Read Хуыцауы Дзырд иронау Рацыд 40 Bible Online

Рацыд 40 - Хуыцауы Дзырд иронау bible

Рацыд 40

¹Дунедарӕг Моисейӕн загъта:

²«Фыццаг мӕйы фыццаг бон ӕрӕвӕр Фембӕлды Цатыр.

³Бахӕсс Фидыды Чырын ӕмӕ йӕ мидӕмбӕрзӕнӕй сӕхгӕн.

⁴Бахӕсс фынг ӕмӕ йыл йӕ дзауматӕ иууылдӕр ӕрӕвӕр. Ӕрбахӕсс цырагъдарӕн ӕмӕ йыл йӕ цырӕгътӕ ӕрӕвӕр.

⁵Сыгъзӕрин нывондхӕссӕн — будсудзӕн — ӕрӕвӕр Фидыды Чырыны раз. Фембӕлды Цатыры бацӕуӕныл ӕрцауындз дуарӕмбӕрзӕн.

⁶Йӕ къӕсӕры ракомкоммӕ йын ӕрӕвӕр иууылсудзинӕгты нывондхӕссӕн.

⁷Цатырӕй нывондхӕссӕны ’хсӕн ӕрӕвӕр хихсӕн аг ӕмӕ дзы дон ныккӕн.

⁸Цатырӕн йӕ алыварс скӕн кӕрт ӕмӕ кӕрты бацӕуӕныл ӕрцауындз дуарӕмбӕрзӕн.

⁹Райс сӕрдӕн сой ӕмӕ дзы байсӕрд Цатыр, уыимӕ, Цатыры цыдӕриддӕр ис, уыдон ӕмӕ Дунедарӕгӕн снывонд кӕн Цатырӕн йӕхи дӕр, стӕй йе ’ппӕт дзауматӕ дӕр, ӕмӕ уӕд уаз уыдзысты.

¹⁰Байсӕрд иууылсудзинӕгты нывондхӕссӕн йе ’ппӕт дзауматимӕ. Нывондхӕссӕн снывонд кӕн Дунедарӕгӕн, ӕмӕ суыдзӕн иууылуаз.

¹¹Байсӕрд хихсӕн аг йӕ суанцъыимӕ ӕмӕ йӕ снывонд кӕн Дунедарӕгӕн.

¹²Аарон ӕмӕ йӕ фыртты ӕрбакӕн Фембӕлды Цатыры къӕсӕрмӕ ӕмӕ сӕ донӕй цӕхс.

¹³Аароныл скӕн уаз дарӕс ӕмӕ йӕ байсӕрд, срухс ӕй кӕн, ӕмӕ суа Мӕ сауджын.

¹⁴Йӕ фыртты дӕр ын ӕрбакӕн ӕмӕ сыл скӕн хӕдӕттӕ.

¹⁵Сӕ фыды сын куыд байсӕрстай, афтӕ уыдоны дӕр байсӕрд, цӕмӕй суой Мӕ сауджынтӕ. Уыцы байсӕрсты фӕрцы сӕ байзӕддӕгтӕ дӕр уыдзысты сауджынтӕ — мыггагмӕ, фӕлтӕрӕй-фӕлтӕрмӕ».

¹⁶Моисей бакодта, Дунедарӕг ын куыддӕриддӕр бафӕдзӕхста, афтӕ.

¹⁷Израилӕгтӕ Мысырӕй куы рацыдысты, уымӕн йӕ дыккаг азы фыццаг мӕйы фыццаг бон Уаз Цӕрӕн ӕвӕрд ӕрцыд.

¹⁸Ӕрцарӕзта йӕ Моисей: ӕрӕвӕрдта бынӕнцайӕнтӕ, уыдоныл ӕрсагъта фӕлгӕттӕ, фӕлгӕттӕ кӕрӕдзимӕ бафидар кодта хъилтӕй, ныффидар кодта цӕджындзтӕ,

¹⁹Цатыры сӕрыл ӕрытыдта ӕмбӕрзӕн, ууыл та — дыккаг ӕмбӕрзӕн, — Дунедарӕг ын куыд бафӕдзӕхста, афтӕ.

