Read Хуыцауы Дзырд иронау Рацыд 25 Bible Online

Рацыд 25 - Хуыцауы Дзырд иронау bible

Рацыд 25

¹Дунедарӕг Моисейӕн загъта:

²«Израилӕгтӕн зӕгъ, ӕмӕ Мын мысайнӕгтӕ ӕрӕмбырд кӕной. Кӕй цы фӕнды, уый раттӕд.

³Ӕмбырд кӕнут ахӕм лӕвӕрттӕ: сыгъзӕрин, ӕвзист ӕмӕ ӕрхуы,

⁴ӕрвхуыз, тар сырх ӕмӕ сӕнт сырх тӕбын, лыстӕг гӕнӕй уафт хъуымӕцтӕ ӕмӕ тинтъычъи,

⁵ӕлдыгъгонд ӕмӕ сырхахуырст фысдзӕрмттӕ, гогырӕ сӕрак ӕмӕ акъацийы хъӕдӕрмӕг,

⁶оливӕйы сой — цырагъӕн, хӕрздӕфгӕнӕнтӕ — сӕрдӕн сойӕн ӕмӕ будӕн,

⁷оникс ӕмӕ фӕлгӕты бавӕргӕ ӕндӕр зынаргъ дуртӕ — ефод ӕмӕ риуылдарӕн фӕлындынӕн.

⁸Израилӕгтӕ Мын саразӕнт Уаз Цӕрӕн, цӕмӕй се ’хсӕн цӕрон.

⁹Скӕнут Мын Цатыр ӕмӕ йе ’ппӕт дзауматӕ, Ӕз дын цы хуызӕг равдисдзынӕн, уымӕ гӕсгӕ.

¹⁰Акъацийӕ саразӕнт Фидыды Чырын, йӕ дӕргъ — дыууӕ ӕлмӕрины ӕмӕ ӕрдӕг, йӕ уӕрх — ӕлмӕрин ӕмӕ ӕрдӕг, йӕ бӕрзӕнд — ӕлмӕрин ӕмӕ ӕрдӕг.

¹¹Мидӕгӕй дӕр ӕмӕ йӕ ӕдде дӕр сыгъдӕг сыгъзӕринӕй састӕр, йӕ кӕрӕттыл ын сыгъзӕрин мӕскъ ауадз.

¹²Сараз цыппар сыгъзӕрин цӕджы ӕмӕ сӕ бафидар кӕн Фидыды Чырыны цыппар къахыл: дыууӕ цӕджы — йӕ иу фарсыл, дыууӕ та — йӕ иннӕ фарсыл.

¹³Акъацийӕ скӕн хъилтӕ ӕмӕ сӕ сыгъзӕринӕй састӕр.

¹⁴Хъилтӕ — Фидыды Чырын хӕссынӕн, йӕ фӕйнӕфарс сӕ цӕгты батъысс.

¹⁵Ӕдзухдӕр хъуамӕ цӕгты тъыст уой — уырдыгӕй сын исӕн нӕй.

¹⁶Фидыды Чырыны-иу нывӕр, къӕйдуртыл фыстӕй дын цы фӕдзӕхстытӕ ратдзынӕн, уыдон.

¹⁷Фидыды Чырынӕн йӕ сӕр скӕн сыгъдӕг сыгъзӕринӕй: йӕ дӕргъ — дыууӕ ӕлмӕрины ӕмӕ ӕрдӕг, йӕ уӕрх — ӕлмӕрин ӕмӕ ӕрдӕг.

¹⁸18-19 Йӕ фӕйнӕ кӕроныл ын ныффидар кӕн сыгъзӕрины фӕйнӕ ӕнӕхъӕн къӕрттӕй арӕзт дыууӕ херувимы.

²⁰Се ’ргом — кӕрӕдзимӕ, сӕ цӕстӕнгас — Фидыды Чырыны сӕрмӕ, херувимтӕ йын сӕ хӕрдмӕтыгъд базыртӕй ӕмбӕрздзысты йӕ сӕр.

²¹Фидыды Чырыны нывӕр, цы фӕдзӕхстытӕ дын ратдзынӕн, уыдон ӕмӕ йыл йӕ сӕр ӕрӕвӕр.

