Read Хуыцауы Дзырд иронау Иов 10 Bible Online

Иов 10 - Хуыцауы Дзырд иронау bible

Иов 10

¹Цардӕй мӕ зӕрдӕ фӕцъӕх ис, ӕмӕ куыннӕ кӕнон хъарджытӕ? Мӕ уды хъизӕмар раргом кӕндзынӕн.

²Хуыцауӕн зӕгъдзынӕн: тӕрхон рахӕссынмӕ тагъд ма кӕн, мӕ азым уал мын бамбарын кӕн!

³Хорз Дӕм кӕсы Де сконд адӕймаджы ’фхӕрын ӕмӕ йыл Дӕхи тигъ кӕнын, ӕнаккӕгтыл та аудын?

⁴Исты Дын адӕймаджы цӕстытӕ ис, ӕмӕ Ды дӕр, адӕймагау, кӕсыс?

⁵Исты Дӕ бонтӕ адӕймаджы бонтау сты, Дӕ азтӕ — адӕймаджы азтау?

⁶Аххос мӕм цы агурыс, тӕригъӕд мӕм ссарыныл цы архайыс?

⁷Зоныс ӕй, азымджын кӕй нӕ дӕн, фӕлӕ мӕ Дӕ къухтӕй ничи фервӕзын кӕндзӕн.

⁸Дӕ къухтӕ мыл бафыдӕбон кодтой, Дӕхи къухӕй мӕ скодтай, афтӕмӕй мӕ ныр Дӕхи къухӕй сафыс.

⁹Цыма ӕлыг дӕн, уыйау мӕ куыд арӕзтай, уый Дӕ зӕрдыл ӕрлӕууын кӕн — ныр мӕ фӕстӕмӕ рыг куыд хъуамӕ фестын кӕнай?

¹⁰Ӕркодтай мӕ ӕхсырау, къӕдорау мӕ сбӕзджын кодтай.

¹¹Фыд ӕмӕ цармӕй, стӕг ӕмӕ нуарӕй сифтонг дӕн.

¹²Цард мын балӕвар кодтай, ӕдзух мыл аудыдтай, ӕмӕ Дӕуыл лӕууыди мӕ уд.

¹³Фӕлӕ мӕнӕ ис, цы сусӕг кодтай, уый, зонын дын Дӕ фӕндон.

¹⁴Тӕригъӕд мын нӕ ныббардзынӕ, мӕ рӕдыд мын нӕ ныххатыр кӕндзынӕ.

¹⁵Кӕд аххосджын дӕн, уӕд — додой мӕ къона! Кӕд мӕм азымӕй ницы ис, уӕддӕр мӕ сӕр хӕрдмӕ сисын нӕ бауӕнддзынӕн. Къӕхты бынмӕ ’рхаудтӕн, худинаджы бын фӕдӕн, мастӕй мӕ хъуырмӕ сдӕн.

¹⁶Мӕ мӕстытӕ къаддӕр нӕ кӕнынц. Куыддӕр мӕхиуыл хӕрдмӕ схӕцын, — домбайау мыл Дӕхи ныццӕвыс.

¹⁷Ног ӕмӕ ногӕй мӕ азымджын кӕныс, Дӕ маст карзӕй-карздӕр кӕны, фыдбылызтӕ иу иннӕйы фӕдыл сыстадысты мӕ ныхмӕ.

¹⁸Дунейы рухс мын цӕмӕн фенын кодтай? Фӕлтау куы амардаин — уӕд мӕ никӕй цӕст федтаид!

¹⁹Фӕлтау мӕ мады гуыбынӕй комкоммӕ ингӕнмӕ куы бахаудаин, цыма дунейыл мӕ кой дӕр нӕ уыди, афтӕ!

²⁰Ӕз бирӕ нал ахӕсдзынӕн, ныууадз мӕ, — иу чысыл уӕддӕр фӕхӕцон мӕхиуыл,

²¹цалынмӕ ӕнустӕм нӕ ацыдтӕн саудалынг бӕстӕм,

²²рухсы цъыртт кӕм нӕй, рухс дӕр талынджы хуызӕн кӕм у, уырдӕм».