Read Хуыцауы Дзырд иронау Иов 12 Bible Online

Иов 12 - Хуыцауы Дзырд иронау bible

Иов 12

¹Ӕмӕ дзуапп радта Иов:

²«Лӕгтӕ, ӕцӕгдӕр, сымах стут ӕмӕ, куы амӕлат, уӕд ӕппӕт бӕсты зонд мӕрдтӕм уемӕ ахӕсдзыстут!

³Мӕныл дӕр, сымахау, сӕр ис, ӕмӕ ӕз дӕр сымахӕй ницӕмӕй дӕлдӕр дӕн, стӕй ӕппӕт уыдӕттӕ чи нӕ зоны?

⁴Мӕ хӕлӕрттӕ мыл сӕхи худӕгӕй хӕссынц, Хуыцау, дам ын мӕнӕ цы дзуапп радта — ӕнӕкъӕм рӕстуд сын хъазӕнхъул сси!

⁵Амондджын чи у — ӕнамонддзинадыл худы, йӕ къӕхтыл фидар чи нӕ лӕууы, уыдонӕн цӕттӕгонд у, зӕгъгӕ.

⁶Абырджыты хӕдзӕрттӕ цӕрӕг сты, Хуыцауы чи мӕсты кӕны, уыдон ӕдас сты, цыма Хуыцау сӕ къухы ис, уыйау.

⁷Ӕгомыг фосы бафӕрс — бамбарын дын кӕндзысты, уӕларвон мӕргътӕ дын радзурдзысты;

⁸зӕххы бафӕрс — зонд дын бацамондзӕн, доны кӕсӕгтӕ дын рахабар кӕндзысты.

⁹Чи нӕ зоны, алцыдӕр Дунедарӕг сфӕлдыста, уый?

¹⁰Алы цӕрӕг уд дӕр, алы адӕймаджы царды комулӕфт дӕр Йӕ къухы ис.

¹¹Ныхӕстӕ хъус не ’взары, комарынг ад не ’нкъары?

¹²Зӕронд куырыхон у, бирӕ азтӕ зондыл ӕфтауынц.

¹³Уӕлзонд дӕр, хъомыс дӕр Уымӕ ис, уынаффӕ дӕр ӕмӕ амонгӕ дӕр Уый кӕны

¹⁴Уый цы фехала — ничиуал ӕй сараздзӕн, ахӕстоны кӕй бакӕна, уый уырдыгӕй нал рацӕудзӕн.

¹⁵Дӕттӕ куы баурома, уӕд бӕстӕ бахус уыдзӕн, куы сӕ рауадза — зӕхх доны бын фӕуыдзӕн.

¹⁶Хъомыс дӕр ӕмӕ уӕлзонд дӕр Уымӕ сты, сайӕг дӕр ӕмӕ сайд кӕуыл ӕрцыд — дыууӕ дӕр Йӕ бар сты.

¹⁷Уый уынаффӕгӕнджытӕн сӕ сӕрызонд фесафы, тӕрхонгӕнджыты сӕдылы кӕны.

¹⁸Паддзӕхтӕн сӕ рон раппары ӕмӕ сын астӕубосӕй сӕ синтӕ алвасы.

¹⁹Сауджынты бӕгъӕввадӕй атӕры, хъомысджынтӕн сӕ хъомыс фесафы.

²⁰Мӕлгъӕвзаджы ӕгомыг скӕны, зӕрондӕн йӕ сӕрызонд баталынг кӕны.

²¹Уӕздӕтты сӕгад кӕны, хъаруджынты тых скадавар кӕны.

²²Сау тарӕн йӕ арф байгом кӕны, мӕрдон сӕудар рухсмӕ ракӕны.

²³Адӕмты бӕрзонд дӕр сисы ӕмӕ сӕ сафгӕ дӕр фӕкӕны, ныххӕлиу сӕ кӕны ӕмӕ сӕ ӕрӕмбырд кӕны.

²⁴Адӕмты бардартӕн байсы сӕ зонд, ӕдзӕрӕг быдыры, фӕндаг кӕм нӕй, уым сӕ схӕтӕнхуаг кӕны,

²⁵ӕмӕ расыг лӕгтау, уырзӕй сгаргӕ, сӕудары, ӕнӕ рухсӕй фӕхилынц.