Read Хуыцауы Дзырд иронау Иов 31 Bible Online

Иов 31 - Хуыцауы Дзырд иронау bible

Иов 31

¹Мӕ цӕстытимӕ баныхас кодтон, сылгоймагмӕ ӕнӕфсарм каст кӕй нӕ бакӕндзынӕн.

²Фӕлӕ мын цы ныхфыст ис уӕларвон Хуыцауӕй? Фӕлӕ мын цы исбон лӕвӕрд ис Ӕппӕтхъомысӕй, уӕларвӕй?

³Ау, фыдбылызы хъуамӕ тӕригъӕдджын ма бахауид, фыдгӕнӕгӕн ма ӕрцӕуид йе сӕфт?

⁴Ӕви мын Хуыцау мӕ фӕндӕгтӕ нӕ уыны, ӕви мын мӕ алы къахдзӕф дӕр нӕ нымайы?

⁵Кӕд, мыййаг, галиу митыл фӕцалх дӕн, кӕд мӕ къӕхтӕ мӕнгдзинады фӕдыл цыдысты,

⁶уӕд мӕ раст тӕразтыл сбарӕнт, ӕмӕ Хуыцау базондзӕн, ӕнӕкъӕм кӕй дӕн, уый.

⁷Кӕд мӕ фӕндагӕй иуварс фӕзылдтӕн, мыййаг, кӕд мӕ зӕрдӕ мӕ цӕстыты фӕдыл адзӕгъӕл, ӕмӕ къухтӕ истӕмӕй фӕчъизи сты,

⁸уӕд, цы байтыдтон, уый искӕмӕн хӕринаг фӕуӕд, мӕ хуымы цы ’рзади, уыдон мын сӕ бындзарӕй стындӕуӕд!

⁹Кӕд сылгоймагмӕ мондаг кодтон ӕмӕ-иу искӕй дуармӕ бахъуызыдтӕн,

¹⁰уӕд мӕ бинойнаг ӕндӕрӕн ӕруат кӕнӕд, искӕй хӕзгул суӕд.

¹¹Уымӕн ӕмӕ уый у тӕригъӕд, тӕрхоны аккаг фыдракӕнд,

¹²суанг Аваддонмӕ чи ӕркӕны, ахӕм бынсыгъдгӕнӕг арт, ӕмӕ мӕ тыллӕг ӕд уидӕгтӕ йӕ амӕттаг фӕуыдаид.

¹³Кӕд ӕз, сылгоймагӕй уа, нӕлгоймагӕй, мӕ хӕдзары кусджыты бартӕ ницӕмӕ дардтон ӕмӕ сын сӕ хъаст не ’взӕрстон,

¹⁴уӕд цы зӕгъдзынӕн, Хуыцау мӕ ныхмӕ куы ралӕууа ӕмӕ мӕ дзуапп куы ӕрдома, уӕд?

¹⁵Мӕн дӕр ӕмӕ уыдоны дӕр мады гуыбыны Уый нӕ равзӕрын кодта? Нӕ дыууӕты дӕр мады гуыбыны Уый не сфӕлдыста?

¹⁶Мӕгуыр лӕджы искуы афтидармӕй мӕ дуарӕй аздӕхтон, сидзӕргӕсы искуы ӕнхъӕлмӕгӕсгӕйӕ ныууагътон?

¹⁷Ау, мӕ къӕбӕр искуы сусӕгӕй бахордтон, сидзӕрӕн-иу дзы нӕ фӕхай кодтон?

¹⁸Мӕ рагбонтӕй нырмӕ ӕз сидзӕртӕн уыдтӕн фыдау, мӕ райгуырдӕй фӕстӕмӕ сидзӕргӕсӕн йе ’нцой лӕууыдтӕн.

