Read Хуыцауы Дзырд иронау Иов 29 Bible Online

Иов 29 - Хуыцауы Дзырд иронау bible

Иов 29

¹Ӕмӕ Иов дарддӕр кодта йӕ ныхас:

²2-3 «Тӕхуды ӕмӕ кӕддӕры замантӕ фӕстӕмӕ раздахӕн куы уаид — Хуыцау мыл Йӕ арм куы дардта, Йӕ цырагъ мӕ сӕрмӕ куы сыгъди, тары мын куы рухс кодта мӕ развӕд!

⁴Уӕд уыдтӕн мӕ тӕккӕ лӕджы кары, мӕ цатыр Хуыцауы хорзӕхӕй хайджын куы уыди,

⁵Ӕппӕтхъомыс ма мемӕ куы уыд, мӕ цот мӕ алыварс куы уыдысты.

⁶Уӕд мӕ фӕндаг сойвӕдыл цыди, айнӕгӕй та оливӕйы сой лӕдӕрсти.

⁷Ӕз-иу сахары кулдуары размӕ рацыдтӕн, фӕзы-иу мӕ бадӕны ӕрбадтӕн,

⁸ӕмӕ-иу, мӕн фенгӕйӕ, фӕсивӕд фӕндагӕй иуварс алӕууыдысты, хистӕртӕ-иу мын сыстадысты.

⁹Ӕлдӕрттӕн-иу сӕ ныхас сӕ дзыхы нал бадти, адӕргӕй-иу сӕ дзыхтӕ сӕ къухтӕй амбӕрзтой.

¹⁰Уӕздӕттӕн-иу сӕ хъӕлӕс нал хъуысти, се ’взаг-иу сӕ комарынгыл баныхӕст.

¹¹Чи мӕм хъуыста, уыдон мӕ стыдтой, чи мӕ уыдта, уыдон мӕ ’ппӕлыдысты,

¹²уымӕн ӕмӕ ӕз мӕгуыр лӕгӕн уыдтӕн фӕдисон, сидзӕры ӕфхӕрын нӕ уагътон.

¹³Мӕлӕтӕй-иу кӕй фервӕзын кодтон, уый мын-иу раарфӕ кодта, мӕ фӕрцы-иу идӕдзы зӕрдӕ срухс ис.

¹⁴Рӕстдзинад-иу мӕ уӕлӕ дарӕсау ӕркодтон, рӕстдзинад уыд мӕ уӕлӕфтау, мӕ худ.

¹⁵Куырмӕн уыдтӕн цӕстытау, къӕхты бӕсты — къуылыхӕн;

¹⁶Фӕхӕцӕг кӕмӕн нӕй, уыдонӕн фыд уыдтӕн, ӕнӕзонгӕйӕн-иу йӕ хъаст равзӕрстон лӕмбынӕг.

¹⁷Фыдлӕджы ӕфсӕртӕ-иу ныссастон, йӕ дзыхӕй-иу ын амӕттаджы скъахтон.

¹⁸Дзырдтон мӕхицӕн: „Мӕ къонайыл уыдзӕни мӕ мӕлӕт, мӕ царды бонтӕн змисау нымӕц нӕ уыдзӕн:

¹⁹мӕ уидӕгтӕ донӕфсӕст сты, мӕ къалиутыл ӕртӕх ӕхсӕвиуат кӕны,

²⁰мӕ кад зӕронд нӕ кӕны, мӕ фат нӕ сайы“.

²¹Адӕм мӕм, нымдгӕнгӕ, хъуыстой, мӕ уынаффӕмӕ ӕдзӕмӕй ӕнхъӕлмӕ кастысты.

²²Мӕ ныхасыл сӕ дыууӕ ничиуал загътаид, мӕ ныхӕстӕ сӕ уарынау ӕфсӕстой.

²³Мӕ ныхасмӕ мын ӕнхъӕлмӕ кастысты къӕвдайау, сӕ дзыхтӕ-иу ӕм бадардтой уалдзыгон сахайау.

²⁴Кӕй-иу сӕм бахудтӕн, уый сӕ уырнгӕ дӕр нӕ кодта, рухс цӕстӕй сӕм куы ракӕсин, уымӕ бӕллыдысты.

²⁵Ӕз сын фӕндаг амыдтон, цыдтӕн сӕ разӕй, раст цыма паддзах — йе ’фсадимӕ, хъыггӕнджытӕн ныфсӕвӕрӕг уыдтӕн.