Read Хуыцауы Дзырд иронау Иов 22 Bible Online

Иов 22 - Хуыцауы Дзырд иронау bible

Иов 22

¹Ӕмӕ йын дзуапп радта Елифаз, теманаг:

²«Цы пайда ис адӕймагӕй Хуыцауӕн? ӕмбаргӕ чи у, уый пайда йӕхицӕн хӕссы.

³Раст адӕймаг кӕй дӕ, уый Хуыцауӕн ӕхсызгонӕй цы дӕтты? Ӕнаипп кӕй дӕ, уымӕй Ууыл цы ’фты?

⁴Хуыцауы тас дӕ кӕй ис, уый тыххӕй дӕ бафхӕрдзӕн, уый тыххӕй дын тӕрхон кӕндзӕн?

⁵Уӕдӕмӕ дӕ фыдракӕндтӕ сбирӕ сты, дӕ тӕригъӕдтӕн кӕрон нӕй.

⁶Ды ницӕй тыххӕй дӕр де ’фсымӕртӕй цъынды домдтай, бӕгънӕгӕн-иу йӕ фӕстаг бызгъуыр дӕр раластай йӕ уӕлӕйӕ.

⁷Дойныйӕ мӕлӕгӕн дон нӕ лӕвӕрдтай, сыдӕй мӕлӕгӕн бавгъау кодтай дӕ къӕбӕр.

⁸Тых кӕмӕ ис, зӕхх уыдоны у, бонджынтӕ йыл ӕрбынат кӕнынц.

⁹Ды-иу сидзӕргӕсты афтидармӕй арвыстай, сидзӕрты-иу ихы сӕрыл ныууагътай.

¹⁰Уымӕн бахаудтӕ ныр цъысымы, ӕвиппайды дыл стыр тас уымӕн бахӕцыд.

¹¹Саудалынджы ницыуал уыныс, знӕт уылӕнтӕн сӕ быны фӕдӕ.

¹²Ау, Хуыцау арвӕй уӕлдӕр нӕу? Скӕс-ма стъалытӕм, куыд бӕрзонд сты, уымӕ!

¹³Ды зӕгъдзынӕ: „Хуыцау цы зоны? Саудалынджы цы хъуамӕ равзара?

¹⁴Ӕврӕгътӕй Йӕм ницы зыны, афтӕмӕй арвы ӕрдынцарыл зилы“.

¹⁵Ау, рагзаманы тӕригъӕдджынтӕ кӕуыл цыдысты, уыцы над фӕндагӕй нал рахиздзынӕ?

¹⁶Уыдон афонӕй раздӕр цагъды фесты, сӕ хӕдзӕрттӕ сын дон фӕласта.

¹⁷Уыдон Хуыцауӕн дзырдтой: „Ныууадз нӕ! Ӕппӕтхъомысӕн нын Йӕ бон цы у?“

¹⁸Афтӕмӕй-иу сын Уый сӕ хӕдзӕрттӕ байдзаг кодта мулкӕй! Ме ’нӕуынон фӕуӕнт ӕнаккӕгты хъуыдытӕ!

¹⁹Рӕстуд сӕм кӕсдзӕн ӕмӕ райдзӕн, ӕнӕтӕригъӕд сыл худдзӕн:

²⁰„Не знагӕн йе сӕфт ӕрцыд, йӕ исбонӕй ма дзы баззад, уый та арты хай баци“.

²¹Ма тох кӕн Хуыцауимӕ, бафидау йемӕ ӕмӕ фарнӕй схайджын уыдзынӕ.

²²Йӕ зондамындмӕ Йын байхъус ӕмӕ йӕ дӕ зӕрдӕйы арф бавӕр.

²³Ӕппӕтхъомысмӕ раздах де ’ргом, ӕмӕ та ногӕй дӕ цард йӕ гаччы сбаддзӕн, ӕрмӕст фӕсур дӕ цатырӕй тӕригъӕд.

²⁴Дӕ хӕзнатӕм рыджы цӕстӕй акӕс, офираг сыгъзӕрин дойнаг дуртыл банымай.

²⁵Ӕппӕтхъомыс суӕд дӕ сыгъзӕрин, дӕ цӕхӕркалгӕ ’взист.

²⁶Уӕд цин кӕндзынӕ Ӕппӕтхъомысыл, дӕ каст ӕдзухдӕр уыдзӕни Хуыцаумӕ.

²⁷Скувдзынӕ Йӕм, ӕмӕ дын дӕ куывд фехъусдзӕн, ды та дӕ сомы нӕ фӕсайдзынӕ.

²⁸Цы сфӕнд кӕнай, уый дӕ къухы бафтдзӕн, дӕ фӕндаг алкӕддӕр рухс уыдзӕн.

²⁹Уымӕн ӕмӕ Уый сӕрыстыры ӕрныллӕг кӕны, фервӕзын кӕны ныфссасты.

³⁰Ӕназым чи нӕу, уый дӕр фервӕзын кӕндзӕн, дӕ сыгъдӕджы хатырӕй фервӕздзӕн».