Read Хуыцауы Дзырд иронау Иов 37 Bible Online

Иов 37 - Хуыцауы Дзырд иронау bible

Иов 37

¹Мӕ зӕрдӕ йӕхи къултыл уымӕн хойы, рагӕппӕввонг у мӕ риуӕй.

²Хъусут, хъусут Йӕ нӕргӕ хъӕлӕсмӕ, ӕрвнӕрды уынӕр цӕуы Йӕ комӕй,

³арв ӕгасӕй гыбар-гыбур фестад, зӕххы кӕрӕттӕм хӕццӕ кӕнынц Йӕ судзгӕ фӕттӕ.

⁴Ӕмӕ мӕнӕ ныннӕры Йӕ хъӕлӕс, Йӕ диссаджы хъӕлӕс ныггыбар-гыбур кӕны — алы ранмӕ дӕр хъуысы.

⁵Дисы ӕфтауы Хуыцауы хъӕлӕс, зонд нӕ ахсы Йе стыр хъуыддӕгтӕ.

⁶Митӕн фӕзӕгъы: „Зӕхх ӕрӕмбӕрз!“, къӕвдатӕн: „Тынгдӕр уарут!“

⁷Алкӕй къухыл — Йӕ нысан, цӕмӕй Йын алчи Йӕ хъуыддӕгтӕ зона.

⁸Сӕ хуыккӕмттӕм алидзынц сырдтӕ ӕмӕ ӕрныгъуылынц уым.

⁹Сусӕг ӕвӕрӕнтӕй рацӕуы тымыгъ, абухгӕ дымгӕтӕ ’рбахӕссынц уазал.

¹⁰Хуыцауы ӕрбаулӕфтӕй равзӕры их, ныхъхъӕбӕр вӕййы доны уӕлцъар.

¹¹Хуыцау мигътӕ байдзаг кӕны донӕй, арвӕрттывдтӕ райдзӕгъды ӕврӕгътӕй.

¹²Мигътӕ Йӕ фӕндонӕй зилдух кӕнынц, сӕ хуыз аивынц; Уый сын куыд фӕзӕгъы, афтӕ кӕнынц ӕгас зӕххы къорийыл.

¹³Куы Хуыцауы цӕф, куы та Йӕ хорзӕх ӕрхӕссынц зӕхмӕ.

¹⁴Фӕлӕуу, Иов, ӕрбайхъус, Хуыцауы диссӕгтыл ахъуыды кӕн!

¹⁵Зоныс ӕй, мигътӕ Хуыцауы коммӕ куыд кӕсынц, арвӕрттывдӕй куыд ныррухс кӕны мигъ?

¹⁶Зоныс, мигътӕ арвастӕу куыд лӕууынц? Уый алцыдӕр зоны ӕххӕстӕй, диссаг сты Йӕ хъуыддӕгтӕ.

¹⁷Хуссайраг дымгӕ зӕххыл куы рауадзы, уӕд сфыцыс дӕ дарӕсы.

¹⁸Мыййаг, ды Йемӕ нӕ айтыгътай уӕлӕрвтӕ, джиппыуагъд айдӕнау фидар чи у, уыдон?

¹⁹Бацамон нын, цы Йын зӕгъӕм, — ацы сӕудары мах нӕ сӕрӕн ницыуал зонӕм.

²⁰Йемӕ мӕ ныхас кӕнын кӕй фӕнды, уый йын ӕз куыд фехъусын кӕнон — мӕхимӕ мӕ къух исын?

²¹Никӕй бон у хурмӕ кӕсын, арвыл тӕмӕнтӕ куы фӕкалы, дымгӕ мигътӕ куы асуры, уӕд.

²²Цӕгатӕй фӕзыны сыгъзӕрин цӕхӕр — Хуыцауы диссаджы рӕсугъддзинад тасы ӕфтауы!

²³Ӕппӕтхъомысыл не ’ххӕссы нӕ зонд. Йӕ хъомысӕй, Йӕ раст тӕрхонӕй цытджын у. Йӕ рӕстад у ӕгӕрон, Уый никӕй ӕфхӕры.

²⁴Уымӕ гӕсгӕ, йӕхи зондджын чи хоны, уыдон Дзы иууылдӕр тӕрсӕнт, уӕлзонд кӕмӕ ис, уыдон иууылдӕр ризӕнт Йӕ разы!»