Read Хуыцауы Дзырд иронау Естер 9 Bible Online

Естер 9 - Хуыцауы Дзырд иронау bible

Естер 9

¹Дыууадӕсӕм мӕйы, ома адары, ӕртындӕсӕм бон ралӕууыди. Уыцы бон паддзахы уынаффӕ хъуамӕ ӕххӕстгонд ӕрцыдаид, ӕмӕ знӕгтӕ сӕхицӕн ныфс ӕвӕрдтой, абон иудейӕгты нӕ къухтӕм хъӕуы, зӕгъгӕ. Фӕлӕ хъуыддаг цӕхгӕр ӕндӕрхуызон рауад: сӕхӕдӕг иудейӕгты къухтӕм бахаудтой.

²Уыцы бон Ксерксы паддзахады алы кӕрӕтты иудейӕгтӕ ӕрбамбырд сты сӕ сахарты, цӕмӕй сӕ фыдгултӕн аккаг фӕуой. Ӕмӕ сӕ ныхмӕ ничи фӕлӕууыди — адӕмтӕ сӕ иууылдӕр старстысты.

³Бынӕттон уӕлдӕр хицауӕй, ӕнӕуи хицауӕй, бардарӕй, паддзахы хъуыддӕгтӕ ӕххӕстгӕнӕгӕй — иууылдӕр Мардохейы тасӕй дзуттӕгты фарс фесты.

⁴Уымӕн ӕмӕ бирӕ бартӕ уыди Мардохейӕн паддзахы хӕдзары. Йӕ кой паддзахады алы кӕрӕттӕм айхъуысти. Бонӕй-бон хъомысджындӕр кодта.

⁵Иудейӕгтӕ се знӕгты иууылдӕр ныццагътой, кард дзы никӕмӕй раздӕхтой, мыггагыскъуыд сӕ фӕкодтой, аккаг сын фесты.

⁶Шушаны фидары иудейӕгтӕ ралӕууыдысты ӕмӕ амардтой фондзсӕдӕ адӕймаджы.

⁷Мард фесты: Паршандата, Далфон, Аспата,

⁸Пората, Адалиа, Аридата,

⁹Пармашта, Арисай, Аридай, Вайзата —

¹⁰иудейӕгты цыфыддӕр знаг Аманы, Хаммедатайы фырты, дӕс фырты. Сӕ амӕттӕгты мулкмӕ нӕ фӕцагайдтой иудейӕгтӕ.

¹¹Шушаны фидары мӕрдты нымӕц уыцы тӕккӕ бон паддзахӕн фехъусын кодтой.

¹²Ӕмӕ паддзах загъта ӕхсин-паддзах Естерӕн: «Иудейӕгтӕ Шушаны ралӕууыдысты ӕмӕ амардтой фондзсӕдӕ адӕймаджы, уыдонимӕ Аманы дӕс фырты дӕр. Цымӕ паддзахады иннӕ рӕтты та цы бакодтой? Дӕу куыд фӕнды? Цавӕр курдиат ма дӕм ис? Ӕххӕстгонд ӕрцӕудзӕн».

¹³«Кӕд паддзахӕн фӕндон у, — дзуапп радта Естер, — уӕд бар раттӕд, цӕмӕй райсом дӕр Шушаны иудейӕгтӕ абоны уынаффӕмӕ гӕсгӕ архайой. Аманы дӕс фырты мӕрдтӕ та цӕджындзыл ауыгъд ӕрцӕуӕнт».

¹⁴Паддзах загъта, цӕмӕй афтӕ бакӕной. Уынаффӕ Шушаны цӕрджытӕн фехъусын кодтой. Аманы дӕс фырты мӕрдтӕ цӕджындзыл ауыгъд ӕрцыдысты.

¹⁵Адары мӕйы цыппӕрдӕсӕм бон та Шушаны иудейӕгтӕ ногӕй ӕрбамбырд сты ӕмӕ ма ноджы ӕртӕсӕдӕ адӕймаджы амардтой, фӕлӕ мулкмӕ нӕ бавнӕлдтой.

¹⁶Паддзахады ӕндӕр рӕтты цӕрӕг иудейӕгтӕ дӕр ӕрбамбырд сты, цӕмӕй сӕхи бахъахъхъӕной ӕмӕ се знӕгтӕй фервӕзой. Сӕ фыдгултӕй ӕвдай фондз мин адӕймаджы ныццагътой, фӕлӕ сын сӕ мулкмӕ нӕ бавнӕлдтой.

¹⁷Уый уыди адары мӕйы ӕртындӕсӕм бон. Дыккаг бон ӕрсабыр сты — сӕхицӕн цины бон, бӕрӕгбон, скодтой.

