Read Хуыцауы Дзырд иронау Рацыд 37 Bible Online

Рацыд 37 - Хуыцауы Дзырд иронау bible

Рацыд 37

¹Бецалел акъацийӕ сарӕзта Фидыды Чырын, йӕ дӕргъ — дыууӕ ӕлмӕрины ӕмӕ ӕрдӕг, йӕ уӕрх — ӕлмӕрин ӕмӕ ӕрдӕг, йӕ бӕрзӕнд дӕр — ӕлмӕрин ӕмӕ ӕрдӕг.

²Мидӕгӕй дӕр ӕмӕ йӕ ӕдде дӕр састӕрдта сыгъдӕг сыгъзӕринӕй, стӕй йын йӕ алыварс ауагъта сыгъзӕрин мӕскъ.

³Сарӕзта цыппар сыгъзӕрин цӕджы, йӕ цыппар фисынӕн, дыууӕ цӕджы — ӕмных фӕрстӕй иуы дыууӕ фисыныл, дыууӕ та — иннӕйы дыууӕ фисыныл бафтауынӕн.

⁴Акъацийӕ скодта дыууӕ хъилы ӕмӕ сӕ састӕрдта сыгъзӕринӕй.

⁵Хъилтӕ — Фидыды Чырын хӕссынӕн — йӕ фӕйнӕфарс цӕгты батъыста.

⁶Фидыды Чырынӕн скодта сӕр сыгъдӕг сыгъзӕринӕй, йӕ дӕргъ — дыууӕ ӕлмӕрины ӕмӕ ӕрдӕг, йӕ уӕрх та — ӕлмӕрин ӕмӕ ӕрдӕг.

⁷7-8 Сыгъзӕринӕй рацагъта дыууӕ херувимы, Фидыды Чырынӕн йӕ фӕйнӕ кӕроныл, ӕмӕ сиу сты йемӕ.

⁹Херувимтӕн сӕ базыртӕ уыдысты хӕрдмӕ тыгъд ӕмӕ афтӕмӕй ӕмбӕрзтой Фидыды Чырыны сӕр, сӕ цӕсгӕмттӕ уыдысты кӕрӕдзимӕ арӕзт, се ’ргом та — Чырыны сӕры ’рдӕм.

¹⁰Бецалел акъацийӕ сарӕзта фынг, йӕ дӕргъ — ӕлмӕрин ӕмӕ ӕрдӕг, йӕ уӕрх — ӕлмӕрин, йӕ бӕрзӕнд — ӕлмӕрин ӕмӕ ӕрдӕг.

¹¹Састӕрдта йӕ сыгъдӕг сыгъзӕринӕй, стӕй йын йӕ алыварс ауагъта сыгъзӕрин мӕскъ.

¹²Фынджы кӕрӕтты скодта армытъӕпӕны бӕрзӕндӕн сис ӕмӕ йыл сыгъзӕрин мӕскъ ауагъта.

¹³Сарӕзта цыппар сыгъзӕрин цӕджы ӕмӕ сӕ бафидар кодта фынджы цыппар фисыныл, йӕ цыппар къахыл,

¹⁴14-15 уадздзӕгтӕ къӕхтыл кӕм ӕндзӕвынц, уымыты. Акъацийӕ скодта дыууӕ хъилы ӕмӕ сӕ састӕрдта сыгъзӕринӕй, стӕй хъилтӕ цӕгты батъыста, фынг хӕссынӕн.

¹⁶Ӕппынфӕстаг фынгӕн сыгъдӕг сыгъзӕринӕй скодта мигӕнӕнтӕ: къустӕ ӕмӕ куыситӕ — хӕрздӕфгӕнӕнтӕн, хъуыраутӕ ӕмӕ хъалацтӕ та — сӕнӕн.

¹⁷Бецалел сыгъдӕг сыгъзӕринӕй рацагъта цырагъдарӕн, йе ’ппӕт хӕйттӕ дӕр — йӕ зӕнг, йӕ къалиутӕ ӕмӕ йӕ къусгӕндтӕ, уыдоны бын — тымбылӕгтӕ ӕмӕ дидинсыфтӕ — уыдысты иу ӕнӕхъӕн къӕрттӕй конд.

¹⁸Цырагъдарӕныл уыд ӕхсӕз къалиуы: ӕртӕ къалиуы — иуӕрдыгӕй, ӕртӕ — иннӕрдыгӕй.

¹⁹Алы къалиуыл дӕр уыд ӕртӕ къусгонды, миндал-ӕхсӕры дидинкъусчы хуызӕттӕ, ӕд тымбылӕгтӕ ӕмӕ ӕд дидинсыфтӕ.

²⁰Цырагъдарӕнӕн йӕ зӕнгыл уыди цыппар къусгонды, миндал-ӕхсӕры дидинкъусчы хуызӕттӕ, ӕд тымбылӕгтӕ ӕмӕ ӕд дидинсыфтӕ.

²¹Фыццаг дыууӕ къалиуы бынмӕ — тымбылӕг, дыккаг дыууӕ къалиуы бынмӕ — тымбылӕг, ӕртыккаг дыууӕ къалиуы бынмӕ дӕр — тымбылӕг; афтӕ хъуамӕ уа цырагъдарӕны ӕхсӕз къалиуы бынмӕ дӕр.

²²Цырагъдарӕн ӕнӕхъӕнӕй дӕр — ӕд къусгӕндтӕ, ӕд тымбылӕгтӕ, ӕд дидинсыфтӕ, ӕд къалиутӕ ӕмӕ ӕд зӕнг — уыди сыгъдӕг сыгъзӕринӕй цагъд.

²³Бецалел ын скодта авд цырагъы, стӕй сыгъдӕг сыгъзӕринӕй ӕртыскӕн ӕмӕ фыййӕгтӕ.

²⁴Йе ’ппӕт дзауматимӕ йыл бахардз кодта сыгъдӕг сыгъзӕрины талант.

²⁵Бецалел акъацийӕ сарӕзта будсудзӕн нывондхӕссӕн. Уый уыд раст цыппаркъуымон — ӕлмӕрины йас дӕргъмӕ дӕр ӕмӕ уӕрхмӕ дӕр, йӕ бӕрзӕнд та — дыууӕ ӕлмӕрины. Цы сыкъатӕ йын скодта, уыдон нывондхӕссӕнимӕ уыдысты иу.

²⁶Састӕрдта йӕ сыгъдӕг сыгъзӕринӕй: йӕ сӕр, йӕ фӕрстӕ алырдыгӕй ӕмӕ йӕ сыкъатӕ, стӕй йын йӕ алыварс ауагъта сыгъзӕрин мӕскъ.

²⁷Сарӕзта дыууӕ сыгъзӕрин цӕджы ӕмӕ сӕ бафидар кодта мӕсчъы бын, нывондхӕссӕны фӕйнӕфарс, цӕмӕй йӕ хӕссынӕн сӕ мидӕг хъилтӕ акӕнӕн уа.

²⁸Хъилтӕ скодта акъацийӕ ӕмӕ сӕ састӕрдта сыгъзӕринӕй.

²⁹Бецалел ма ноджы сцӕттӕ кодта уаз сӕрдӕн сой, стӕй дӕсны арӕзт ӕмӕ сыгъдӕг хӕрздӕфгӕнӕн.