Read Хуыцауы Дзырд иронау Рацыд 18 Bible Online

Рацыд 18 - Хуыцауы Дзырд иронау bible

Рацыд 18

¹Мидианы сауджын Ифро, Моисейы каис, фехъуыста, Хуыцау Моисей ӕмӕ Йӕ адӕмӕн, Израилӕн, стыр хӕрзты кӕй бацыд ӕмӕ сӕ Дунедарӕг Мысыры зӕххӕй кӕй ракодта, уый.

²Ӕмӕ Ифро йемӕ рахуыдта Моисейы ус Циппорайы (уымӕй размӕ йӕ Моисей йӕ цӕгатмӕ арвыста),

³Моисейы дыууӕ фырты, сӕ иуы ном — Гершом[1], уымӕн ӕмӕ Моисей загъта: «Ӕз ӕрцӕуӕггаг дӕн ӕцӕгӕлон зӕххыл»,

⁴иннӕйы ном та — Елиезер[2], уымӕн ӕмӕ Моисей загъта: «Мӕ фыдӕлты Хуыцау мӕм фӕзынди ӕххуысмӕ ӕмӕ мӕ бахызта фараоны кардӕй».

⁵Ифро сӕ бакодта Моисеймӕ, Хуыцауы хохы рӕбынмӕ, Моисей йӕ рӕсӕнуат кӕм ӕркодта, уырдӕм

⁶ӕмӕ йӕм фӕхабар кӕнын кодта: «Ӕрбацыди дӕм дӕ каис Ифро дӕ ус ӕмӕ дӕ фырттимӕ».

⁷Моисей йӕ каисы размӕ рауади, йӕ сӕрӕй йын ныллӕг акуывта ӕмӕ йын аба кодта. Кӕрӕдзийӕн салам куы радтой, уӕд цатырмӕ бацыдысты.

⁸Моисей йӕ каисӕн радзырдта, Дунедарӕг фараон ӕмӕ мысырӕгты Израилы адӕмы сӕрыл куыд бафхӕрдта, израилӕгтӕ фӕндагыл цы зынтӕ бавзӕрстой ӕмӕ сӕ Дунедарӕг куыд аирвӕзын кодта, ӕппӕт уыдӕттӕ.

⁹Ифройӕн ӕхсызгон уыди, Дунедарӕг израилӕгты мысырӕгты къухӕй куы ирвӕзын кодта, уӕд сын афтӕ бирӕ хӕрзтӕ кӕй ракодта, уый.

¹⁰Загъта: «Арфӕгонд уӕд Дунедарӕг! Аирвӕзын уӕ кодта мысырӕгтӕ ӕмӕ фараоны къухӕй. Ацы адӕмы суӕгъд кодта мысырӕгты ӕфсондзӕй.

¹¹Ныр ӕз базыдтон, иннӕ хуыцӕуттӕ сӕхи цыфӕнды бӕрзонд куы ӕвӕрой, уӕддӕр Дунедарӕг се ’ппӕтӕй уӕлдӕр кӕй у, уый!».

¹²Моисейы каис Ифро Хуыцауӕн ӕрхаста иууылсудзинаг нывонд ӕмӕ Йын кусӕрттӕ акодта. Ӕрбацыдысты Аарон ӕмӕ Израилы хистӕртӕ, цӕмӕй Хуыцауы раз иумӕ скомдзаг кӕной.

¹³Дыккаг бон Моисей ӕрбадти израилӕгты хъуыддӕгтӕ ӕвзарынмӕ, ӕмӕ райсомӕй суанг изӕрмӕ адӕм йӕ разы уыдысты.

¹⁴Йӕ каис Ифро йын, уый фенгӕйӕ, афтӕ зӕгъы: «Цы ми кӕныс ацы адӕмӕн? Ды сӕ разы иунӕгӕй цӕмӕн бадыс, уыдон та дӕ алыварс цӕмӕн лӕууынц райсомӕй изӕрмӕ?»

¹⁵Моисей дзуапп радта йӕ каисӕн: «Адӕм мӕм ӕрбацӕуынц, цӕмӕй сын фӕрсон Хуыцауы.

¹⁶Исты хъуыддаг равзаринаг сӕм куы вӕййы, уӕд мӕм ӕрбацӕуынц, ӕмӕ сын ӕз равзарын сӕ быцӕутӕ, бацамонын сын Хуыцауы уагӕвӕрдтӕ ӕмӕ ’гъдӕуттӕ».

¹⁷Йӕ каис ын загъта: «Раст нӕ кӕныс.

¹⁸Афтӕмӕй дӕхи дӕр ӕмӕ адӕмы дӕр тухӕнӕй амардзынӕ. Ӕгӕр уӕззау у дӕ хӕс, ӕмӕ иунӕгӕй ницы бакӕндзынӕ.

¹⁹Ӕрбайхъус-ма мӕ уынаффӕмӕ, ӕмӕ дын Хуыцау баххуыс кӕнӕд! Ды хъуамӕ лӕууай адӕмӕй Хуыцауы ’хсӕн ӕмӕ Хуыцауы тӕрхонмӕ хӕссай адӕмы хъуыддӕгтӕ.

²⁰Ахуыр сӕ кӕн Хуыцауы уагӕвӕрдтӕ ӕмӕ Йе ’гъдӕуттыл, амон сын, цавӕр фӕндӕгтыл цӕугӕ сын у ӕмӕ сын цавӕр хъуыддӕгтӕ кӕнын ӕмбӕлы, уыдӕттӕ.

²¹Адӕмы ’хсӕнӕй равзар, Хуыцауы тас кӕмӕ ис, ӕууӕнкджын чи у ӕмӕ гӕртам чи нӕ райсдзӕн, ахӕм нымад лӕгтӕ ӕмӕ сӕ хицӕуттӕй сӕвӕр: кӕй — мин, кӕй — фондзыссӕдз, кӕй — дӕс ӕмӕ дыууиссӕдз, кӕй — дӕс лӕджы сӕргъы.

²²Уыдон ӕдзух уыдзысты адӕмимӕ ӕмӕ сын сӕ быцӕутӕ ӕвзардзысты, зындӕр хъуыддӕгтӕ дӕумӕ дӕтдзысты, хуымӕтӕгтӕ та сӕхӕдӕг лыг кӕндзысты. Афтӕмӕй дын дӕ уаргъ фӕрогдӕр кӕндзысты, йе ’мбис ын уыдон хӕсдзысты.

²³Афтӕ куы бакӕнай, ӕмӕ уый Хуыцауӕн фӕндон куы уа — дӕхӕдӕг дӕр фидар лӕудзынӕ, адӕм дӕр разыйӕ сӕхимӕ здӕхдзысты».

²⁴Моисей байхъуыста йӕ каисы зондмӕ ӕмӕ, уый йын куыддӕриддӕр загъта, афтӕ бакодта.

²⁵Израилы адӕмы ’хсӕн нымад лӕгтӕ равзӕрста ӕмӕ сӕ хицӕуттӕй сӕвӕрдта: кӕй — мин лӕгӕн, кӕй — фондзыссӕдз, кӕй — дӕс ӕмӕ дыууиссӕдз, кӕй — дӕс.

²⁶Уыдон адӕмӕн систы тӕрхоны лӕгтӕ; уӕззау хъуыддӕгтӕ лӕвӕрдтой Моисеймӕ, рогдӕртӕ та ӕвзӕрстой сӕхӕдӕг.

²⁷Моисей йӕ каисӕн фӕндараст загъта, ӕмӕ уый йӕ бӕстӕм аздӕхт.