕмӕ фарны хъуыддагмӕ сӕхи рацӕттӕ кодтой.

¹⁹Уыдӕттӕ фехъусгӕйӕ ныл хоронаг Санбаллат ӕмӕ Тобиа, аммонаг бӕрнон, стӕй араббаг Гешем былысчъилӕй худтысты: «Цы митӕ кӕнут, цымӕ? Мыййаг уӕм паддзахы ныхмӕ сызмӕнтыны зонд нӕ фӕзынди?»

²⁰Ӕз сын загътон: «Уӕларвон Хуыцау ныл рӕстаудӕн кӕны, ӕмӕ мах, Йӕ цагъартӕ, аразынмӕ бавналдзыстӕм, сымах та Йерусалимы ницы хъуыддаг ис, хай дӕр ӕмӕ уын дзы бар дӕр нӕй».