Read Хуыцауы Дзырд иронау Рацыд 17 Bible Online

Рацыд 17 - Хуыцауы Дзырд иронау bible

Рацыд 17

¹Израилы дзыллӕ Сины ӕдзӕрӕг быдырӕй куы рацыдысты, уӕд Дунедарӕджы фӕдзӕхстмӕ гӕсгӕ рӕсӕнуат кодтой куы иу, куы иннӕ ран, афтӕмӕй бахӕццӕ сты Рефидиммӕ. Адӕмӕн дзы дон бануазынӕн нӕ уыд,

²ӕмӕ уайдзӕфты бын фӕкодтой Моисейы, домдтой дзы: «Ӕри нын дон! Дойны нын у». Моисей сын афтӕ: «Цы мын уайдзӕфтӕ кӕнут? Цӕмӕн фӕлварут Дунедарӕджы?»

³Фӕлӕ адӕм дойныйӕ стыхстысты ӕмӕ хъуыр-хъуыр кодтой Моисейыл: «Цӕмӕн нӕ ракодтай Мысырӕй? Нӕхи дӕр, нӕ сабиты дӕр ӕмӕ нын нӕ фос дӕр дойныйӕ амарынмӕ?»

⁴Моисей сдзынӕзта Дунедарӕгмӕ: «Цы гӕнгӕ мын у ацы адӕмӕн? Чысыл ма хъӕуы, ӕмӕ мӕ дурты бын фӕкӕной!»

⁵Дунедарӕг Моисейӕн загъта: «Израилӕгты хистӕртӕй иу къорды демӕ ракӕн ӕмӕ адӕмы разӕй ацу. Дӕ къухмӕ райс, Нилы дон-иу кӕмӕй ӕрцавтай, дӕ уыцы лӕдзӕг дӕр.

⁶Уым, къӕдзӕхыл, Хоревы хохыл, Ӕз ӕрлӕудзынӕн дӕ разы. Ды-иу дӕ лӕдзӕгӕй къӕдзӕх ныццӕв, ӕмӕ дзы дон ракӕлдзӕн. Уадз ӕмӕ адӕм нуазой». Моисей израилӕгты хистӕрты раз, Дунедарӕг ын куыд бафӕдзӕхста, афтӕ бакодта.

⁷Уыцы бынат та схуындӕуыди Масса ӕмӕ Мерива, уымӕн ӕмӕ уыцы ран израилӕгтӕ Дунедарӕгӕн уайдзӕфтӕ кодтой ӕмӕ Йӕ фӕлвӕрдтой, Дунедарӕг немӕ ис ӕви нӕ, зӕгъгӕ, кӕй дзырдтой, уымӕй.

⁸Амалекӕгтӕ ӕрбабырстой Рефидиммӕ ӕмӕ схӕцыдысты израилӕгтимӕ.

⁹Моисей Йешуайӕн загъта: «Равзар, амалекӕгты ныхмӕ кӕимӕ ралӕууай, ахӕм лӕгтӕ. Ӕз та райсом, Хуыцауы лӕдзӕг мӕ къухы, афтӕмӕй къуыбырыл ӕрлӕудзынӕн».

¹⁰Йешуа, Моисей йын куыд загъта, афтӕ бакодта ӕмӕ амалекӕгтимӕ схӕцыд, Моисей та Аарон ӕмӕ Хуримӕ къуыбырыл ӕрлӕууыд.

¹¹Моисей-иу йӕ къухтӕ хӕрдмӕ куы сдардта, уӕд-иу уӕлахиз кӕнын райдыдта Израил, дӕлӕмӕ-иу сӕ куы ӕруагъта, уӕд та — Амалек.

¹²Фӕлӕ Моисейы къухтӕ куы ӕруӕззау сты, уӕд ын дур ӕрбахастой. Моисей дурыл ӕрбадт, Аарон ӕмӕ йын Хур та дыууӕрдыгӕй хӕрдмӕ хӕцыдысты йӕ къухтыл. Хурныгуылдмӕ йын сӕ дӕлӕмӕ не ’руагътой,

¹³ӕмӕ Йешуа фӕуӕлахиз Амалекыл, йӕ адӕмы йын кардӕй фӕцагъта.

¹⁴Дунедарӕг Моисейӕн загъта: «Уыдӕттӕ зӕрдылдарынӕн ныффысс чиныджы, Йешуайӕн та зӕгъ, Ӕз амалекӕгтӕн арвы бын сӕ кой кӕй фесафдзынӕн, уый».

¹⁵Моисей сарӕзта нывондхӕссӕн ӕмӕ йӕ схуыдта Йахве-Нисси[1].

¹⁶Загъта: «Мӕ къух сдардтон Дунедарӕджы бадӕнмӕ. Дунедарӕджы хӕст Амалекимӕ — мыггагмӕ».