Read Хуыцауы Дзырд иронау Иов 3 Bible Online

Иов 3 - Хуыцауы Дзырд иронау bible

Иов 3

¹Иов дзурын райдыдта ӕмӕ, дунемӕ цы бон фӕзынди, уый фелгъыста.

²Загъта Иов:

³«Дӕлдзӕх ныххауӕд мӕ райгуырӕн бон, гуырдз равзӕрд, зӕгъгӕ, куы загъдӕуыди, уыцы ӕхсӕв.

⁴Саудалынг фестӕд уыцы бон, Хуыцауӕй уӕлӕрвты рохуаты куыд аззайа, рухсы цъыртт ӕм куыд никуы бакӕса!

⁵Саудалынг ӕмӕ йӕ мӕрдон фӕлм ӕнӕхъӕнӕй сӕхи бакӕнӕнт, сау ӕврагъ ыл ӕртыхсӕд, ӕмӕ йыл тар хурдалынгау стыр тас бафтауӕд!

⁶Саудалынг фестӕд уыцы ӕхсӕв, афӕдзы бонтӕм куыннӕ бахауа, мӕйтӕй иуимӕ дӕр нымад куыннӕ ’рцӕуа!

⁷Уыцы ӕхсӕв гуырдз ма равзӕрӕд, цины хъӕр ма райхъуысӕд!

⁸Бон чи ӕлгъиты, Левиафаны[1] райхъал кӕнын кӕй бон у, уыдоны ’лгъыст ӕй баййафӕд.

⁹Стъалы ма фӕзынӕд йӕ изӕры арвыл, саугуырм бауӕд йӕ бонцъӕх, хурыскастмӕ ныуурс уӕнт йӕ цӕстытӕ, фӕлӕ сӕуӕхсиды рухс ма фенӕд!

¹⁰Уымӕн ӕмӕ мын мӕ ныййарӕджы ӕнӕзӕнӕг нӕ фӕкодта, хъизӕмӕрттӕн мӕ равзӕрын кодта.

¹¹Мӕ мады гуыбынӕй куы рацыдтӕн, тӕккӕ уыцы уысм мӕ уд цӕуылнӕ систон?

¹²Уӕрджытыл мӕ цӕмӕн ӕрӕвӕрдтой[2], мӕ мады ’хсырӕй мӕ цӕмӕн схастой?

¹³Мӕхицӕн ӕнӕмӕтӕй хуыссин ӕмӕ улӕфин,

¹⁴ныр сӕ арӕзтытӕ хӕлддзаг кӕмӕн сты, кӕддӕры уыцы паддзӕхтӕ ӕмӕ сӕ уынаффӕгӕнджытимӕ;

¹⁵йӕ сыгъзӕринтӕн ныккӕнӕн кӕмӕн нӕ уыд, йӕ хӕдзар ӕвзистӕй чи байдзаг кодта, уыцы бонджын ӕлдӕрттимӕ.

¹⁶Баныгӕдтаиккой мӕ ӕфхӕлцытимӕ, боны рухс чи нӕ федта, уыдонимӕ.

¹⁷Уым ӕнаккӕгтӕ дӕр ӕрсабыр вӕййынц, уым цардӕфхӕрдтӕ дӕр сулӕфынц,

¹⁸уым ахӕстытӕ дӕр ссарынц ӕнцой, сӕ цӕстдарджыты хъӕр нал фӕхъусынц.

¹⁹Уым гыццыл лӕг дӕр ӕмӕ стыр лӕг дӕр иу ран сты, уым йӕ хицауӕй сӕрибар у цагъар.

²⁰Удхаргӕнӕджы цӕмӕн хъӕуы рухс, удвӕллады та — цард?

²¹Мӕлӕтмӕ бӕргӕ у сӕ каст, фӕлӕ — нӕй, хӕзна ссарынӕй сын уый уынд ӕхсызгондӕр уаид.

²²Ныццин кӕниккой уыдон сау ингӕныл, чырыныл кӕй фӕхӕст сты, ууыл.

²³Цӕмӕн рардӕуы уыцы лӕгӕн цард, Хуыцау Йӕхӕдӕг йӕ развӕндаг цӕлхдуртӕй кӕмӕн ӕхгӕны?

²⁴Мӕ тыхулӕфт мӕ хӕринаг у ныр, мӕ хъӕрзын донау ивылы.

²⁵Цӕмӕй-иу тарстӕн, уый мыл ныр ӕрцыд, Цӕмӕй стъӕлфыдтӕн, уый мӕ баййӕфта.

²⁶Ӕнцой мын нӕй, ӕрсабыр нӕй, ӕрулӕфт, ӕрмӕстдӕр удхар у мӕнӕн мӕ хай».