¹⁹Дарӕсхъуаг чи уыд ӕмӕ уазалӕй чи мард, уыцы мӕгуырмӕ кӕд искуы уазалцӕстӕй кастӕн,

²⁰кӕд-иу йе уӕнгтӕ не схъарм сты мӕ фӕрцы, кӕд ӕй мӕ уӕрыччыты хъуын нӕ бахъарм кодта;

²¹кӕд искуы сидзӕрмӕ мӕ къух систон, тӕрхон мӕ фарс кӕй уыдзӕн, уый ныфсӕй,

²²уӕд мӕ къух йӕ рӕбыныл ахауӕд, уӕд мӕ цонг ме уӕхскӕй фӕиртӕсӕд!

²³Ӕз Хуыцауы азарӕй тынгдӕр ницӕмӕй тарстӕн, Йе стырады раз ахӕм исты ракӕнын нӕ бауӕндыдаин.

²⁴Ме скаст сыгъзӕринмӕ куы уыдаид, мӕ зӕрдӕ куы дардтин хӕзнайыл,

²⁵куы цин кодтаин мӕ бирӕ мулкыл, мӕ къухты бӕркадыл;

²⁶хуры тӕмӕны уындӕй, мӕйы хъал цыдмӕ кӕсгӕйӕ,

²⁷мӕ зӕрдӕйы мидӕг куы бабӕллыдаин ӕмӕ мӕхи къухыл, табугӕнгӕйӕ, мӕ былтӕ куы авӕрдтаин,

²⁸уӕд мын уый тыххӕй дӕр тӕрхон кӕнын хъуыдаид, уӕд уый дӕр Бӕрзӕндтыл Бадӕг Хуыцауы раз гадзрахатдзинад уыдаид.

²⁹Ау, искуы ӕз ме знаджы сӕфтыл ферадтӕн, искуы йын йӕ фыдбылызыл бацин кодтон?

³⁰Мӕ дзыхы ныхасӕй тӕригъӕды никуы бацыдтӕн, амӕл, зӕгъгӕ йӕ не ’лгъыстон.

³¹Мӕ цатыры нӕ дзырдтой адӕм, тӕхуды, йӕ фыдызгъӕлӕй нӕ куы бафсадид, зӕгъгӕ.

³²Фӕндаггон-иу ӕхсӕвыгон уынджы нӕ баззад, мӕ дуар ын кӕддӕриддӕр гом уыд.

³³Мыййаг, кӕд иннӕтау ӕз дӕр мӕ тӕригъӕдтӕ арф ӕмбӕхстон,

³⁴уӕд ӕз тӕрсин дзыллӕйӕ, мӕ мыггаг мыл ӕлгъ куы кӕной, уымӕй, ӕмӕ мӕ дзых ныххуыин, хӕдзарӕй ӕддӕмӕ дӕр нал ракӕсин.

³⁵О, исчи мӕм куы байхъусид! Цы загътон, уыдонӕй алцӕуыл дӕр ӕз мӕ къух ӕвӕрын, ӕмӕ мын Ӕппӕтхъомыс дзуапп раттӕд, мӕ Аххосгӕнӕг ныффыссӕд, цӕй мидӕг ис мӕ азым.

³⁶Ӕз уыцы фыст ме ’ккой скӕнин, мӕ сӕрыл ӕй кады худау ӕркӕнин.

³⁷Мӕ алы къахдзӕф дӕр Хуыцауӕн раргом кӕнин, Йӕ размӕ рацӕуин ӕлдарау.

³⁸Кӕд мӕ тӕригъӕдтӕ зӕххӕн уӕз кӕнынц ӕмӕ йӕ алы ауӕдз дӕр хъаст кӕны мӕнӕй;

³⁹кӕд ын йӕ тыллӕгӕй лӕвар пайда кодтон, ӕмӕ мӕ зӕхкусджытӕ сӕ хъуырмӕ систы,

⁴⁰уӕд мӕнӕуы бӕсты какон сындзытӕ ’рзайӕд, хъӕбӕрхоры бӕсты — хӕмпӕлгӕрдӕг». Ууыл йӕ ныхас фӕци Иов.