Read Хуыцауы Дзырд иронау Рацыд 15 Bible Online

Рацыд 15 - Хуыцауы Дзырд иронау bible

Рацыд 15

¹Уӕд Моисей ӕмӕ израилӕгтӕ Дунедарӕджы кадӕн арфӕйы зарӕг систой: «Цӕй ӕмӕ ныззарон Дунедарӕгыл, стыр ӕмӕ кадджын Хуыцауыл! Уый фӕдӕлдон кодта бӕхтӕ ӕмӕ барджыты.

²Дунедарӕг мӕ хъомыс, мӕ хъару, мӕ Ирвӕзынгӕнӕг у. Уый мӕ Хуыцау у, ӕмӕ Йын кад кӕндзынӕн, Уый — мӕ фыдӕлты Хуыцау, ӕмӕ Йӕ стаудзынӕн!

³Дунедарӕг у хӕстон, Дунедарӕг — Йӕ ном!

⁴Уый фӕдӕлдон кодта фараоны тохуӕрдӕттӕ, йе ’фсад, Сырх денджызы амӕттаг ын бакодта йӕ разагъды хӕстонты —

⁵хуыдымы хай баисты, доны аныгъуылдысты дуртау.

⁶Дунедарӕг, Дӕ рахиз къухӕн йӕ хъомысы кой айхъуыст. Дӕ рахиз къухӕй, Дунедарӕг, Ды знӕгты ӕрцавтай,

⁷Дӕ ныхмӕ растджыты Де стыр хъаруйӕ афӕлдӕхтай зӕххыл; артау ссыгъди Дӕ маст, хъӕмпы халау сӕ аныхъуырдта.

⁸Дӕ раулӕфтӕй хӕрдмӕ фӕцыдысты денджызы уылӕнтӕ, хъен слӕууыдысты сисау, сурзӕхх фестади хуыдым.

⁹„Асурон, баййафон! — загъта фыдгул. — Байсон ӕфтиаг, мӕ мондӕгтӕ сисон! Сласон мӕ кард ӕмӕ сӕ ныццӕгъдон!“

¹⁰Ды бафу кодтай — ӕмӕ фӕдӕлдон сты, денджызы арфы аныгъуылдысты здыйау.

¹¹Дунедарӕг, хуыцӕутты ’хсӕн Дӕу хуызӕн чи у? Чи у, Дӕуау, хъомысджын ӕмӕ уаз? Тас ӕфтауы Дӕ кад, о, диссӕгтӕ фӕлдисӕг!

¹²Баивӕзтай Дӕ къух — зӕхх аныхъуырдта знаджы.

¹³Уарзгӕйӕ хоныс Ды, кӕй фервӕзын кодтай, уыцы адӕмы, кӕныс сӕ Дӕ хъомысджын къухӕй Дӕ уаз цӕрӕнмӕ.

¹⁴Уыдӕттӕ фехъуыстой алы адӕмтӕ ӕмӕ ӕмризӕджы ризынц! Филистимы цӕрджыты стыр тас бацыд,

¹⁵удаист фесты Едомы ӕлдӕрттӕ, асаст Моавы фӕтӕгтӕн сӕ ныфс, ханаанӕгтӕн се уӕнгтӕ ӕрызгъӕлдысты.

¹⁶Бахӕцӕд се ’ппӕтыл тас ӕмӕ ризӕг! Дӕ хъомысӕй цавддуртӕ фестӕнт, цалынмӕ, Дунедарӕг, Дӕ адӕм цӕуой, уӕдмӕ, Дӕхи кӕй бакодтай, уыцы адӕм!

¹⁷Дунедарӕг, Ды ӕрцӕрын кӕндзынӕ уыдоны Дӕ хохыл! Дӕхицӕн цӕрӕн кӕм сарӕзтай, Бардарӕг, Дӕ къухӕй Уаз Цӕрӕн кӕм скодтай, уым!

¹⁸Дунедарӕг уыдзӕни Паддзах — мыггагӕй-мыггагмӕ!»

¹⁹Фараоны тохуӕрдӕттӕ ӕмӕ йӕ бӕхджынтӕ денджызмӕ куы бахызтысты, уӕд сӕ Дунедарӕг фӕдӕлдон кодта, израилӕгтӕ та денджызы астӕуты ацыдысты сурыл цӕуӕгау.

²⁰Уӕд пехуымпар Мариам, Аароны хо, йӕ къухмӕ ӕрбайста дала, ӕмӕ йемӕ сӕ далатимӕ кафгӕ рацыдысты ӕппӕт сылгоймӕгтӕ дӕр.

²¹Мариам базарыд: «Ныззарут Дунедарӕгӕн, — стыр у Уый! Бӕхтӕ ӕмӕ барджыты Уый денджызы нывзылдта!»

²²Сырх денджызӕй Моисей израилӕгты акодта Шуры ӕдзӕрӕг быдырмӕ. Уым фӕцыдысты ӕртӕ боны ӕмӕ дон никуы ардтой.

²³Марамӕ куы бафтыдысты, уӕд уым уыди дон, фӕлӕ нуазынӕн нӕ бӕззыд, уымӕн ӕмӕ маст уыд. (Уымӕ гӕсгӕ схуындӕуыд ацы бынат Мара[1].)

²⁴Адӕм хъуыр-хъуыр кодтой Моисейыл: «Цы бануазӕм?»

²⁵Моисей скуывта Дунедарӕгмӕ, ӕмӕ йын Уый бацамыдта бӕласмӕ. Моисей дзы иу лыггаг доны ныппӕрста, ӕмӕ дон хӕрзад фестад. Уыцы ран Дунедарӕг израилӕгтӕн сфидар кодта фӕтк ӕмӕ уагӕвӕрдтӕ ӕмӕ сӕ фӕлвӕрдта.

²⁶Загъта сын: «Дунедарӕгмӕ, уӕ Хуыцаумӕ, куы хъусат ӕмӕ, Йӕ разы раст цы у, уый куы кӕнат, Йӕ фӕдзӕхстытӕ Йын уӕ зӕрдыл куы дарат ӕмӕ Йын Йӕ уагӕвӕрдтӕ куы ӕххӕст кӕнат, уӕд, мысырӕгтыл цы низтӕ бафтыдтон, уыдонӕй уӕ никӕцыйы амӕттаг бакӕндзынӕн. Ӕз Дунедарӕг дӕн — уӕ Хосгӕнӕг».

²⁷Израилӕгтӕ бахӕццӕ сты Елиммӕ ӕмӕ сӕ рӕсӕнуат уым скодтой. Уыди дзы дыууадӕс суадоны ӕмӕ дӕс ӕмӕ ӕртиссӕдз финик бӕласы.