²⁰Уый фӕстӕ Моисей Фидыды Чырыны нывӕрдта Дунедарӕджы фӕдзӕхстытӕ, хъилтӕ сӕ бынӕтты бакодта ӕмӕ Чырынӕн йӕ сӕр ӕрӕвӕрдта йӕ уӕлӕ.

²¹Стӕй Фидыды Чырын бахаста ӕмӕ, Дунедарӕг ын куыд бафӕдзӕхста, афтӕ йӕ мидӕмбӕрзӕнӕй сӕхгӕдта.

²²Фембӕлды Цатыры, цӕгатӕрдыгӕй, мидӕмбӕрзӕны цур, ӕрӕвӕрдта фынг

²³ӕмӕ фынгыл, Дунедарӕджы раз, равӕрдта дзултӕ, Дунедарӕг ын куыд бафӕдзӕхста, афтӕ.

²⁴Фембӕлды Цатыры, хуссарӕрдыгӕй, фынджы бакомкоммӕ, ӕрӕвӕрдта цырагъдарӕн

²⁵ӕмӕ йыл Дунедарӕджы раз сӕвӕрдта цырӕгътӕ, Дунедарӕг ын куыд бафӕдзӕхста, афтӕ.

²⁶Сыгъзӕрин нывондхӕссӕн ӕрӕвӕрдта Фембӕлды Цатыры, мидӕмбӕрзӕны раз,

²⁷ӕмӕ йыл басыгъта хӕрздӕф буд, Дунедарӕг ын куыд бафӕдзӕхста, афтӕ.

²⁸Цатыры бацӕуӕныл ӕрцауыгъта дуарӕмбӕрзӕн.

²⁹Фембӕлды Цатыры къӕсӕрмӕ ӕрӕвӕрдта иууылсудзинӕгты нывондхӕссӕн ӕмӕ йыл ӕрхаста иууылсудзинаг нывӕндтӕ ӕмӕ хойраджы хуынтӕ, Дунедарӕг ын куыд бафӕдзӕхста, афтӕ.

³⁰Цатырӕй нывондхӕссӕны ’хсӕн ӕрӕвӕрдта хихсӕн аг ӕмӕ дзы дон ныккодта.

³¹Уым Моисей, Аарон ӕмӕ Аароны фырттӕ ӕхсадтой сӕ къухтӕ ӕмӕ сӕ къӕхтӕ,

³²Фембӕлды Цатырмӕ кӕнӕ-иу нывондхӕссӕнмӕ куы цыдысты, уӕд, Дунедарӕг Моисейӕн куыд бафӕдзӕхста, афтӕ.

³³Моисей Цатыры алыварс скодта кӕрт ӕмӕ кӕрты бацӕуӕныл ӕрцауыгъта дуарӕмбӕрзӕн. Ууыл Моисей фӕци Фембӕлды Цатыр аразыны ӕппӕт куыстытӕ дӕр.

³⁴34-35 Уӕд ӕврагъ ӕрӕмбӕрзта Фембӕлды Цатыр, ӕмӕ Цатыр Дунедарӕджы кадӕй байдзаг ис. Уый тыххӕй Моисейы бон нӕ уыди Цатырмӕ бацӕуын.

³⁶Ӕврагъ-иу Цатырӕй йӕхи хӕрдмӕ куы систа, уӕд-иу Израилы адӕм араст сты сӕ радон балцы,

³⁷йӕхи хӕрдмӕ куынӕ иста, уӕд та никуыдӕм цыдысты — ӕнхъӕлмӕ кастысты, ногӕй та йӕхи кӕд сисдзӕн, уымӕ.

³⁸Боныгон Цатыры сӕрмӕ лӕууыди Дунедарӕджы ӕврагъ, ӕхсӕвы та уыцы ӕврагъы мидӕг сыгъди арт, ӕмӕ йӕ уыдтой ӕппӕт израилӕгтӕ дӕр. Афтӕ уыд алы хатт дӕр, израилӕгтӕ-иу фӕндагыл куы уыдысты, уӕд.