Read Хуыцауы Дзырд иронау Рацыд 28 Bible Online

Рацыд 28 - Хуыцауы Дзырд иронау bible

Рацыд 28

¹Израилӕгты ’хсӕнӕй фӕсид де ’фсымӕр Ааронмӕ ӕмӕ йӕ фырттӕм, цӕмӕй уыдон Мӕ сауджынтӕ уой: Аарон ӕмӕ йӕ фырттӕ Надав, Авигу, Елеазар ӕмӕ Итамар.

²Де ’фсымӕр Ааронӕн скӕнын кӕн уаз дарӕстӕ — кад ӕмӕ рӕсугъддзинады нысанӕн.

³Се скӕнын сын, ахӕм дӕсныйад кӕмӕн радтон, уыцы арӕхстджынтӕн бафӕдзӕхс, ӕмӕ Мын Аароны сауджынлӕггадӕн снывонд кӕн.

⁴Аарон ӕмӕ йӕ фырттӕн сцӕттӕ кӕнӕнт ахӕм уаз дарӕс: риуылдарӕн, ефод, пӕлӕз, нывӕфтыд хӕдон, сарыхъ ӕмӕ рон, цӕмӕй Мын сауджынлӕггад кӕной.

⁵Уыдӕттӕ скӕнынӕн райсӕнт сыгъзӕрин, стӕй ӕрвхуыз, тар сырх ӕмӕ сӕнт сырх тӕбын ӕмӕ лыстӕг гӕн.

⁶Ефод скӕнӕнт сыгъзӕрин ӕндахӕй, ӕрвхуыз, тар сырх ӕмӕ сӕнт сырх тӕбынӕй ӕмӕ здыхт гӕнӕй, нывӕфтыдтимӕ.

⁷Ефоды дыууӕ кӕроныл хъуамӕ фидаргонд уа дыууӕ уӕхскбосы.

⁸Ефодӕн йӕ астӕубос дӕр хъуамӕ уа, йӕхӕдӕг цӕмӕй у, уымӕй: сыгъзӕрин ӕндахӕй, ӕрвхуыз, тар сырх ӕмӕ сӕнт сырх тӕбынӕй ӕмӕ здыхт гӕнӕй.

⁹Райс дыууӕ оникс дуры ӕмӕ сыл скъах Израилы фыртты нӕмттӕ:

¹⁰ӕхсӕз номы куыд хистӕрӕй скъах иу дурыл, ӕхсӕз та — иннӕ дурыл.

¹¹Уыцы дыууӕ дурыл Израилы фыртты нӕмттӕ скъах, дурыл мыхуыр куыд скъахынц, афтӕ. Дуртӕ бавӕр сыгъзӕрин фӕлгӕтты

¹²ӕмӕ сӕ бафидар кӕн ефоды уӕхскбостыл. Уыцы дуртӕ — Израилы фыртты мысынӕн. Аарон сын Дунедарӕджы раз сӕ нӕмттӕ хӕссӕд йӕ дыууӕ уӕхскыл — мысынӕн.

¹³Сыгъзӕрин фӕлгӕттӕ сараз,

¹⁴сыгъдӕг сыгъзӕринӕй сараз бӕндӕнау здыхт дыууӕ рӕхысы ӕмӕ сӕ фӕлгӕттӕм бафидар кӕн.

¹⁵Ноджы ма скӕн Дунедарӕджы амындтыты риуылдарӕн, уый дӕр, ефодау, — сыгъзӕрин ӕндӕхтӕй, ӕрвхуыз, тар сырх ӕмӕ сӕнт сырх тӕбынӕй, стӕй здыхт гӕнӕй, нывӕфтыдтимӕ.

¹⁶Уӕд цыппӕрдигъон, дӕргъмӕ дӕр ӕмӕ уӕрхмӕ дӕр — уылынг, дыдагъ уӕфтӕгӕй конд.

¹⁷Риуылдарӕныл скӕн фӕлгӕттӕ зынаргъ дурты цыппар рӕнхъӕн. Фыццаг рӕнхъы уыдзысты лал, топаз, изумруд;

¹⁸дыккаджы — малахит, сапфир, алмаси;

¹⁹ӕртыккаджы — гиацинт, агат, аметист;

²⁰цыппӕрӕмы — хризолит, оникс, яшмӕ. Бавӕрын сӕ хъӕудзӕни сыгъзӕрин фӕлгӕтты.

²¹Дуртӕ нымадӕй уӕнт дыууадӕс, Израилы фыртты нӕмттимӕ: мыхуырыл фыст куыд скъахынц, афтӕ сыл къахт ӕрцӕуӕнт Израилы дыууадӕс хӕдзарвӕндаджы нӕмттӕ, алы дурыл дӕр — иу ном.

²²Риуылдарӕнӕн сыгъдӕг сыгъзӕринӕй сараз здыхтбыд рӕхысбостӕ.

²³Скӕн дыууӕ сыгъзӕрин цӕджы ӕмӕ сӕ риуылдарӕнӕн йӕ дыууӕ къуымы бафидар кӕн,

²⁴дыууӕ здыхтбыд рӕхысбосӕй сӕ баиу кӕн

²⁵дыууӕ фӕлгӕтимӕ, фӕлгӕттӕ та ефоды уӕхскбостӕм бафидар кӕн разӕрдыгӕй.

