Read Хуыцауы Дзырд иронау Иов 27 Bible Online

Иов 27 - Хуыцауы Дзырд иронау bible

Иов 27

¹Ӕмӕ кодта дарддӕр Иов йӕ ныхас:

²«Цардӕгас у Хуыцау, раст тӕрхоны аккаг мӕ Чи не скодта, Цардӕгас у Ӕппӕтхъомыс, хъизӕмӕртты хай мӕ Чи фӕкодта!

³Цалынмӕ улӕфын, цалынмӕ мӕ мидӕг ис царды комулӕфт — Хуыцау мын кӕй балӕвар кодта, уый,

⁴уӕдмӕ ме ’взаг гӕды ныхас нӕ зӕгъдзӕни, уӕдмӕ мӕнг ныхас не ссӕудзӕни мӕ дзыхӕй.

⁵Цыфӕндыйӕ дӕр ӕз уемӕ не сразы уыдзынӕн, мӕ удӕгасӕй мӕхи аххосджыныл нӕ банымайдзынӕн.

⁶Мӕ рӕстдзинадыл фидар хӕцын, цалынмӕ удӕгас уон, уӕдмӕ мӕ зӕрдӕмӕ ницы хӕсдзынӕн.

⁷Ме знаг ӕнӕхуыцауы хал ахӕрӕд, мӕ ныхмӕлӕууӕгыл фыдгӕнӕджы бон акӕнӕд!

⁸Хуыцау кӕмӕн нӕй, уымӕн йӕ зӕрдӕ цӕуыл фӕлӕудзӕн, Хуыцау ын йӕ уд куы айса, уӕд?

⁹Фыдбон ыл куы акӕна, уӕд ын Хуыцау йӕ фӕдисхъӕр фехъусдзӕн?

¹⁰Исты йӕ уд Ӕппӕтхъомысыл лӕууы, Хуыцаумӕ у йе скаст кӕддӕриддӕр?

¹¹Хуыцауы къух цы у, уый уын ӕз бацамондзынӕн, Ӕппӕтхъомысы тыххӕй уӕ ницы басусӕг кӕндзынӕн.

¹²Уӕхӕдӕг дӕр ӕй куы уынут, уӕд ма дзӕгъӕл ныхас кӕм хъӕуы?

¹³Ӕнӕхуыцауӕн ахӕм хъысмӕт сныв кодта Хуыцау, ӕфхӕрӕг Ӕппӕтхъомысӕй ахӕм исбон айсдзӕн:

¹⁴цыфӕнды бирӕ ма уӕд йӕ хъӕстӕ — кардылӕфтыд фӕуыдзысты, йӕ байзӕддӕгтӕ сыдӕй мӕлдзысты.

¹⁵Удӕгасӕй сӕ чи баззайы, уыдоны рын фӕхӕсдзӕн, ӕмӕ сыл сӕ идӕдзтӕ не скӕудзысты.

¹⁶Йӕ рӕбыны уал ӕвзист ӕрӕфснайӕд фӕныкау, йӕ дарӕс сбирӕ уӕд ӕлыгау.

¹⁷Йӕ райст-бавӕрд дарӕс раст лӕгӕн баззайдзысты, йе ’взистытӕ, ӕнӕтӕригъӕд чи у, уыдоны хай бауыдзысты.

¹⁸Хӕлуарӕгау аразы йӕ тӕссонд хӕдзар, хъарагъулау ӕвӕры мусонг.

¹⁹Бонджынӕй бӕргӕ ныххуыссы, фӕлӕ сӕумӕйӕ гаффуттӕй райхъал вӕййы.

²⁰Дудгӕбон ӕй ивылд донау аласдзӕн, ӕхсӕвы йӕ уадтымыгъ аскъӕфдзӕн.

²¹Скӕсӕнӕй йыл уаддымгӕ йӕхи рауадздзӕн, йӕ бынатӕй йӕ фелвасдзӕн ӕмӕ йӕ ахӕсдзӕн.

²²Йӕхи йыл ӕгъатырӕй ныццӕвдзӕн, ӕмӕ дзы фӕдисонау лидздзӕн.

²³Адӕм-иу сӕ къухтӕ кӕрӕдзиуыл ныкъкъӕрц ласдзысты, къуыззитт кӕндзысты, йӕ фӕдыл кӕсгӕйӕ.