Read Хуыцауы Дзырд иронау Рацыд 1 Bible Online

Рацыд 1 - Хуыцауы Дзырд иронау bible

Рацыд 1

¹Мысыры бӕстӕм Йаковимӕ, йӕ иннӕ ном — Израил, ӕрбацыдысты (алчи ӕд бинонтӕ) йӕ фырттӕ:

²Рувим, Симеон, Левий, Иудӕ,

³Иссахар, Зевулон, Бениамин,

⁴Дан, Неффалим, Гад, Асир.

⁵Йосефимӕ — уый раздӕр афтыди Мысырмӕ — Йаковы байзӕддӕгтӕ ӕдӕппӕтӕй уыдысты дӕс ӕмӕ ӕртиссӕдз.

⁶Амард Йосеф, амардысты йе ’фсымӕртӕ, удӕгас ничиуал уыд сӕ фӕлтӕрӕй дӕр.

⁷Фӕлӕ израилӕгтӕн сӕ хъӕстӕ даргъ-уӕрӕх ацыд — сбирӕ ӕмӕ стыхджын сты, Мысыры зӕххӕн уӕз кӕнын райдыдтой.

⁸Уӕдмӕ бӕстӕйы сӕргъы ӕрлӕууыди ног паддзах, Йосефы чи нӕ зыдта, ахӕм.

⁹Уый йӕ адӕмӕн загъта: «Кӕсут-ма, израилӕгтӕ куыд сбирӕ сты! Хъомысӕй дӕр ныл уӕлахиз кӕнынц.

¹⁰Исты ӕрхъуыды хъӕуы, цӕмӕй бынтон ма ныббирӕ уой, уый тыххӕй. Науӕд, хӕст райдыдта, зӕгъгӕ, уӕд нӕ фыдгултимӕ баиу уыдзысты, нӕ ныхмӕ ралӕудзысты ӕмӕ сӕхи айсдзысты нӕ бӕстӕй».

¹¹Израилӕгты, сӕ тых сын чи сӕтта, ахӕм уӕззау куыстытыл бафтыдтой. Цӕстдарджытӕ сын сӕвӕрдтой ӕмӕ сын фараонӕн дыууӕ сахары саразын кодтой ӕфтауцуатӕн — Питом ӕмӕ Рамсес.

¹²Фӕлӕ сӕ цас тынгдӕр ӕфхӕрдтой, уыйас тынгдӕр рӕзти сӕ нымӕц. Мысырӕгтӕ тасы бацыдысты

¹³ӕмӕ сын ноджы карздӕр фыдӕбӕттӕ ӕвзарын кодтой.

¹⁴Израилӕгты цард бынтондӕр зындон фестад: змӕстой ӕлыг ӕмӕ дзы амайӕн дуртӕ арӕзтой, быдыры фыдӕбон кодтой. Мысырӕгтӕ тӕригъӕд нӕ зыдтой, уӕззаудӕр цы куыст ис, уыдон сын се ’ккой скодтой.

¹⁵Мысыры паддзах фӕдзырдта дзуттаг ӕвгъӕдгӕс устытӕм, сӕ иуы ном — Шифра, иннӕйы ном — Пуа,

¹⁶ӕмӕ сын бафӕдзӕхста: «Дзуттаг сылгоймӕгтӕй ӕвгъӕдгӕс кӕмӕн уат, уыдонӕн-иу сӕ лӕппуты амарут, чызджытӕ та цӕрӕнт».

¹⁷Фӕлӕ ӕвгъӕдгӕстӕ Хуыцауӕй тарстысты ӕмӕ Мысыры паддзахы фӕдзӕхст не ’ххӕст кодтой, удӕгасӕй-иу ныууагътой ноггуырд лӕппуты.

¹⁸Паддзах сӕм фӕдзырдта ӕмӕ сӕ бафарста: «Ноггуырд лӕппуты удӕгасӕй цӕмӕн ныууадзут?»

¹⁹Ӕвгъӕдгӕстӕ фараонӕн загътой: «Дзуттаг сылгоймӕгтӕ мысырӕгты хуызӕн не сты. Уыдон хъӕддых сты — ӕвгъӕдгӕс нӕма бахӕццӕ вӕййы, афтӕмӕй сӕ сывӕллон гуырд вӕййы».

²⁰Израилӕгтӕ фылдӕрӕй-фылдӕр ӕмӕ тыхджынӕй-тыхджындӕр кодтой. Хуыцау Йӕ хорзӕхӕй схайджын кодта ӕвгъӕдгӕс устыты.

²¹Хуыцауӕй кӕй тарстысты, уый тыххӕй сын зӕнӕгӕй амонд радта.

²²Уӕд фараон бардзырд радта йе ’ппӕт адӕмӕн: «Дзуттӕгтӕн-иу сӕ ноггуырд лӕппуты Нилы доны баппарут, чызджытӕ та уадз ӕмӕ цӕрой».