Read Хуыцауы Дзырд иронау Рацыд 30 Bible Online

Рацыд 30 - Хуыцауы Дзырд иронау bible

Рацыд 30

¹Акъацийӕ сараз будсудзӕн нывондхӕссӕн.

²Уӕд цыппаркъуымон — ӕлмӕрины йас дӕргъмӕ дӕр ӕмӕ уӕрхмӕ дӕр, йӕ бӕрзӕнд — дыууӕ ӕлмӕрины. Скӕн ын сыкъатӕ дӕр, нывондхӕссӕнимӕ иу куыд уой, афтӕ.

³Састӕр ӕй сыгъдӕг сыгъзӕринӕй: йӕ сӕр, йӕ фӕрстӕ алырдыгӕй ӕмӕ йӕ сыкъатӕ, стӕй йын йӕ алыварс ӕрзил сыгъзӕрин мӕскъ.

⁴Сараз дыууӕ сыгъзӕрин цӕджы ӕмӕ сӕ бафидар кӕн мӕсчъы бын, нывондхӕссӕны фӕйнӕфарс, цӕмӕй йӕ хӕссынӕн сӕ мидӕг хъилтӕ акӕнӕн уа.

⁵Хъилтӕ скӕн акъацийӕ ӕмӕ сӕ састӕр сыгъзӕринӕй.

⁶Нывондхӕссӕн ӕрӕвӕр, Фидыды Чырын цы мидӕмбӕрзӕны аууон ис, уый раз, йӕ сӕры бакомкоммӕ. Фидыды Чырыны сӕрмӕ-иу дӕм Ӕз раргом уыдзынӕн.

⁷Аарон ыл буд судзӕд алы райсом, цырагъдарӕны цырӕгътӕ-иу куы барӕвдз кӕна, уый фӕстӕ,

⁸стӕй алы изӕр, цырӕгътӕ-иу куы ссудза, уӕд. Дунедарӕджы раз уӕм буд сыгъд цӕуӕд ӕдзухдӕр, фӕлтӕрӕй-фӕлтӕрмӕ.

⁹Ӕцӕг-иу нывондхӕссӕныл мадӕр нӕфӕтчиаг буд ӕрӕвӕрут, мадӕр — иууылсудзинаг нывонд, мадӕр — хойраджы хуын, мадӕр — сӕн.

¹⁰Аарон ӕрвылаз ӕххӕст кӕнӕд нывондхӕссӕн ссыгъдӕг кӕныны ӕгъдау — йӕ сыкъатӕ-иу ын ссыгъдӕг кӕныны охыл сахорӕд тӕригъӕды нывонды тугӕй. Уыцы ӕгъдау ӕххӕст кӕнын хъӕудзӕн ӕрвылаз, фӕлтӕрӕй-фӕлтӕрмӕ. Нывондхӕссӕн Дунедарӕджы раз у иууылсыгъдӕг».

¹¹Дунедарӕг Моисейӕн загъта:

¹²«Израилӕгты сфыст куы аразай, уӕд-иу сӕ алчидӕр йӕхи номыл раттӕд фиддон Дунедарӕгӕн, цӕмӕй сыл сфысты аххосӕй мацы бӕллӕх ӕрцӕуа.

¹³13-14 Алы израилаг нӕлгоймаг дӕр, ссӕдзаздзыдӕй уӕлӕмӕ, фидӕд ӕвзисты шекелы ӕмбис, кувӕндоны шекелтӕй нымайгӕйӕ. Шекелы ис ссӕдз герайы. Уыцы шекелы ӕмбис — мысайнаг Дунедарӕгӕн.

¹⁵Дунедарӕгӕн уӕхи тыххӕй мысайнаг куы дӕттат, уӕд хъӕздыг шекелы ӕмбисӕй фылдӕр ма дӕттӕд, мӕгуыр та шекелы ӕмбисӕй къаддӕр.

¹⁶Уыцы фиддон-иу израилӕгтӕй райс ӕмӕ йӕ хардз кӕн Фембӕлды Цатыры лӕггады. Ӕмӕ уый фӕрцы Дунедарӕджы зӕрдыл лӕудзысты Израилы адӕм — уӕ царды аргъ фыст кӕй ӕрцыди, уый».

¹⁷Дунедарӕг Моисейӕн загъта:

¹⁸«Сараз хихсӕн ӕрхуы аг ӕмӕ йын скӕн ӕрхуы суанцъы. Ӕрӕвӕр ӕй Фембӕлды Цатыр ӕмӕ нывондхӕссӕны ’хсӕн ӕмӕ дзы дон ныккӕн.