²⁶Ноджы ма скӕн дыууӕ сыгъзӕрин цӕджы ӕмӕ сӕ риуылдарӕны бинаг дыууӕ къуымыл мидӕджырдыгӕй, риуылдарӕн ефодимӕ кӕм иу кӕны, уым бафидар кӕн.

²⁷Ноджы ма скӕн дыууӕ сыгъзӕрин цӕджы ӕмӕ сӕ бафидар кӕн ефоды раззаг хайыл, бынӕй, ефодӕн йӕ астӕубосы сӕрмӕ.

²⁸Риуылдарӕны бинаг цӕгтӕ ефоды цӕгтимӕ баст ӕрцӕуӕнт ӕрвхуыз синагӕй, астӕубосы сӕрмӕ риуылдарӕн ефодыл ӕнгом куыд бада, афтӕ.

²⁹Аарон, Уаз Цӕрӕнмӕ цӕугӕйӕ, йӕ риуыл — риуылдарӕныл — хӕссӕд Израилы фыртты нӕмттӕ, Дунедарӕджы раз сӕ ӕнӕсцухӕй мысыны охыл.

³⁰Амындтыты риуылдарӕны бавӕр урим ӕмӕ туммим, хъуамӕ уой Аароны риуыл, Дунедарӕджы размӕ-иу куы цӕуа, уӕд. Аарон Дунедарӕджы раз куы лӕууа, уӕд кӕддӕриддӕр йӕ риуыл уӕнт Дунедарӕджы амындтытӕ Израилы адӕмӕн.

³¹Ефоды бын дарынӕн скӕн пӕлӕз, ӕгасӕй дӕр — ӕрвхуыз.

³²Пӕлӕзы астӕуӕй уӕд къӕртт — сӕрыл ӕркӕнынӕн. Йӕ кӕрӕттыл уӕд фидар уӕфтӕджы уадздзаг хуыд, цӕмӕй ма скъуыйа.

³³Пӕлӕзы фӕччийыл кӕрӕй-кӕронмӕ ӕрвхуыз, тар сырх ӕмӕ сӕнт сырх тӕбынӕй скӕн гранаты дыргъты ӕнгӕс тымбылӕгтӕ, уыдоны ’хсӕнты та ӕрцауындз сыгъзӕрин дзӕнгӕрджытӕ.

³⁴Фӕччитыл кӕрӕй-кӕронмӕ, ӕхсӕнмӕ-ӕхсӕнты — сыгъзӕрин дзӕнгӕрӕг ӕмӕ тымбылӕг, сыгъзӕрин дзӕнгӕрӕг ӕмӕ тымбылӕг.

³⁵Уыцы пӕлӕз хъуамӕ уа Аароныл, лӕггад куы кӕна, уӕд, цӕмӕй Уаз Цӕрӕнмӕ, Дунедарӕджы размӕ, цӕугӕйӕ, стӕй уырдыгӕй фӕстӕмӕ цӕугӕйӕ дӕр, хъуыса дзӕнгӕрджыты зӕлланг, — науӕд амӕлдзӕн.

³⁶Сараз уадздзаг сыгъдӕг сыгъзӕринӕй ӕмӕ, мыхуырыл фыстытӕ куыд скъахынц, афтӕ йыл скъах: „Дунедарӕджы уаз хай“.

³⁷Ӕрвхуыз синагӕй йӕ бабӕтт сарыхъы ӕдде, разӕрдыгӕй,

³⁸Аароны ныхыл. Аарон дзуапп дӕтты, израилӕгтӕ, сӕ уаз хуынтӕ ӕмӕ нывӕндтӕ хӕсгӕйӕ, цы рӕдыдтытӕ ӕруадзынц, ӕппӕт уыдӕтты тыххӕй, ӕмӕ сын-иу Дунедарӕг цӕмӕй сӕ куывд айса, уый тыххӕй уыцы сыгъзӕрин уадздзаг ӕдзухдӕр хъуамӕ Аароны ныхыл уа.

³⁹Ааронӕн лыстӕг гӕнӕй бауаф нывӕфтыд хӕдон, скӕн ын сарыхъ лыстӕг гӕнӕй, бауаф ын нывӕфтыд рон.

⁴⁰Аароны фырттӕн бауаф хӕдӕттӕ, рӕттӕ ӕмӕ сӕрылбӕттӕнтӕ — кад ӕмӕ аивы нысанӕн.

⁴¹Ӕппӕт уыцы дарӕстӕ скӕн де ’фсымӕр Аарон ӕмӕ йӕ фырттыл. Уыйфӕстӕ оливӕйы сойӕ байсӕрд Аарон ӕмӕ йӕ фыртты, срухс сӕ кӕн ӕмӕ сӕ сауджынлӕггадӕн снывонд кӕн, ӕмӕ уой Мӕ сауджынтӕ.

⁴²Гӕнӕй сын бауафын кӕн цыбыр, зӕнджы фӕтасӕнтӕм чи ӕххӕсса, ахӕм хӕлӕфтӕ — сӕ худинаг ӕмбӕрзынӕн.

⁴³Уыцы хӕлӕфтӕ уӕнт Аарон ӕмӕ йӕ фырттыл, Фембӕлды Цатырмӕ цӕугӕйӕ, кӕнӕ, Уаз Цӕрӕны уаз куыст кӕнгӕйӕ, нывондхӕссӕнмӕ куы баввахс вӕййынц, уӕд, цӕмӕй азымджын ма фӕуой ӕмӕ ма амӕлой. Уый у мыггагмӕйы уагӕвӕрд Аарон ӕмӕ йӕ байзӕддагӕн.