Read Хуыцауы Дзырд иронау Иов 24 Bible Online

Иов 24 - Хуыцауы Дзырд иронау bible

Иов 24

¹Ӕппӕтхъомысӕн Йӕ тӕрхоны бонтӕ нысангонд цӕуылнӕ сты, Хуыцауы чи зоны, уыдон сӕм дзӕгъӕлы ӕнхъӕлмӕ цӕмӕн кӕсынц?

²Ауӕдзы дуртыл ӕддӕдӕр ахӕцынц адӕм, давд фосӕй сфосджын вӕййынц.

³Сидзӕрӕн акӕнынц йӕ хӕрӕджы, идӕдзы гал цъындыйы байсынц.

⁴Мӕгуырты фӕндагӕй иуварс ассонынц, сӕхи сӕ бамбӕхсынц мӕгуыргуртӕ.

⁵Тыгъд быдыры цы хӕрджытӕ хӕтынц, уыдонау мӕгуыртӕ сӕумӕйӕ ӕфтиаг агурӕг рацӕуынц; зилынц тыгъд быдыры — сӕхицӕн ӕмӕ сӕ сабитӕн хойраджы фӕдыл.

⁶Кӕйдӕр быдыртӕ кӕрдынц, ӕнӕхуыцауы сӕндоны рох гагатӕ уидзынц.

⁷Ӕхсӕв бӕгънӕгӕй ныххуыссынц, дзаума дӕр, стӕй, сӕхи уазалы цӕмӕй ӕрӕмбӕрзой, уый дӕр сын нӕй.

⁸Сахкъӕвдайы ныддонласт вӕййынц хӕхты, адӕргӕй айнӕджытӕм сӕхи нылхъивынц.

⁹Дзидзидай сидзӕры йӕ мады риуӕй ратонынц, хӕсты ныхмӕ мӕгуыр адӕмӕн сӕ сабиты байсынц цъынды.

¹⁰Цӕуынц бӕгънӕгӕй, дзаума сын нӕй, ӕххормагӕй куыристӕ фӕхӕссынц.

¹¹Систы ’хсӕн лӕмарынц сӕн, сӕндуцӕнты сӕн дуцынц, фӕлӕ дойныйӕ мӕлынц.

¹²Сахары хъуысы мӕлӕг адӕм хъӕрзын, ӕххуысагурӕг дзыназынц цӕфтӕ, фӕлӕ Хуыцау уыдӕттӕ нӕ уыны.

¹³Рухсы знӕгтӕ ис се ’хсӕн, уыдон Ын Йӕ фӕндӕгтӕ нӕ зонынц, Йӕ цӕуӕнтыл нӕ цӕуынц.

¹⁴Лӕгмар ӕхсӕвӕй сысты, мӕгуыры ӕмӕ мӕгуыргуры амары, ӕхсӕвыгон та давгӕ кӕны.

¹⁵Изӕрмилтӕм у йӕ каст хъахбайӕн, ничи мӕ фендзӕн, зӕгъгӕ, бамбӕхсы йӕ цӕсгом.

¹⁶Ӕхсӕвыгон хӕдзары къул бакъахынц, боныгон та сӕ хӕдзӕртты ӕхгӕддуарӕй бадынц ӕмӕ рухсмӕ нӕ цӕуынц.

¹⁷Уымӕн ӕмӕ уыдонӕн боны рухс саудалынгӕй уӕлдай нӕу, тары сау ӕндӕргтыл та ахуыр сты.

¹⁸Доны сын аирвӕзӕн нӕй, сӕ зӕххы хай — ӕлгъыст, сӕ сӕндӕттӕ ӕнӕвнӕлдӕй лӕууынц.

¹⁹Хуры зынг цӕстӕй митдон куыд ӕрбайсӕфы, афтӕ тӕригъӕдджын дӕр фесӕфдзӕни мӕрдтыбӕсты.

²⁰Цы хуылфӕй рацыд, уымӕй — рох, уаллӕттӕн хӕрзад хойраг суыдзӕн; хъуыды дӕр ӕй ничиуал ӕркӕндзӕн, бӕласау калд ӕрцӕудзӕни фыддзинад.

²¹Уыдон ӕфхӕрынц ӕнӕзӕнӕджы, идӕдзӕн хорздзинад нӕ ракӕнынц.

²²Фӕлӕ Хуыцау Йӕ хъомысы фӕрцы хъомысджынты дӕр басӕтдзӕн, уыдоны та райсомы бонӕй ницы ныфс ис.

²³Уый сӕ хъахъхъӕны, се ’нцой лӕууы, сӕ фӕндӕгтӕй Йӕ цӕст нӕ исы.

²⁴Куыддӕр сӕхиуыл фервӕссой, афтӕ ӕрбайсӕфдзысты: иннӕтау ӕрхаудзысты ӕмӕ амӕлдзысты; мӕнӕуы ӕфсиртау карст ӕрцӕудзысты.

²⁵Кӕд афтӕ нӕу, уӕд мӕ багӕды кӕнут, мӕ ныхӕсты ныхмӕ исты зӕгъут».