²²Ӕз-иу дӕм раргом уыдзынӕн Фидыды Чырыны сӕрмӕ, дыууӕ херувимы астӕу, ӕмӕ дӕу уылты израилӕгтӕн Мӕ фӕдзӕхстытӕ хъусын кӕндзынӕн.

²³Акъацийӕ сараз фынг, йӕ дӕргъ — ӕлмӕрин ӕмӕ ӕрдӕг, йӕ уӕрх — ӕлмӕрин, йӕ бӕрзӕнд — ӕлмӕрин ӕмӕ ӕрдӕг.

²⁴Састӕр ӕй сыгъдӕг сыгъзӕринӕй, стӕй йын йӕ алыварс сыгъзӕрин мӕскъ ауадз.

²⁵Фынджы кӕрӕтты скӕн армытъӕпӕны бӕрзӕндӕн сис ӕмӕ йыл сыгъзӕрин мӕскъ ауадз.

²⁶Сыгъзӕринӕй сараз цыппар цӕджы ӕмӕ сӕ бафидар кӕн фынджы къӕхты сӕрмӕ, йӕ цыппар фисыны.

²⁷Хъуамӕ цӕгтӕ ӕнгом бацӕуой сисмӕ — хъилтӕ-иу сӕ атъысдзысты, фынг ӕндӕр ранмӕ хӕссын куы хъӕуа, уӕд.

²⁸Фынгхӕссӕн хъилтӕ скӕн акъацийӕ ӕмӕ сӕ састӕр сыгъзӕринӕй.

²⁹Сыгъдӕг сыгъзӕринӕй скӕн тӕбӕгътӕ, сӕнӕн та — къустӕ, куыситӕ, хъуыраутӕ ӕмӕ хъалацтӕ.

³⁰Фынгыл хъуамӕ ӕвӕрай дзултӕ — ӕдзух Мӕ разы чи хъуамӕ уа, уыдон.

³¹Сыгъдӕг сыгъзӕринӕй рацӕгъд цырагъдарӕн, йе ’ппӕт хӕйттӕ дӕр — йӕ зӕнг, йӕ къалиутӕ ӕмӕ йӕ къусгӕндтӕ, уыдоны бын тымбылӕгтӕ ӕмӕ дидинсыфтӕ — иу ӕнӕхъӕн къӕрттӕй куыд уой, афтӕ.

³²Цырагъдарӕныл хъуамӕ уа ӕхсӕз къалиуы: ӕртӕ къалиуы — иуӕрдыгӕй, ӕртӕ — иннӕрдыгӕй.

³³Алы къалиуыл дӕр уӕд ӕртӕ къусчы, миндал-ӕхсӕры дидинкъусчы хуызӕттӕ, ӕд тымбылӕгтӕ ӕмӕ ӕд дидинсыфтӕ.

³⁴Цырагъдарӕнӕн йӕ зӕнгыл уӕд цыппар къусчы, миндал-ӕхсӕры дидинкъусчы хуызӕттӕ, ӕд тымбылӕгтӕ ӕмӕ ӕд дидинсыфтӕ.

³⁵Фыццаг дыууӕ къалиуы бынмӕ — тымбылӕг, дыккаг дыууӕ къалиуы бынмӕ — тымбылӕг ӕмӕ ӕртыккаг дыууӕ къалиуы бынмӕ — тымбылӕг; афтӕ хъуамӕ уа цырагъдарӕны ӕхсӕз къалиуы бынмӕ дӕр.

³⁶Цырагъдарӕн ӕнӕхъӕнӕй дӕр — ӕд къусчытӕ, ӕд тымбылӕгтӕ, ӕд дидинсыфтӕ, ӕд къалиутӕ, ӕд зӕнг — хъуамӕ уа сыгъдӕг сыгъзӕрины ӕнӕхъӕн къӕрттӕй цагъд.

³⁷Цырагъдарӕнӕн скӕн авд цырагъы ӕмӕ йыл сӕ ӕрӕвӕр, цӕмӕй йын рухс кӕной йӕ раз.

³⁸Сыгъдӕг сыгъзӕринӕй йын скӕн ӕртыскӕн ӕмӕ фыййӕгтӕ.

³⁹Йе ’ппӕт дзауматимӕ йыл бахардз кӕн сыгъдӕг сыгъзӕрины иу талант[1].

⁴⁰Хъусыс, хохыл дын кӕй равдыстӕуыд, уый халдих куыд уа, ӕппӕт дӕр афтӕ сараз.