¹⁸Шушаны цӕрӕг иудейӕгтӕ ӕрбамбырд сты ӕртындӕсӕм ӕмӕ цыппӕрдӕсӕмы. Ӕртыккаг бон ӕрсабыр сты — сӕхицӕн цины бон, бӕрӕгбон, скодтой.

¹⁹Уымӕ гӕсгӕ хъӕуты цӕрӕг иудейӕгтӕн адары мӕйы цыппӕрдӕсӕм бон у цины бон, бӕрӕгбон, ӕмӕ кӕрӕдзимӕ хуынтӕ фӕхӕссынц.

²⁰20-21 Уыцы хабӕрттӕ иууылдӕр Мардохей фӕфыста ӕмӕ йӕ фыстӕг Ксерксы паддзахады цӕрӕг иудейӕгтӕм — дард ран уой, хӕстӕг ран уой — се ’ппӕтмӕ дӕр фервыста, цӕмӕй ӕрвылаз адары мӕйы цыппӕрдӕсӕм ӕмӕ фынддӕсӕм бонтӕ бӕрӕг кӕной.

²²Уымӕн ӕмӕ уыцы бонты иудейӕгтӕ сӕ фыдгултӕй фервӕзтысты, уыцы бонты сӕ хъыг цинмӕ раивта, сӕ маст — бӕрӕгбонмӕ. Уӕдӕ сын суӕнт уыдон циндзинад ӕмӕ куывды бонтӕ, кӕрӕдзимӕ хуынтӕ куыд хӕссой, мӕгуыртӕн лӕвӕрттӕ куыд кӕной!

²³Уӕдӕй фӕстӕмӕ иудейӕгтӕ, сӕхӕдӕг дӕр кӕй райдыдтой ӕмӕ ма сын Мардохей дӕр кӕмӕй загъта, уыцы ӕгъдау сӕхицӕн фӕткӕн райстой.

²⁴Уымӕн ӕмӕ ӕппӕт иудейӕгты знаг Аман, агагаг Хаммедатайы фырт, сфӕнд кодта дзуттӕгты бабын кӕнын ӕмӕ уый тыххӕй пур (ома хал) ӕппӕрста, цӕмӕй сӕ бындзагъд фӕкӕна ӕмӕ сӕ фесафа.

²⁵Фӕлӕ Естер паддзахмӕ куы бацыди, уӕд уый ног уынаффӕ рахаста, ӕмӕ Аман иудейӕгты ныхмӕ цы фыдвӕнд сарӕзта, уый йӕхи сӕрыл ӕрцыди — йӕхи дӕр ӕмӕ йын йӕ фыртты дӕр цӕджындзыл ӕрцауыгътой.

²⁶26-27 Уымӕн хуыйнынц уыцы бонтӕ Пурим: дзырд «пур»-мӕ гӕсгӕ. Фыстӕджы цы дзырдӕуыди ӕмӕ сӕхӕдӕг цы федтой ӕмӕ бавзӕрстой, уыдон бахынцгӕйӕ, иудейӕгтӕ уынаффӕ рахастой: сӕхицӕн, сӕ байзӕддӕгтӕн ӕмӕ сын сӕ дин чи райса, уыцы ӕцӕгӕлӕттӕн се ’ппӕтӕн фӕткӕн баззайӕд ӕрвылаз уыцы дыууӕ боны, ӕгъдау куыд амоны, афтӕ бӕрӕг кӕнын.

²⁸Уыцы бонтӕ зӕрдылдаринаг сты алы фӕлтӕр, алы хӕдзарвӕндагӕн дӕр, алы зылды, алы сахары дӕр! Иудейӕгтӕн рохгӕнӕн нӕй Пуримы бонтӕ! Мыггагмӕ дарӕнт сӕ зӕрдыл Пурим!

²⁹29-30 Ӕхсин-паддзах Естер, Авихаилы чызг, иудейаг Мардохеимӕ ногӕй ныффыста Пуримы тыххӕй ӕмӕ йын йӕ бӕрӕгбон сфидар кодта. Ӕмӕ фӕхӕццӕ ис уыцы фыст, цардамонд ӕмӕ ӕдасдзинадыл дзурӕг, Ксерксы паддзахады сӕдӕ дыууын авд бӕстӕйы цӕрӕг иудейӕгтӕм се ’ппӕтмӕ дӕр.

³¹Цӕмӕй йӕ афоныл бӕрӕггонд цӕуа Пурим, ӕхсин-паддзах Естер ӕмӕ иудейаг Мардохейы фыстӕджыты куыд дзырдӕуы, афтӕ, ӕгъдауыл. Сӕ комдарӕн ӕмӕ хъарӕггӕнӕн бонты иудейӕгтӕ сӕхӕдӕг куыд схатдзӕг кодтой, афтӕ.

³²Фыстыты баззади, Естер йӕ уынаффӕйӕ сфидар кодта Пуримы бӕрӕгбон, зӕгъгӕ.