Read Хуыцауы Дзырд иронау Иов 32 Bible Online

Иов 32 - Хуыцауы Дзырд иронау bible

Иов 32

¹Иов йӕ рӕстдзинадыл дызӕрдыг нӕ кӕны, уый куы бамбӕрстой йе ’ртӕ хӕлары, уӕд ныхъхъус сты, ницыуал ӕм дзырдтой.

²Ӕмӕ уӕд Барахелы фырт Елигуйӕн йӕ маст рафыхти. Елигу уыдис Бузийы байзӕддӕгтӕй, Рамы мыггагӕй. Иовмӕ уымӕн смӕсты ис, ӕмӕ уый йӕхи Хуыцауӕй растдӕр хуыдта,

³ӕртӕ хӕлармӕ та уымӕн, ӕмӕ Иовы ныхмӕ исты сдзурынӕн аккаг ныхӕстӕ не ссардтой.

⁴Елигу Иовӕн исты зӕгъынмӕ тагъд нӕ кодта, уымӕн ӕмӕ иннӕтӕ уымӕй хистӕр уыдысты.

⁵Уымӕй уӕлдай сӕ бон зӕгъын ницыуал у, уый куы федта, уӕд смӕсты ис.

⁶Елигу, Барахелы фырт, Бузийы байзӕддаг, загъта: «Ӕвзонг дӕн ӕз, сымах та стут зӕронд, ӕмӕ ӕфсӕрмӕй мӕ хъуыды ӕз нӕ загътон раздӕр.

⁷Дзырдтон мӕхицӕн: хистӕртӕ уал дзурӕнт, кардзыд адӕм ахуыр кӕнӕнт уӕлзондыл.

⁸Фӕлӕ адӕймагӕн йӕ мидӕг ис царды комулӕфт, уд, Ӕппӕтхъомысы комулӕфт ӕй схайджын кӕны зондӕй!

⁹Зонд кӕстӕр ӕмӕ хистӕрӕй нӕу, хъуыддаг раст ӕрмӕстдӕр карджын нӕ равзары.

¹⁰Уӕдӕ мӕнмӕ дӕр ӕрбайхъусут, ӕмӕ ӕз дӕр зӕгъон мӕ хъуыды.

¹¹Ӕнхъӕлмӕ уӕм фӕкастӕн, цалынмӕ сымах уынаффӕтӕ кодтат ӕмӕ ныхӕстӕ агуырдтат, уӕдмӕ.

¹²Кӕсын, ӕмӕ уӕ иу дӕр Иовы ныхмӕ ницы загъта, йӕ ныхӕстӕн ын дзуапп нӕ радта.

¹³Афтӕ уӕм ма кӕсӕд, ӕмӕ уӕлзондӕй схайджын стут, Хуыцау, дам ӕй багӕды кӕнӕд, адӕймаг нӕ, фӕлӕ!

¹⁴Мемӕ нӕ дзырдта Иов, ӕмӕ йын сымах хуызӕн дзуапп нӕ ратдзынӕн.

¹⁵Фӕтарстысты, хъусӕй лӕууынц, цы зӕгъой, уый сын нал ис.

¹⁶Ӕнхъӕлмӕ уӕм фӕкастӕн ӕмӕ, кӕд ницыуал зӕгъинаг стут, кӕд афтӕ хъусӕй лӕудзыстут,

¹⁷уӕд ын ӕз хъуамӕ дзуапп раттон, ӕз дӕр ын мӕ хъуыды зӕгъон.

¹⁸Уымӕн ӕмӕ мӕ ныхӕстӕ мӕ былалгъмӕ схӕццӕ сты, мӕ уд мӕ хуылфы скатай ис,

¹⁹ног сӕнӕй йедзаг ӕмӕ ӕхгӕд лалымау фӕйнӕрдӕм атоныны ӕввонг дӕн.

²⁰Куы сдзурон, уӕд мын фенцондӕр уыдзӕн, хъуамӕ мӕ дзых байгом кӕнон ӕмӕ исты зӕгъон.

²¹Мӕ разы чифӕнды дӕр уӕд, цурон ныхасмӕ мӕм мачи ӕнхъӕлмӕ кӕсӕд.

²²Уымӕн ӕмӕ цӕстмӕхъус ныхас мӕ удысконды нӕй, фӕлтау мӕ фесафӕд ме Скӕнӕг!