¹⁹Аарон ӕмӕ-иу дзы йӕ фырттӕ сӕ къухтӕ ӕмӕ сӕ къӕхтӕ ныхсӕнт,

²⁰Фембӕлды Цатырмӕ цӕугӕйӕ, кӕнӕ уазлӕггад кӕныны фӕдыл, Дунедарӕгӕн арты нывонд ӕрхӕссынӕн, нывондхӕссӕнмӕ куы ’рбаввахс уой, уӕд.

²¹Сӕ къухтӕ ӕмӕ-иу сӕ къӕхтӕ ныхсӕнт, науӕд амӕлдзысты. Уый у мыггагмӕйы уагӕвӕрд Ааронӕн йӕхицӕн дӕр ӕмӕ йӕ байзӕддӕгтӕн дӕр, фӕлтӕрӕй-фӕлтӕрмӕ».

²²Дунедарӕг Моисейӕн загъта:

²³«Райс ӕппӕты хуыздӕр хӕрздӕфгӕнӕнтӕй: тӕдзгӕ миррӕ — фондзсӕдӕ шекелы, хӕрздӕфгӕнӕг корицӕ — дыууӕ хатты къаддӕр, дыууӕсӕдӕ фӕндзай шекелы, хӕрздӕфгӕнӕг хъӕз дӕр — дыууӕсӕдӕ фӕндзай шекелы,

²⁴хӕрздӕфгӕнӕг касси — фондзсӕдӕ шекелы, кувӕндоны шекелтӕй нымайгӕйӕ, стӕй оливӕйы сой — иу гин.

²⁵Уыдон арӕхстгай иумӕ сызмӕнт ӕмӕ афтӕмӕй скӕн уаз сӕрдӕн сой.

²⁶Байсӕрд дзы Фембӕлды Цатыр, Фидыды Чырын,

²⁷фынг йе ’ппӕт дзауматимӕ, цырагъдарӕн йе ’ппӕт дзауматимӕ, будсудзӕн нывондхӕссӕн,

²⁸иууылсудзинӕгты нывондхӕссӕн йе ’ппӕт дзауматимӕ, хихсӕн аг йӕ суанцъыимӕ.

²⁹Снывонд сӕ кӕн иууылдӕр, ӕмӕ срухс уыдзысты. Уый фӕстӕ сыл-иу цыдӕриддӕр бандзӕва, уый дӕр уыдзӕни уаз.

³⁰Байсӕрд Аарон ӕмӕ йӕ фыртты дӕр ӕмӕ Мын сӕ снывонд кӕн, цӕмӕй суой Мӕ сауджынтӕ.

³¹Израилӕгтӕн та Мӕ номӕй зӕгъ: уый уын уыдзӕни уаз сӕрдӕн сой фӕлтӕрӕй-фӕлтӕрмӕ.

³²Ӕндӕр дзы мачи цӕуӕд сӕрст. Уый хуызӕн сӕрдӕн ма кӕнут уӕхицӕн — уаз уын уӕд.

³³Ахӕм сӕрдӕн чи сараза ӕмӕ дзы ӕндӕр искӕй чи байсӕрда, уый йӕ адӕмӕй фӕхъӕудзӕн».

³⁴Дунедарӕг Моисейӕн загъта: «Райс хӕрздӕфгӕнӕнтӕ: натаф, шехелет, хелбена, стӕй се ’ппӕты бӕрц сыгъдӕг буд.

³⁵Уыдон арӕхстгай иумӕ сызмӕнт, цӕмӕй сӕ рауайа судзинаг хӕрздӕфгӕнӕн; цӕхх дӕр ма йыл акӕн. Хъуамӕ уа сыгъдӕг ӕмӕ уаз.

³⁶Фӕхты сӕ лыстӕг ныххой ӕмӕ сӕ ӕрӕвӕр Фидыды Чырыны раз, Фембӕлды Цатыры мидӕг, Мӕхи дӕм кӕм ӕргом кӕндзынӕн, уым. Уыцы хӕрздӕфгӕнӕн уын уыдзӕни иууылуаз.

³⁷Ахӕм хӕрздӕфгӕнӕн мачи саразӕд йӕхицӕн, уымӕн ӕмӕ уый у Дунедарӕджы уаз хай.

³⁸Чи сараза ӕмӕ йӕм чи басмуда, уый йӕ адӕмӕй фӕхъӕудзӕн».